Tô ninyia berien, owon nyia nôbô amaruani ŋôttê anna amanya ꞌtô hama.

Abara nyia inyi ahohoroi arriaî. Jio ahohoroi honyi hûnîa, owon nyia lôbô abusuk hôhôrô êllê îmarûak ꞌtô bêbê jihosi buo fê obeŋ ilohita.

Tô ôbô nôlôŋ, attu nyia lonyio ŋarri aŋôttê anîa îfûanyarû inyi. Omuno nyia inyi attuna eto alîa bêbê.

Ajio ijiara eto alîa înêfû abusuk hôhôrô êllê îmaruak ꞌtô alîa ôŋîda inyi alô ifuohina jihonyi.

Itayîrû ahôhôrô alîa êkîana aŋôttê anîa iko lonyio ŋarrî, êttê ataji honyi ijiaran ritik. Ajio ahôhôrô alîa jio aŋôttê nîa, "Aiii, îmaruak buo fê iyye bêbê, atî abêŋ nî êtayîrû ôbô atulo ojio ijiara ottohori iyye, emijio adî!"

Anîa, attatî ahôhôrô alîa îlûny, êttê îlêtên jio ôbô abôrê-gala ennittokon jio ôŋîda inyi alô idolo diyya. Alô buo îbûrûna agurre tê ihiji-îkôî.

"Nanyio ôrrôhô?" Ifî agurre. "Awak ahênyê hoŋ îttôhôrô nanî ta abîaŋan hoŋ ilohita alla attûba asaa," ajio ahôhôrô. "Alô nî îbôrê-gala idolori diyya. Ilo iyye ajia?" Ajio ahôhôrô.

"Awak amônyê hoŋ îttôhôrô nanî ta abîaŋan hoŋ înêfûtta adîôrô. Afuhoruno nî," ajio agurre. "Efuo ꞌdaŋ?" Ifî agurre. Ajio ahôhôrô, "Aafê, efuo arabotie!"

Hadahûnî isi kai, êttê igonyuna eŋok oŋeru fîr-fîr. Iloŋ ahôhôrô inyi êttê îfî inyi jio nyio oŋettio inyi bêbê. "Ifûha anî amônyê hoŋ nyio abeŋ nî enyiak înêfûtta ahahalak," Itarraŋak eŋok buo ôyîrîta hêû-hêû.

"Ibuoŋ duadî êram anîa. Efuo hôhôî îbôrê-gala ennittokon idolori diyya," ajio hôhôrô. "Ijiara nanî êjîrarû îtaî?" Ifî eŋok.

Afuoi isi ꞌdaŋ hunihoi, êttê akûsan îtawôj isi attatê îfî, nyio? "Awahî amonyie hôhôî îttôhôrô hôhôî ta abîaŋa hôhôî inyiak îgîama êgêmîta hosi," îtaruaŋi êtarraŋana.

"Ara êram hoŋ ihuo anataî, ifuatta îtaî ajia?" Ifî akûsan. "Efuo hôhôî îbôrê-gala idolori diyya." îtarraŋanî isi. Ifî akusan jio ijiara inyi êjîfarû isi, êttê isi iruk.

Adaharaî nyia isi many iriaharî attarî. Attatî isi igonyuna ôbô naaji. Itayîrûnî nyia isi eŋuŋunita itua haji diyya. Abaŋî, attatî isi idol ôbô nafure ôŋîda aatî hia ofuhoi tô tua haji.

Awotia akûsan îfaû, adak eŋok ihoruoŋ kûsan, buo agurre ihoruoŋ hiŋok, attatî ahôhôrô îdahîna ihoruoŋ gurre.

Attatî isi îsôyô edolo. "Kokoliokook," idol amaruani hôhôrô. "Mîawû, mîawû," idol agurre. "Guok, guok," idol eŋok. "Wuuuu, wuuuu, brrrrr," idol akûsan.

Itaruaŋi nyia isi afuretia hosi hûa ꞌdaŋ ônnô okuat arabotie. Ahahalak nyiadî hunyia owoni ꞌtô hia itua haji diyya. Abaŋî ahahalak hia, êttê iruat.

Attatî ahôhôrô alîa iko eŋok, attatî akûsan, ojio agurre ijiŋana itua haji êttê ifuatan îrûmana aŋiria diyya. Hinyia attohuni isi aŋiyo, êttê ifuatan iferioro.

Oferio nyia ahôhôrô îgêr îkat haji, êttê agurre îjîfana, attatî eŋok, buo akûsan ara ecuŋi.

Ojio gaa diyya, acohunie ahahalak hia. Ellettok hosi nyia ikiem ajiŋana itua haji.

Haŋa inyi ihuania êkat haji, êttê ahôhôrô îkûb inyi. Attatî buo fê agurre îkôrrôhôny inyi ta afiala honyi. Attatî buo inyi îrûmana eŋok, êttê eŋok îhôny inyi.

Allûa atulo alîa ahîdê attûa haji. Attatî buo inyi lêttên îrûmana akûsan, attatî akûsan îdêŋ inyi many ôyêrî.

Obeŋi nyia ahahalak hullo ômûk ojiŋanî itua haji. Attatî isi iruat tulaŋ.

Anîa, amanyaî aciaŋi hûnîa jio aaji anîa ta amuno. Ilohita ahôhôrô ôŋîda aciaŋi hunno ômûk ômîjanî asaa, buo eŋok êttê îrrîrrîa isi.

Attaho agurre adîôrô ꞌdaŋ tô tua haji, buo akûsan êttê înafatta isi ihoruoŋ honyi alla awahî isi ifuatan ôbô amaji.