Dangi be Èshìgi a yi èyà wangi.

A ci à kpa gan a nyi à lo eba èyà à, Bishengi wun ga è zheya na.

Bazuma ndoci ga bo Bishengi dan ò. Wun la Dangi be Èshìgi efo gubà ci tun bo.

Enasa Dangi be Èshìgi à kperi be dozhi.

Èshìgi yebo nyagici gi be elele be to enasa sakpa kandocizhi nyi.

Dangi de egun, twarya be kpétso wó ya na ù yi ò.

A gun dana Èshìgi ò ce kpaye ezhilo à.

"Mi à ka nyagici labé efo caba nyi ò," Èshìgi kunshe.

"Mi à la nyá efobàci be nyi ò," Dangi gan.

A ci à enyandondo ka cici ebo a ga batàn ma.

"Wun à mafi yi na Bisengi be tsun yi tsòtsò na. Wun à jinfo na yi le eya yi yé na," Èshìgi gan na wun è yí Dangi lo èmì na.'

"Kubetun nyi na wo yí mi zhin èmì na," Dangi gan Èshìgi.

A ci dada à gún yeli na a ca ezan à na.

A ci kóní be enyànyà na è lonyi na.

Da eka fyagi nyi, a fa yita cigbanko ò. "Madan è gun mi! Yi la nyagici gi," Dangi gan.

Èshìgi fe kpányi la nyagici fi evo gubà ò. Nyagici ga ma fe de-mígi nyi be gbànàgi nyi.

Dangi ci gbingan, "nyagici nana ga wo bé be nyi ya yi nyi ò?"

Dangi à zhewun ebona èyà ù bé be nyagici kemina à gan na à. Wunci gi nyagici Èshìgi à.

"Ki we ka ò?" Èshìgi gbingan. Wun èduwan na Dangi ga etingyin lugwa ci ginya na.

Be ewunzhe, Dangi ci gan, "Kila wo ci bé be nyagici na wo gbogi yebo na ò?"

Èshìgi ma fe ginya tsogwa hari evo à fan ù gwa. Nyagici Èshìgi ci à miya zhi kin bo kpátá.

"Ga fushigban ma eya mi," Dangi gan.

Dangi fe wa nyagici tinya. Wun fe ca ù nyi gi.

Eshigi cin nyagici Dangi le be éyé-egwatan è.

Dangi gi ù zo na, wun fe ku évó ù ci à gan Eshigi, "yi ga kuta be ezan yi nyi à?

A gangan be dozhi be à na è lo na. Gbako Eshigi ma fe kudu madangun.

Be lozun nyi, Dangi ke à gi funin. Wun fe lo da leci be nyagbanfa na wun be be nyagici gamma.

Eshigi ma lele be madan è.

Ebatin na, Dangi à nyagici lazhin degi to ya eti ù. Eshigi wa éyé ù wo nyagici Dangi bo à.

Dangi fe to nyagici gun Eshigi.

Eshigi gan, "fa be mi nyi, mi à gán eti mi wa."

Dangi zhe ù gan, "yi be yi gi ganni."

A fe fedun ci à gi.

Na a fe loye na, a zhe èyà be!

A dada tun èmì Bishengi.

"ke ezan ye jin na ò èyà mizhi?" Bishengi gbingan.

Fe yima bedozhi, Dangi be Eshigi zhegan, "gán ge."

Wun à fe shani efomima wonciko.

A gi, koni be enyanya è!