Mandu ìluk mèlek nga nga mè nte nte, ngwan̄ ogwu ute mè ngwan̄ ogwu uga ge. Ọmọ îkaain̄ uman unọn ge, ebot ge, arọọn̄ ge mè okodi ge.

Uman unọn ya ìkikup me emen uwu olik okwukwut ekisa itap ofut. Etobo ebot, arọọn̄ mè okodi me agbalek uwu. Lek nga nga mè nte nte kan̄ înye. Ngwan̄ ogwu ute mè ngwan̄ ogwu uga ekitap ubọk inyi ọmọ me lek ikwaan̄.

Acha inen mè inen iraraka, inu chi onwenwene. Nga nga mè nte nte kè Mandu mîkan ire lek kpeyaka ikinọ ikọ mè ìre imun̄ inu ijaan̄.

Lek ngwan̄ nte kan enenwaan̄ ìkanye. Eya orọ, ìkayaka ìkọt ìkirọ uwu itana.

Ngwan̄ nte kan enerieen̄ ìkilalaak mgbọ geelek, ìkatap ubọk me inyinyi anam inorie.

Anam cha mîkitap okput enenen mije uraafiọọn̄.

Uwu kiban̄ îbat enenen mije ngwan̄ ogwu uga enenwaan̄ ìkarọ mè itana.

Lek ìkiwọwọ Mandu mgbọ geelek. Usen geelek, ìkisisibi isi iweek inorie inyi otutuuk kiban̄.

Mandu ìkayaka ìkọt ìbeme inu ya ìgak eya. Idodo nga nga mè nte nte kan̄ ike ọmọ oborọ. Ejit ìkatop ọmọ mije nga nga me nte nte kan̄ kpenọ inu îkitumu.

Ngwan̄ nte kan̄ ogwu lek ikanyege obebe, "otutuuk inu nkiweek ìre ikọkọt ilaak me eririeen̄ mè inan̄a ikeke me ewelegwe."

Ngwan̄ nga kan̄ enerieen̄ ogwu ugbek obebe, "Nyam otutuuk anam cha mè lep inorie nyi nga nga me nte nte kwun̄. Ema mêlaak, kpebeyaka isisaak owu.


Ejit înaan̄ Mandu. Ibebe, "Ngwan̄ nga n̄a, owu oriọọn ibe ke emi m̀kpakọt inyam anam chi. Ema gaalek ere inu ubọọn̄ nkaan̄be."

Eririeen̄ ge Mandu okpọkpọ inyana ikeya me inyọn̄ mkpilaak, ilaak ìkanin̄ ọmọ chieen̄. Inenikeek ogwu enerieen̄ òriọọn̄ inu ge, ogwu ekichieek ibe ke îriọọn̄ ubọk ekirọ ufialek geelek ita.

Mandu osasa anam cha kan̄ igbaalek ije isi ere ogwu enerieen̄ òriọọn̄ inu ya. Ìtap olik me ebek ebot, arọọn̄ mè okodi ya, mè iben uman unọn ya ikaan̄ me ubọk.

Mgbọ Mandu orebe uwu ogwu enerieen̄ oriọọn̄ inu ya, uraafiọọn̄ îtaka, lek owọwọ.

Mgbọ îkpabe ufialek kan̄ isan̄a inyi ogwu enerieen̄ òriọọn̄ inu ya, ogwu òriọọn̄ inu ya obebe, "Mâtap ubọk inyi owu, ire, owu òkaan̄ irọrọ ike ntumu inyi owu."

Mandu ofọfọọk ibe, "Mârọ inu geelek inyi ufialek n̄a ita."

Ogwu enerieen̄ òriọọn̄ inu ya obebe, "Tele anam kwun̄ chi me ere yi mè fo uwu kwun̄."

Mandu obebe, "Nsa anam chi iluk karake ujọn̄ọ mgbọ. Ema ere otutuuk inu ubọọn̄ nkaan̄be."

Ogwu enerieen̄ òriọọn̄ inu ya obebe, "Ntumu inyi owu ibe ke mâtap ubọk inyi owu, ire, ke owu òkaan̄ irọrọ ike ntumube inyi owu."

Mandu ìkiweek mè ufialek kan̄ ita. Itetele anam cha mè ifo kan̄.

Uwu kan̄ ìnọnọọn̄ mè ilaak ukpọk. Îlọk otutuuk kiban̄ imumun̄ lek anam cha. Nga nga me nte nte kè Mandu enununuun̄ mije kpeyaka ikaan̄ mun̄ ebe ònan̄a me lek ebot ìnwọ.

Ngwan̄ nga kan̄ ogwuenerieen̄ obebe, "Eji mîgbọọn̄ enenen, otutuuk ene ekichachak eji."

Mandu ìkayaka ìkot ìme nuunuun̄ cha. Ọmọ si, îlọk ọmọ imumun̄ anam kan̄.

Igwugwu ikom isi lek ogwu enerieen̄ òriọọn̄ inu ya isisi ido nteme. "Ugwuem mikup esese eyi anam n̄a ikayakage ìkup me uwu n̄a. Ebi ulọk n̄a mîkaan̄ ulọk imumun̄ anam cha enenen.

Ogwu enerieen̄ òriọọn̄ inu ya otutumu ibe, "Mâtap ubọk inyi owu,ire, owu òkaan̄ irọrọ ike ntumu ibe owu òrọ. Fo uwu mè si ben nga nga mè nte nte kwun̄ sibi me uwu ya."

Mandu obebe, "M̀bajeje irọ eya? Ema ere nga nga mè nte nte n̄a. Ema ekikpọ emi chieen̄ me isi."

Me òta, Mandu osisi uwu mè iro ubọk etumube inyi ọmọ. Ìkakaan̄ esuuk geege me ejit.

Nga nga me nte nte kan̄  kpekaan̄ ere geege ema ebesi. Ema ekekititeek ikana ere, mè ikigbala chieen̄ inyi ema ekaje ìsi ìtọbọ me lek inu geege. Ema ekekinọ uyok eyi ikarek mè utọọk eyi eririeen̄.

Ngwan̄ nte kan̄ enenwaan̄ ogwu lek ikanyege ototo ibe "Kalap emi ìto me oyet!"

Ngwan̄ nga kan̄ enerieen̄ ogwu ugbek ya ototo ibe "Kalap emi si ìto me oyet!"

Mandu ìkayaka ìkot ìme. Isisi uwu ogwu enerieen̄ òriọọn̄ inu ya, ifuk-ibot îwuwọlọ ọmọ, ejit înaan̄ si.

Itoto ibe, "Inu chi îmin igak ene ge. Teme emi ofifi oniin̄ ònwọnwọn igak eyi."

Ogwu enerieen̄ òriọọn̄ inu ya obebe, "Kpọ anam kwun̄ ire echi. Kpulu sa fo mè si sa nga nga kwun̄ mè nte nte kwun̄ ka uwu."

Mandu orọrọ ike etemebe ọmọ. Ngwan̄ nte kan̄ ogwu enenwaan̄ ya obebe, "Mâkirọ uwu itana."

Ngwan̄ nga kan̄ enerieen̄ otetele irere ugbek mè ikitap ubọk inyi Mandu me ikwaan̄. Ema otutuuk eyayaka inikiluk me unwọọn̄.