Mandu dan be ndako, nnagi to ndagi ùzhi. Wun yi be bishe, wuryagi, kingbagba to kputsun nyi.

Bishe gun ega ò. Wuryagi, kingbagba to kputsun ma a papa ba shampa kapa ò. Ndako ùzhi yi kagbo de re. Nnagi be ndagizhi ga è lotunzhi ò.

Eyazhi de tadayé degi nana à zheban. Ndako Manduzhi à tufo hari na wun è wógan be le eba yé wangi be à na.

Nnagi ù ma à wobà wun ta èmì dzu wo be à.

Ndagi ù ma ele ga wun è le kandoro ò wun è la nyagicizhi ya nyakungizhi be à.

Nyakungizhi ga è la gán egunkpo ebona madan è gun à.

Èmì ga ke à she be shikan ebona nnagi deba ta ù dzu à.

Ebo ma dan be Mandu kandondo nyi. Wunga tinya ga wun è da è wa nyagici be ya à kpátá ò.

Mandu ma wunyagbanwo be à be enya na lonyi na à. Wunci gbin ndakozhi gan kemina wun à jinjin na. Wun mafi ù na ndakozhi shitukpa egan wun à.

Nnagi ù na woma à na ci gan, "gwako enya na mi è wa ga yi mi lele wó yeshi tinba."

Ndagi ù kafunci ci gan, "a nyakungizhi ga kún wo ci ò shi nyagici ya ndako wozhi. A ci à lele a gán wo sun à.

Mandu zhewun. Wunci gan, "Ndagi, wo kpe wo ke mi à kún nyakungi nanazhi wo à. Enya na be de ke na ga dan ò na ò.

Yeshi ndoci Mandu à santu. Wun fe pa egan nusa na a kpayetu gan wun de cigbe èzòzhi ndondo.

Mandu fe ku nyakungi ùzhi ci lo eba nda nusa wuncin. Wunci à egban ma ta eti wurya, kingbagba be kpútsun ò ci la bishe.

Mandu tun èmì nda nusa tun be bubo to madan è.

Bacina wun ta èzò ya nda nusa zo na, nda nusa ci gan,
"Mi à ba wo jinre ama wo à jin kemina mi gan wo na."

Mandu ci zhe ù, "Mi à jin enyandoro na la èzò mi keyabo na.

Nda nusa ci gan, "a nyakungizhi ya babo wo fe lo èmì."

Mandu ci gan, "ama mi dan be nyakungi mizhi na jinfo. Enya na mi de kawonyi na ga dan ò na ò."

Nda nusa gan, "mi à gan wo gan mi à ba wo jinre ama wo à jin enya na mi gan wo na."

Mandu è wa cigbe ya èzò ù. Wun fe lu nyakungi ùzhi gwa ci lo èmì.

Èmì ù wun à zhe sanyi be vunla è. Ezandondo à sayé nyakungizhi. Ndako Mandu fe gyitin cinbo à ebona e de nwanwa wurya din be à.

Ndagi ù ma gan. "yajinci yi yi ò, zandondo ma è ma yi tsan."

Mandu go botán èzò nanazhi wo be à. Bacina, wun ke sayé nyakungi ùzhi na.

Wun ke à kezhe da eba nda nusa gangba wazhi. "Yizhele mi kperi banbe nyakungi mizhi nbo nyi. To yegi mizhi à sayé à saranyi."

Nda nusa ci gan, "mi à ba wo jinre ama wo ga emitu enya na mi gan wo na. Kezhe da èmì wo la ndako wozhi la tinya nbo ò."

Mandu ci gan, "Ke mi à jin acin jin na ò? A ga yi ndako mi nyi ò mi ga ma è yakpe ò."

Ezoba ù ma, Mandu da èmì ci da jin enya na tun ù na. nyagban ù ma fa à.

Ndako ùzhi de ebandoro à lo à. A de fe ceka za, a fe jin karanyi na a ga gunke enyazhi ma. A fe wó yipa yigidi nyi yèkò yeshí nyi.

Gunci Nnagi ù ma ci tilali, "ga nyá mi tinya ma!'

Kafunci Ndagi ù ci tilali, "ga nyá tò mitso tinya ma!"

Mandu gowo be à. Wunci ke da eba nda nusa be Zhizhi be ewunzhe nyi.

Wunci tilali ci gan, "Nana gángán ya zeni. Mi wa cigbe na ge gán na."

Nda nusa ci gan, "woya, go nyaklungi òzhi lo èmì, be a ndako òzhi lazhin èmì ma."

Mandu fe jin acin kemina a gan ù na. Nnagi ù ci à gan, "mi ga èmì tadzu."

Ndagi ù ma kafuncibo lugwa wunci ba Mandu etunzhi lo re. A ci fe manin ganin be.