Óre apá ará kití, náaishô olénkapú enkíshóórotó sídáí olêng. Náaishô olkití día.  Óre ínâ olóng nayáu áng, náshípa olêng, amû átáyíóló ajó ánóto olchoré odúpa.

Náajokí olénkapú peê adung'oki enkárná. Nájó Coco. Náaikilíkuan olénkapu peê aishoó ínâ árná. Nájóki, te enkárakí kényaányukie "cocoa."

Náíkilíkuan olénkapú tenáa ké ninyé aké eáta. Náajokí, kéáta likái onyaányukie.  Nálo adól.

Óre peê édôl Coco olaláshe, néshipa olêng. Néítutûm ilúkúny énaa iloshî oányaita ilomón.

Náomón olénkapú peê áaishó mataramáta pokíra aáre. Náaishô. Néjo peê aramát aitobirakí. Népuo lelô díéîn boó áaiguran.

Óre peê elusóo ilápaitin kumók, nébulu lelô díéîn áaku sapúki. Néaku imáídim ataramáta ópeny.

Nélotu olénkapú ayá olikái día. Néíng'uarí Coco. Óre peê eyáí olaláshe, néísinánuo Coco olêng. Nétiu énaa káagirá aikilikúán ajokí, "káínyoo peê itaasá ínâ?"

Népal endála. Néany kiriamári áapuo óng'átá. Nétií inkólóng'i náanya Coco endáa kití olêng. Nányamálu siî nanú olêng. Náíng'oru enáíkó peê arét Coco.

Óre nabô oléng, néparán iyíóók olénkapú. Óre peê aníng éírô, nálo enetíi. Káke óre éítû abáíki náning ildíein edalá, ébúákítâ.

Nédala, néípirrâr Coco ó olaláshe lenyé te dúkuya nánú.

Nádol ajó etishípe Coco peê etumó ó olaláshe lenyé. Náláu ajó ké ing'áí áíter airorokí, ké olénkapú láí arashû ké Coco. Náyíólou ajó kényorráa táatá Coco máíriamari áapuo áaipirrar te ong'atá.