Usen ge me emen mgbọ ura, ura înye. Kosi okekijijen̄e, ifo isi òfo udun̄, mè ikikeek inu ọmọ oborọ.

Ogwu uga îsi uko mè itele Kosi me uwu.

Kosi okekido lek kan̄ ibe, "Ìre keke ke mbarọrọ ni inyi lek n̄a?"

Nkeek ge owuwulu inin̄ ọmọ ejit kubọk ekebe ukan̄.

Kọsi okekikeek ibe, "Mâsi igwọk ugwọk me okwaan̄, ire, ìre ekene obosa emi iban?"

Mgbọ ya, Maa Sofi oneniraka ije ikisi atasuk okwaan̄ ya. Ìbeme ikpele okwun ofọnti ojotbe emen.

Kosi otutumu me ejit kan̄ ibe, "Mâgọọk Maa Sofi isi atasuk!"

Kosi onenido ibe "Soso ìre mâkọt igọọk owu isi atasuk?" Maa Sofi ofọfọọk otu imọm mè itọp ibot.

Me oniin̄, Nọjifo ogọgọọk ema ije. Nọjifo ìkama ugwọk, ire, îkima ikukup ikpọ ike ebi ufi ene ekigwọk ugwọk.

Mgbọ ema erebe atasuk ya, Kosi otutumu inyi lek kan̄ ibe, "Cherekeyi ire òta usen emi ikekiken mun̄ me otu-ijọn̄ kubọk gwun̄ aya! Mâjeen̄ otutuuk ene ibe ke mâkọt igwọk ugwọk me ere mun̄ odọkbe si.

Iwuwulu irọn̄ me mun̄. Las!

Nọjifo okekeke me ujọn̄ọ ere, ere unan ìkpore ọmọ lek ikikpọ.

Ike Nọjifo okikpọ, otutuuk nsabọn mêkinwọọn̄ lek kiban̄ me emen mun̄.

Mêkigwọk ugwọk mè ikitap okput.

Ge òkitap ukpọ igwen ogwu mèlek kan̄ me ubelejit me emen mun̄ ya.

Nọjifo ogbagbala chieen̄ ikpọ mè imun̄ ibe ke îkaan̄ inu ge òkup esese. Kosi ìkigwọk ugwọk ijọn̄ọ ere me lek ofifi nsabọn. Nọjifo ojeje igbet mè iriọọn̄ ubọk ikpọ.

Inu îmun̄be îtet ọmọ ukpook. Ililibi isi lek ebibaan̄ ebi ìkigwọk ofọnti kiban̄ me otu mun̄ ya.

Nọjifo otatap ukpo ibe, "Ìtap ubọk! Kosi mônichep me mun̄!"

Mgbọ yaage, Maa Sofi owuwulu inin̄ mun̄ mè igwọk isi ere ya.

Înim ifo irak mun̄ mè iwolo mè ikpọk inim, ikiweek Kosi.

Itetet Kosi me ubọk kwàk mè isa igwọk inu ere mun̄ ikadọkge, mè iben ọmọ isa inene inyọn̄.

Maa Sofi ogwagwat lek ije iraka nsabọn mè ebibaan̄ ebi ìkekeke ikito ito mè ikitap ukpo.

Nọjifo okekilibi igọọk ọmọ ike ọmọ otapbe Kosi me udun̄ isa ikije isi uwu-ugwun̄ ija òkup me ama ya.

Me uwu-ugwun̄ ija ya, ogwu òban ge ekigwen Nosolo olilibi inu initap ubọk inyi ema.

Ogwu òban, Nosolo, ogwagwat lek iben Kosi isi itap me agwut ge mè isa ofifi ebi òban igbaalek kan̄ igwat lek itap ubọk inyi Kosi.

Ogwu òban, Nosolo, obebe, "Lek kan̄ mônye. Eji mîkaan̄ atisi ibe ke ìkakup me irak mun̄ ya ìfiin̄ ìgak ikeya."

Maa Sofi ochocho efuuk.

Otutuuk ene me uwu ugwun̄ ija ya etọtọn̄ ọmọ me lek ikatetge ukpook mè ike îriọọn̄be ugwọk ijaan̄ lek.

Maa Sofi otutumu, me ida òjeen̄ isiki-lek, ibe, "Ejit îbele emi ibe ke nkọt inyan̄a ebek ugwem ene."

Etip inu ya òrọrọ otataan̄ ire utọn̄ ogwukaan̄ ama ya. Iraria osat ibe esi egwen Maa Sofi ejet ọmọ.

Maa Sofi okpakpa ijeen̄ ogwukaan̄ ama ya ike ọmọ osabe ikana ogwu òrọriọọn̄ ugwọk ijaan̄ lek.

Ìbe, "Mgbọ nkupbe ijija, ogwu unene n̄a ìkiluk me usaba mun̄. Mun̄ ìre inu eji ekisa irọ inu usen geelek me ugwem kiji. Eya orọ, eji kpekọt ijit ikwekween."

Ogwukaan̄ ama ya ogwegwen ntitiin̄ mè ilook ibeke ọmọ mônyi Ma Sofi mkpukpe melek inu ya îtabe ukpook melek irọ.

Ebibaan̄ ekijop okwa ebon, ebirieen̄ ekiwut ofi, nsabọn ekitap ukpo ubelejit.

Bene me usen ya, nsabọn mîkima igọgọọk Ma Sofi ije, mè ikikọt ibe, "Inu geege ìkpokọt iremi lek, me mgbọ Ma Sofi, ogwu ìkakitet ukpook, okupbe me agbalek n̄a!"