Jio ôbô namiji anna anya ꞌtô fôdôfôdô, ônnô owoni ayyanii maŋahien hosi iko atanata hunno onioi ahîdê, amany nyia lôbô leto diyya alla anya Oyyaha.

Omuno nyia Oyyaha etoŋotio îwô maŋa annittokon hinyia owon ꞌtô îgêr haŋ hosi. Omuno nyia inyi êŋîŋîala hêny hunne îddarrataî ꞌtô îtanata manga diyya.

Tô ôbô ôtôrîaî, hinyia itoŋo Oyyaha imaji honyi ônnô omunotio inyi toloŋi, igonyu nyia inyi ôlôhûrrak. Ihûm nyia inyi igonyutta ôlôhûrrak alîa jio ahêny hunno ômûk ꞌdaŋ.

Amijio Oyyaha ôlôhûrrak alîa îdafuhio ewwa honyi buo amala bêbê îgêr nôbô atôbôk ênnê îmaruak ꞌtô. Osô nyia ôlôhûrrak alîa ihuo êllê ibuoto!

Aŋêr Oyyaha diyya êttê igonyuna ômûk larî kai owoni itua tôbôk diyya. Awak ôlôhûrrak alîa îmat aarî hûnîa, buo êêtûk honyi obeŋ ottiru aarî hûa.

"Ayyayyayya! amehino ôlôhûrrak ôlô. Ellê îkîana duo ôlôhûrrak ôlô, êttê duo nî iluak inyi!" Ajio Oyyaha.

Itayîgoŋ ôlôhûrrak alîa ahou honyi ihuo êllê îtayîrû êkîana Oyyaha anîa. Attatî ômûk asayyo ayyijok ifuanna!

Amûhû ôlôhûrrak alîa ôbô lamoruo ôllô odiha êttê îtadohina itua tôbôk diyya.

Cakollok! Itayîrû Oyyaha adotia amoruoi hûnîa itua tôbôk. Attatî ebotie moruo, cakollok! inyiak fê!

Amijio fê Oyyaha ôlôhûrrak alîa dêê. "Abala atî ôlôhûrrak alîa ôbô abala honyi?" Ittayata nyia inyi. Attatî inyi igonyuna ôbô narîŋ ihuo alilaî!

Ifûfûtû aarî anîa! Hodulo nyia ôlôhûrrak alîa erruoŋottia amoruoi itua tôbôk diyya ababô. Gaa diyya, îfûtû aarî anîa îtôbôk belettee.

"ꞌtattattatta! ôgêny duadi ôlôhûrrak ôlô!" Ifufuohi Oyyaha ahas honyi buo omuno.

Isûbak ôlôhûrrak êêtûk honyi itua tôbôk êttê îmat aarî. "Hôrrrrak! hôrrrak!" amalak inyi buo omuno.

"Ohûrrak! îgêny iyye bêbê." ajio Oyyaha buo osuhotio.

Ojio teyya, attu ôrrîahata Oyyaha, Imana. "Oyyaha nyio îkîana iyye jio ôlôhûrrak alîa?" îfî Imana.

"Attênû ôlôhûrrak alîa êgôlô hîrrê ta ahûan honyi hama!" Itarraŋak Oyyaha. Amijio Imana buo ôlôhûrrak alîa amata aarî tô tûa tôbôk.

"Attênû atî ôlôhûrrak alîa amatûna harî tô tua tôbôk?" Oyyu anîa bêbê!" Ajio Imana.

Ittanîŋak Oyyaha ahou iruhori buo osuhotio êttê ijiaran, "Ogêny ôlôhûrrak alîa."

Hinyia îddarra ôlôhûrrak lîa, attatî Oyyaha iyyito ajio Imana.

Ettê ijiaran, "Ettiyenu nî ôbô arîŋ kai ahana, Imana. Awak egigilotio êkôta hunne eremik îhûhûmaniere êrrê hunno ogoli ꞌtô."

"Obîs êkîana hôî anîa, Oyyaha!" Ajio Imana.

"Alla agêny ôlôhûrrak alîa ihuania, eremik îgênyan bêbê êgalîk inyi. Owoni nêrrê ꞌdaŋ iko êkôta êhûhûmîta hosi hunne eremik ittifieuna," ajio Oyyaha.

Attatî arrîahat hûnîa arrîhaî ifuatan îhaŋ.

Te ebotie hôlôŋ, illolloŋuni isi ôrrîahat hosi êttê îramana isi ôfîôrô lôhûrrak hunno oyyiji ꞌtô hûnîa.

Attatî aduri hunno ômûk hûnîa ififuohina ahas hosi. Ikîanaî nyia isi jio aŋaî ꞌtadî eremik isi îgîamarî ôfîôrô hunno oyyiji ꞌtô îhûhûmaniere êrrê duri hunne ittigemie ꞌtô isi.