Me ama Masoyi, îkaan̄ gwun̄ ibaan̄ ge òriọọn̄ inu, ogwu ekigwen Nomusa.

Ìkiluk melek nga nga kan̄ ogwu òkiwop uko akpa. 

Ogbogbo ebi ene me ama ya kperiọọn̄ ifuk mè ìre ige ikpa.  Ema ekisa uko iluk ugwem.

Nomusa îkima isisi uwu-ikpa. Nga nga kan̄ okekisa ọmọ igugo lek. 

Usen geelek îkabe uwu-ikpa, nga ogwu uga okekinyi ọmọ ikwaan̄ me uko.

Ọmọ okaan̄ ikekilap ebi kè mkpinyọn̄ mè òfut ìnunu ibenitaka mfut me uko ya isan̄a.

Nomusa îmun̄ ibe ke  ikwaan̄ ilalap mkpinyọn̄ mè ofut ikarek geelek îyọt.  

Ìkakimalek ìkọt ìkaan̄ mgbọ ìsa ìrọ ikwaan̄ uwu-ikpa kan̄ ìso.

Owuwa nsabọn me ama ya ekiban uwu-ikpa mije ema ekisi ikwaan̄ me uko.

Ike mgbọ okije, îgak Nomusa me lek ikekilap ebi kè ofut mè mkpinyọn̄ cha.

"Nkaan̄ ata nkeek ge," Nomusa otumu.

Nomusa ogbagbala chieen̄ igbaan̄ uti iba òjọjọn̄ọ ibọp, mè isa ofọnti ikwaan̄ kan̄ itap uti ya.

Ibeben uti cha igwuun̄ itat me inyọn̄, mè isa òkpibot kan̄ ikwuun̄ itoon̄ me inyọn̄ uti ya.

Ikakana ògbalatasuk!

Nomusa obeben ògbalatasuk ya isi igwuun̄ me eden̄ uko akpa ya.

"Ògbalatasuk yi mômọnọ irek n̄a mgbọ mbakirọ ikwaan̄ uwu-ikpa n̄a. Nga nga n̄a môkikeek ibe ke emi òwa me uko," Nomusa okekifọọk otu imọm ọmọ gaalek.

Usen geelek, môben akpa ikpa kan̄ isa igbaalek isi uko ya.

Môtap ofọnti uwu-ikpa kan̄ me lek kan̄ mè isa ofọnti ikwaan̄ kan̄ itap ògbalatasuk ya.

Isirọ ikeya isan̄a, mônisi ikweek me irak okwukwek uti ge ikirọ ikwaan̄ uwu-ikpa kan̄.

Usen îraka, Nomusa okekeek, "Nga nga n̄a ìkpokọt iweek otitọt n̄a yi  iriọọn̄."

Ejit îbele Nomusa mè ike ọmọ chieen̄ si mgbọ yaage.

Ebi kè mkpinyọn̄ mè ofut cha kpenin̄ emen uko akpa ya.

Ikarek ge, nga nga kè Nomusa onenije ibosi ifan̄a akpa me uko ya.

Uko înọọn̄ ikeya. Kpunu mkpinyọn̄ mè ìre ofut me ere geege.

Nga nga kan̄ okekikeek me ejit kan̄ ibe, "Nomusa òkisi ata ikwaan̄."

Nga nga kan̄ ogwegwen, "Nomusa! Nomusa! Òkup me owa?"

Ìkanọ ida geege.

Mgbọ ya inenimun̄ ògbalatasuk ya me eden̄ uko ya, mè ofọnti ikwaan̄ kè Nomusa me lek.

Mgbo nga nga kan̄ oniriọọn̄ inu ya Nomusa orọbe, isasa gwun̄ gwun̄ kan̄ enenwaan̄ ikigugo lek.


Ikekikeek me ejit kan̄ ibe, "Inu yi ìjeen̄ atalek iriọọn̄-inu. Ìkayaka ìkup me uyọt ibe Nomusa ikisi uko isi ilap ebi kè mkpinyọn̄ mè ofut."

Otutuuk ebi ìkup me ama ya enenima iriọọn-inu kè Nomusa. Otutuuk kiban̄ ebebene ikisa ògbalatasuk isi ikwaan̄ me uko kiban̄.

Ògbalatasuk cha okekilap ebi kè mkpinyọn̄ mè ofut me uko cha.

Nsabọn ekekisi uwu-ikpa, kpeyaka ikisi uko isi ikpọ chieen̄ me lek inu ewopbe me uko.