Môŋ, nanî Illîcê. Ara nî ahito ŋôttê ihuo aduri ꞌdaŋ hunno ômûk, atî owon eenyiaŋ itua hûan hoŋ.

Ibeŋ iyye iremik igonyuna inyi, atî amîjak nî jio owon inyi itua hûan hoŋ. Anya afure honyi Omudut. Idîma inyi itua hûan hoŋ buo obeŋ baka îhanio nôbô narîŋ jio ôrrîahat hoŋ.

Obeŋ inyi oremik ijiŋuna tô tua hûan hoŋ êttê ijiŋana itua hûan hôî êllê itoŋo iyye îgêr hoŋ, kuyya buo fê êllê îttôŋ iyye aanî hoŋ.

Obeŋ inyi oremik ijiŋuna tô tua hûan hoŋ êttê îllûhina itua hûan hôî êllê eŋiyo iyye ikoŋ tô siak abotie, kuyya buo fê êllê eferio arabotie.

Isiunierek nanî eenyaŋ anna anya ꞌtô anîa Omudut. Omuno aŋiyo monyomiji hulle îfayêî ꞌtô ahûan hoŋ tô huru-ahuanyak ôŋîda nanî abeŋ aŋuaî.

Alla atuk monyomiji hulia, êttê nî iŋuaî. Ojio teyya êttê nî îbîaŋan alô isukul buo fê abeŋ abala iko ôrrîahat hoŋ.

Awak amatatio nî ayyanii hoŋ oŋitek ꞌdaŋ jio asaa ottoloŋi. Alla abeŋ nî êhan ihuonyia, êttê eenyiaŋ alîa îdîôtô êllê îŋêrê êttê iŋiyo monyomiji hûan hoŋ inyiak.

Abeŋ nî awak ijiara inyi oŋiyo monyomiji hoŋ, inyi ênnê etiyiutta nî hahanyi hoŋ ôŋîda isorio nanî ayyanî hoŋ alla attûba asaa.

Alla aŋiyo nî aŋiriasin hunno oyyiji ꞌtô, ihuo ajasio egaraa iko aŋahî, êttê monyomiji hûan hoŋ îgôlôn, attatî buo isi îmîr eenyiaŋ alîa.

Egigilo nî oferetetio eenyiaŋ hoŋ alîa, inyi anna agolitatio nî buo fê aremik îbala iko ôrrîahat hoŋ. Amunotio nî bêbê alla alô inyi iferioro buo fê nî êttê îbala iko ôrrîahat hoŋ.

Hêtêk nyia hahanyi hoŋ îyarû nanî jio Akîm, êttê Akîm isiarana inyi lôbô larîŋ ôllô oyyu ꞌtô bêbê jio ôŋîda inyi ôlô îtalimottia jio eenyiaŋ alîa. Itajocio arîŋ lîa eenyiaŋ alîa, buo fê êttê îbîaŋan oŋiyo monyomiji hûan hoŋ.

Alla ajôtôrî eenyiaŋ alîa êttê îgîama êgêmîta haŋ buo fê nî êttê îbala ihuo aduri hunno ômûk, ihuo aŋettion, adôhîtta iko ahîa.

Amuno nî hahanyi hoŋ bêbê. Ilîk atua honyi buo fê anyalam. Isiorio inyi jihoŋ aŋiriasin hunno oyyiji ꞌtô buo fê ittittohi jio ijiara nanî afônîhîtta adilo fitamen hoŋ iko ayyanii hunne îtagilie ꞌtô monyomiji hûan hoŋ ôŋîda nanî abeŋ aŋuaî.

Alla aŋuaî nî buo hahanyi hoŋ êttê îyarû nanî jio Akîm teyya-teyya, ôŋîda ofuoi isiarana nanî ayyani ênnê îtaŋîda ꞌtô nanî. Amuno nî bêbê êllê îbûŋak hahanyi hoŋ nanî attatî ihenio abuk ônô êyabîta hibokuo habeŋ nî alô iferioro.

Ellê îtaferik hahanyi hoŋ nanî, êttê nî igigilo nêrrê arriaî. Egigilo nî jio awak nî îhîana isukul annittokon. Alla adulo nî amata ayyani hoŋ êllê îtajocio ꞌtô eenyiaŋ alîa, êttê nî ittuna iluahio hahanyi hoŋ buo fê attu îhîanatta jihonyi êyêbîta hibokuo alla attu inyi îmaruak bêbê buo fê alla abeŋi oŋite honyi ofuonni imijio ônnô oyyu.

Alla attu nî ibolori, attu nî îhîana. Awak nî iluak aatî hullo ottifiaî ꞌtô ehuhumio ꞌyani ônnô oremik ꞌtô îtajôtôrô eenyiaŋi ꞌdaŋ hutto hûattêk watî ꞌtulaŋ.

Alô nî îtamohina ahûan hoŋ îmanyarî iko eenyiaŋ hoŋ alîa buo fê êtajocio inyi ga-ga-ga.

Awak buo fê nî îrrêhûna ôrrîahat arriaî. Buo fê abala bêbê oŋitek ꞌdaŋ.

Omuno nanî hahanyi hoŋ, iyanyi hoŋ, iko imanyi hoŋ, buo fê ôrrîahat hoŋ omunoi nanî, awon duo bu nî iko eenyiaŋ alla anya ꞌtô ôlô Omudut in tua hûan hoŋ.