Ababalarû nyia Oŋie ittifiarî aŋiria. Aruaŋanie iko êlîŋît Tômê ninyia iwwohuno ꞌtô eesio ihulo.

Ifî Tômê, "Itîlîha atua, iko anafak anî. Aniemuno nî."

Adak Oŋie ihoruoŋ Tômê êttê îttôŋ jio ꞌtîd-ꞌtîd. Anafarû Tômê Oŋie.

Attatî itterio aŋiyo eesio Tômê teyya-teyya!

Itterio eesio adohitta ihoruoŋ Tômê.

Ellê fî fê Tômê jio nanyio ônnô odotia ꞌtô anîa, buo Oŋie ojio odotia ôôtô tô tôŋôsa honyi.

Afanyî nyia isi jio nôbô atua ôwôrê êttê îrûmana attumen hasuani amata aarî.

Awak nyia Oŋie îmîjana ŋaî ôgôl, Tômê kuyya Hasuani.

Itterie nyia Tômê iko Hasuani olorisa anîa.

Ojio Tômê inyi agôl buo fê Hasuani ojio inyi agôl.

Attatî Oŋie ijiaran awon inyi iko ôfîôrô îmijaniere ŋaî ôgôl.

Ajio ijiara Tômê iko Hasuani îtîlaî inyi diyya.

Acohuno Oŋie iko ofito ônnô ôhôdô ꞌtô.

Attatî îfîtana ebotie ŋati hofito ihuluk Tômê êttê irihoro inyi addi tô hûtûk ôwôrê.

Ifîtak Oŋie ebotie ŋati hofito ihuluk Hasuani êttê idehina inyi îgêr hûtûk ôwôrê diyya.

Aŋêr Oŋie êttê lêtên îdîma îhîdê ꞌyani.

Attatî ijiaran woŋ-woŋ, "Attûba! abotie, arrîhaî, hunihoi! Ipihoto!"

Ipihonie Tômê iko Hasuani ahûattêk.

Ipik Tômê Hasuani.

Buo fê Hasuani ipik Tômê.

Abeŋ nyia ôbô ipihu ôbô.

Adulo nyia Oŋie aŋiyo eesio Tômê îdîmî honyi diyya.

Hinyia atuk inyi eesio nyia, êttê iŋut ofito nyia tê îgêr Hasuani.

Attatî Tômê îbatarû êttê iko ꞌdaŋ isiak ayyani.

Alô Oŋie jio Hasuani êttê îtahabuyo inyi, jio inyi ônnô ôgôl ꞌtô.