Okorime-pɔ kɛ unɔ́si unyinɛ uú we ɑpi yɛ u sée rɛ Teto. Uisoi yɛ pɛɛ welɛ mpehẽ nɛ pinɔ́sicɔ ikɔ́.

Ilũ yɛɛ n cɛ́ɛ́rii nɛ mɛ́kpɛrinkpɛ kuu yɛ tɑ̃. Kúnɑmii nɛ kulukɛlukɛ kuu yɛ ɑnɛ́ɛ́ri consɛntɛ uu tɑni.

Teto úu yɛ nɛ úkɑ símisi kuyu kɛ́mɛɛ. Úu yɛ nɛ úkɑ pikɛi ripɛ́nɛ.

Umɛcirɛ kuu yɛ n símisi un ɑtɔlɛ pepu un cuunkɛɛ.

U yɛ pinyinɛi un yo n yɛ̃ kɛtenií uu kpísi uu le.

Úu yɛ píkɑi kɑ́ɑsi mpɑ́ nɛ lɛ̃ kuu nní ń hínɛi un le. Úu píkɑi unyinɛ pítɛ nírɑɑlɛ. Uú kɔ píkɑi kupɔisɛlee hɑpɑɑlɛ̃.

Kuyu pikɔ picɔ pin tee rɛ isɔhɔ kuu tóri. Picɔ rɛ usepe lo.

Pin u lɑ́mɑɑnkɛɛ. Apí nɛ u yulu rɛ úu kɑpɛ yɛ kei kɛ Okorime pikɔ ɑpi míni n lúni pin níru hɑ.

Kupii ɑku tulu. Teto un kɛwɔ́hɔpi nɛ kɛtɛ́hɛ nɛ kusóo kpurɛ mɑ́.

Kɛtɛ́hɛ nɛ kɛwɔ́hɔpi kuú nɛ hɛ́rii. Uu kusóo nɛ míni lúnɛi.

Teto uu ɑpúusirɛ́ nɛ mɛnyímɛɛ lukɛsi. Siyɑ́ɑ nnɛ́í kuu ukɛcɑrɛ-i kɛisi.

Okorime pikɔ pin tũ pin u nyɑ́nɛi pin u hɛ́piri. Un sɛ́ɛ́lɛ̃ un upikɛi wɑi.

U yɛ mpɑ́ píyei n kɛisilɛ un yom tɛ, "Sikɑ̃́ yɛ kónilɛ, ɑ́ni kɑpɛ sikɑ̃́ m mɑ́. Nkṹ yɛ́ nɔ́ wɑ."

Iwɑ́rɛ itɑɑni mɛmɑ́ɑ́, Teto ilukɛ ii pelu. Apúusirɛ ɑɑ hɛ́ɛ́ni.

Okorime kuyu pikɔ ɑpi nkpéni Teto kɛ́mɛɛ sĩ́ pin ɑpúusirɛ nɛ mɛnyímɛɛ wélei.

Ḿpɑ́ kuu yɛ nní pi n hɛ nɛ uripɔɔ. Pisoi kpɑ́ɑ́ree picɔ yɛɛ hɑlɛ unsɑ́ n we ɑpi yɑ́ɑi.

Usɑ́nɛ unyinɛ uu kɛyɑ́ɑ Okorimɛ kuyu picérɛ weri. Uu Teto lɛɛpɔ ukɛcɑrɛ-i, uu upikɛi yɛnu urikiŋ ɑri niŋisi.

Usɑ́nɛ uu u yɑ́ɑsi, "Nɛ kɛpɔ́cɑrɛ!" Amɑ́ Teto úu rinɔ́ɔ yɔsí.

Usɑ́nɛ úu Teto kumúŋɛ́ céri. Uu kuyu sĩ ukɛ́ Teto nkɔ kṍ.

Okorime kuyu pikɔ ɑpi u mɑɑ rɛ usɔhɔtorɛ lo.

Usɑ́nɛ uu Teto pinɑŋɛnɑŋɛ kɛi nyɑ́nɛi, uu umɛcirɛ pisɛ rɛ, "Teto yɛ mɛsei isɔhɔ torilɛ nníí?"

Uu cɑ́ɑ́i rɛ, "Ám unɔ́si sɔhɔtorɛ nkó ucɔ yɛ́nɑɑlɛ̃."