Nilipotimia umri wa miaka mitano, mjombangu alinipa zawadi ya mbwa mdogo wa wiki tatu!

Siku aliyoniletea mbwa huyo, nilifurahi sana. Nilijua kuwa nilikuwa nimempata rafiki.

Nilipomweka chini, mjomba alinigeukia na kuniuliza, "Utamwitaje?" Nilimwangalia mbwa wangu kisha nikasema, "Ataitwa KoKo."

Mjombangu alishangaa sana akaniuliza, "Mbona unamwita Koko?" "Kwa sababu rangi yake ni kama kakao," nilimjibu.

Nilimwuliza mjomba iwapo Koko alizaliwa peke yake.

Mjomba alisema kwamba alikuwa na nduguye aliyemfanana kabisa. Nilienda kumwona nduguye Koko.

Koko alipomwona nduguye, alichangamka sana.

Wawili hao waliweka vichwa vyao pamoja kama waliokuwa wakiongea.

Nilimwuliza mjomba ikiwa ningeweza kuishi na Koko na nduguye.

Alisema, "Ni sawa wewe kuwaweka wote wawili. Lakini lazima uwalinde vizuri."

Kila jioni, nilicheza nao na kuwafanyisha mazoezi.

Miezi michache baadaye, Koko na nduguye walikuwa wamekua wakubwa. Walikuwa wenye nguvu na afya.

Singeweza kuwachunga peke yangu tena.

Nilimwuliza mjomba kumrudisha nduguye Koko kwake. Koko alipoachwa peke yake, alihuzunika mno.

Alikuwa kama anayeniuliza, "Kwa nini ulifanya hivyo?"

Koko alikoma kucheza. Wakati mwingine alikataa kwenda nami matembezini akipendelea tu kulala nje ya nyumba yetu.

Wakati mwingine alikula chakula kidogo sana. Nilikuwa na wasiwasi. Nilijiuliza vipi ningeweza kumsaidia Koko?

Siku moja mjombangu alitutembelea. Niliposikia sauti yake, nilienda haraka nje.

Kabla ya kumwona, nilisikia mbwa wakibweka.

Nyuma ya jikoni, Koko na nduguye walikuwa wakicheza!

Nilifurahi sana hadi sikujua nimkumbatie nani kwanza, Koko au mjombangu.

Nilijua kwamba Koko angerejelea ile hali yake ya kwaida. Tungeanza tena kufanya mazoezi pamoja!