Ikare mo macon onongo tye laco mo matye ki bur marac ikor tyene. En pe romo wot onyo cungu. Laco meno onongo bedo i caro mo gi dakone karacel gi lotinone.

Lunyodo meno gitye ki awobe adek ki nyako acel. Latin nyako ni nyinge Nangila. Tice ma pire tek aye obedo gwoko wone. Awobe gi cito ka pur ki gwoko lee.

Nangila onongo tye nyako maleng atika. Dano me caro ni ducu gimaro dok giworo. Lunyodo ne gi mito laco mo maber pi nyar-gi. Gumiyo tic atima matek wek ginong laco maber.

Ka ngat ma mito nyomo nyako meno omyero onong yat Acholi ki inget kulu mo macok gi caro meno. Yat meno obi cango bur pa won Nangila. Ento kulu meno onongo opong ki joki maracu.

Coo mukene gutemo nongo yat meno ento gudwogo gi cingi nono. Coo mukene pe gudwogo matwal.

Nangila cwinye obale matek. Wa omegine weng pe giromo cito i kulu meno. Inino mo acel, Nangila omoko tame me cito ka kwinyo yat meno en kikome. Mine owace ni "Nyara, ka coo mategu pe gutwero, in iromo twerone nining?" Ento Nangila nongo dong omoko tame woko.

I yoo me cito i kulu meno, Nangila orwate ki mego ma otii ma onongo otingo yen. Ci Nangila okonyo mego me ki tingo yen tedo ne ni. Mego ma otii ni cwinye obedo yom matek. Owaco bot Nangila ni "Abi tito boti kit me cito i kulu jok meno ki ngo ma omyero itim ka i oo kunu.

Ikare ma Nangila oo idog kulu meno, en oneno dul pa jok ma gitye ka mat ki myel. En okuru kun tye ka neno gi. Joki meno ducu gucako nino gi acel acel.

Ikare ma joki meno dong gunino woko weng, Nangila olenge i dyer pii kulu meno. Onongo yat Acholi meno ci oketo i opiro mere. Ikare ma tye ka kwong me dwogo iwi cere, tage pa pii obedo ka mede.

Ikare ma Nangila oo teng tera, joki ni ducu gucoo woko. En ocako wero wer ma mego ma otii ni opwonyo en kwede: An nyar pa Wekesa, an aa gi ikulu. Abino pien coo weng gilworo bino. Wora mito yat Acholi eni pi cango wang bur. Man aye tyen lok ma oweko atye kany, dano mapol gilworo bino, pien wun aye luloc.

Dwan Nangila onongo winyo ne mit matek ma oweko joki ni olego Nangila me mede ki wer naka naka. Wer pa Nangila oweko joki ni weng gudok ka nino odoco. Ikare ma gunino, Nangila ongweco matwir paka wa gang i caro gi ni.

Dano ducu matye i caro meno onongo gitye ka kuru dwogo pa Nangila. Ikare ma ki tiyo ki yat Acholi meno, Won Nangila ocang maber kun cung dok woto. Dano ducu me caro meno gumyelo dok bene gupako Nangila matek.