Tô ôbô amanyaî nyia aciaŋi ꞌdaŋ arabotie buo fê ôrrîahaî.

Tô ôbô nôlôŋ, awahî nyia isi inyimuna oobu hosi.

Awak nyia abusuk hôhôrô îrahan ahobu. Attatî inyi înyîôb aciaŋi hunno ômûk.

Iramak jihosi jio, "Ara asihet ôttô hîdê hou hoŋ anîa ahîma! Hettiroto asihet hoŋ anîa!"

Iruhi nyia naciaŋ hûnîa êram honyi anîa. Attatî isi inyimuna ahôhôrô alîa ahobu hosi.

Igigiloi nyia isi ꞌdaŋ jio ôlô asihet anîa îfaûna isi tô côrô, êllê îhacôrô ôlôŋ lîa.

Tô ôbô nôlôŋ, attatî nahîdê îsayô êdô.

Ihacarô nyia bêbê. Afuji nyia nêrrê ꞌdaŋ tô faû buo fê îhacôrôjî.

"Efuo ꞌtadî îrûmana êêma ajia ôŋîda êsûjarî?" Ifî etojo aciaŋi hunno ômûk.

"Eremik îrûmana êêma tô hîdê hou Hôhôrô. Ara Hôhôrô ahobu hôhôî nyio owon inyi iko êêma îhîdê hou," Ajio aŋidony.

Iruhi nyia aciaŋi ꞌdaŋ êram aŋidony anîa.

Attatî isi îfahîna ôlôbêyôk jio ôŋîda ôlô isuahuno êêma tô hou hobu Hôhôrô.

Alô ôlôbêyôk anîa îrûmana Hôhôrô înnînnîharû iko aajô.

Attatî inyi îwahan isuahuna nêêma tô hou Hôhôrô buo Hôhôrô oferio.

Aharanyû ôlôbêyôk amîyaŋ ônnô ôyôhô ꞌtô. Attatî inyi îgûmana isihet Hôhôrô.

Abeŋ amîyaŋ honyi nyia owwulo.

"Ottê hobu, Hôhôrô!" Ikikorita ôlôbêyôk jio Hôhôrô. "Ewak hôhôî êêma."

Atî obeŋ nyia nôbô nêêma ênnê isiarak Hôhôrô jio Obeyok.

Ilôŋôjîta Obêyôk bêbê bêbê.

Acaharû Obêyôk jio aciaŋi hunno ômûk. Attatî îramana isi ahôdê-hôdê hîram sihet Hôhôrô.

Many jio nôlôŋ lîa, abeŋi aciaŋ inyiahi îbaŋî Hôhôrô. Buo olobeyohi êttê înîafatio ahohoroi.