Me ujọn̄ọ mgbọ òraraka, mun̄ îta me ere ebi kè anam oron ekiluk.

Ema mîweek me ere geelek, kpemun̄ mun̄ geege.

Ema etititiin̄ inyi eweek oniin̄ ebesa irọ ufialek kiban̄ ita. Otutuuk anam mînu ntitiin̄ ya ilọ me lek kè ibo oron afa.

Ibo oron afa ìkitumu ibe, "M̀bajeje igọọk inin̄ ntitiin̄ ge mèlek kè ikwut òdun̄u olu lek?"

Me emen ntitiin̄ ya, ebi kè anam cha mîgbaan̄ ichieek ibe erọkọ udọn̄ mun̄.

Ogaan̄ obebe, "Udọn̄ mun̄ kiji môdọk mè iwele. Mun̄ isisibi ijot, eji kpebeyaka ikaan̄ ufialek mun̄ itata."

Ema ekekikọt okwa mè ikijop mè ikirọkọ udọn̄ mun̄ ya me ene me ene; ogwu irọkọ, ufi ene orọkọ.

Ike ekirọkọ, mun̄ ogbugbuk isibi me irak ijọn̄ mè ijot emen udọn̄ mun̄ ya.

Ema mîbele ejit enenen. Ema kperarak ichak otu me lek ojelek mun̄ òtotop mè ikisiki ene lek ikeya.

Usen ge, ema enenimun̄ ibe ke îkaan̄ ogwu òkinigwọk ugwọk me emen mun̄ ya mè ikirọ mun̄ ya ibat.

Ema echeche lek kiban̄ itap me esese esese mgbọ isa ikibem udọn̄ mun̄ ya.

Ikpi obia okup me ikwaan̄ ibebem mun̄. Ibo oron afa onunu mèlek olik ogolofiayi kan̄.

Ibo oron afa ododo ikpi obia ibe, "Òkirọ keke me ere keyi?"

Ikpi obia ofọfọọk ibe, "Ǹkibem mun̄ kiji."

Ibo oron afa obebe ikpi obia inu mè ema egbaan̄ efit ifit.

Ifit ya ìre ke mêbọp ene ge ikam. Ogwugwa mônenichit chieen̄ mè ifuk bene me ge ire lek obop.

Ikpi obia ochechieek ififit ifit ya.

Ibo oron afa obọbọp ikpi obia ikam. Ichichit chieen̄ mè ibene ikifuk ifuk.

Ibo oron afa osisi inwọ mun̄ me udọn̄ mun̄ ya mè igwọk ugwọk.

Ibo oron afa irọrọ echa isan̄a, ichichibi mun̄ isa ikaan̄ me ubọk ije ifo. Ikpi obia òkifuk ifuk ya inyi isi.

Ikpi obia ofufuk ifuk ya isan̄a mè ichili chieen̄.

Ìkayaka ìmun̄ ibo oron afa.

Ikpi obia otatap ukpo mè ebi kè anam kechilọ enetọn̄ọ ọmọ.

Otutuuk anam me ene me ene mîmọnọ esese esese mgbọ isa inikibem udọn̄ mun̄ ya, ire, kpunu geege me lek kiban̄ òkọkọt itet ibo oron afa.

Ikwut obebe, "Tele emi m̀bem." Ininin̄ emen udọn̄ mun̄ ya mè inim isi ikup me irak mun̄ iban ibo oron afa.

Mgbọ ibo oron afa onube, ikekikeek me ejit kan̄ ibe, "Kpunu ene geege me ere yi!" Ibebene ikinwọ mun̄. Inọnọ inu ge olombe ọmọ me lek alọm mè itaba ọmọ isa inin̄ irak mun̄!

Ebi kè anam kechilọ eliliin̄ inu mgbọ ema enọbe ibo oron afa okito ito mè ikisut lek me mun̄.

Ebi kè anam cha ebọbọp ibo oron afa ikam.

Ikwut otutumu inyi ibo oron afa ibe, "Owu òrọ otutuuk kiji ilọ. Mênyi owu osusut." Ebi kè anam cha etọtọn̄ ikwut ibe ke îre ogwu isi kiban̄.

Karake usen ya, ema mînwọọn̄ inwọnwọ mun̄ òtatana me inu geege ikasisaakge ema ugwem.