Na arakar ayong ng'ikaru ng'ikan, abu amaekang kainak ayong ainakinet natiajokon. Arai nying'ok a ng'iukio a ng'uuni. Akwar na ayaunia amaekang nying'ok nawi abu ayong atalakar. Atoyen atamar ayakar epae dir.

Asipokinet ng'esi kwap, abu amaekang toreun nikang keng'it tama, "Ali kiro inyaraa iyong ng'esi?" Sodi eng'olik ayong nyiing'ok kang atolimok ekiro be " Koko." Abu amaekang toriang'akin. King'is tama," nyonte inyaritor iyong ng'esi Koko?" Atama ayong," Ikwan ng'esi ka Ekoko."

Eng'it ayong amaekang kidounitoe Koko arae Ng'esi bon. Katatachak ayong amaekang atamar eyei iche ni ikwaan ka Koko. Abu ayong atolot aanyun lokatokeng a Koko.

Na eng'olikinia koko lokaatokeng abu talakar lokojokon. Apotu luarei ng'ulu tokienyikinos nibore ni itamari iyong irworosi.

Abu eng'it amaekang kapedori akirik Koko ka lokaatokeng. Abu tolim tama, "itemokino." "Na kaneni tochoik ejok." Kotere ng'una, nachatabong etoboliaene ayong kesi.

Arumoret a ng'ilapio a ngidis, apotu Koko ka lokaatokeng topoloto, togogong'ieto nabo tokilikiliut. Apotu topoloto lokojokon kepio tani ekiyokie kesi a lopei.

Kaneni, abu atolimok amaekang tobua lokaatokeng a Koko. Na kaneni, na edong'io Koko bon abu tosilik tosiny. Eng'olik esibit ibore ni esaki a king'it ayong atamar, "Nyonte isubia iyong kona?"

Abu tojong'o aboliare. Ache pak abu tong'er tani arukit ka ayong. Aya ng'apakin ng'ache nape emujanea Koko ejok. Abu ayong eyalolong. Engitakin ayong atamar," Ekokini ayong abili aking'arakin Koko ai?"

Abu bocha akwaar ache amaekang kipeyoun nikang. Na eiraria ayong etoil keng, epung'ar ayong esiriamia ng'esi. Eringa ning'olikina ng'esi, eira ayong ekikomokine a ng'ing'okuo.

Kayaye ejikon, echurosi Koko ka lokaatokeng aalakara!

Alakara lokojokon noi kepio tani nia anui, karai amaekang kori Koko. Abu atoyen atamar ebong'i Koko loboyor lopalem sek ayakar, abong'unet a lokaatokeng. Kilosi atokera anaro nabo!