Tô berien, obeŋi nyia nêjêk jio aciaŋi.

Oretiaî nyia isi ꞌdaŋ iretia.

Aatî nyia hama owoni iko êjêk, hinyia isiarak isi Ajiok.

Tô nôbô nôlôŋ, ajio nyia Ajiok jio hôrrê esiarak inyi êjêk jio aciaŋi ꞌdaŋ. Awak nyia inyi jio ôŋîda buo fê isi adahaî.

Iramak nyia inyi êrrê hulia jio aciaŋi ꞌdaŋ.

Ajiori aciaŋi, "Olô baka iyiji êllê ewon iko êjêk."

Omunoi nyia isi êttê îhîa buo fê idoloi afuretia.

Ajiori nyia aciaŋi ꞌdaŋ jio ôgôl aretia.

Omî nyia buo fê aretia jihosi.

Ninyia attu nôlôŋ nyia, afuoi aciaŋi arriaî îhaŋ Jiok.

Owotiaî nyia isi ꞌdaŋ hunne ilieri; Akorio, elemio, atomie, atôjê, anyiaŋi iko ahêny.

Isiarani nyia jihosi êjêk aŋûan-aŋûan.

Buo isiarani jio ahêny êjêk arrîk-arrîk.

Alûfajî nyia nêrrê ꞌdaŋ jihosi hinyia arûmanî isi êjêk hosi hûa.

Ohîaî nyia ômûk ta amuno buo ômûk okuahattaî îfaû.

Afuoi nyia isi îtahûtana êjêk hosi hûnîa jio aatî.

Attatî isi ijiaran, "Ebeŋ hôhôî enyiak iretia ꞌtulaŋ."

Egîlî nyia ottu tê êhalû. Attatî ajiok îfî inyi jio, "Howoni ômûk aciaŋi hunno ofuonni ꞌtô tê êhalû hôî?"

Ajio êgîlî, "Obeŋ, nanî ecuŋi."

Attatî Ajiok igigilo, "Ara êgîlî ecuŋi. Alô nî îhattiere êjêk hûna ꞌdaŋ anyio?"

Isiarak Ajiok êjêk hunyia ofitunie ꞌtô hûa ꞌdaŋ jio êgîlî anîa.

Omuno nyia êgîlî bêbê bêbê. Ettê ijiaran, "Alô nî îgalio hunno ômûk ciaŋi ꞌdaŋ ta adaha."

Hinyia alô êgîlî, attatî amunu ittuna jio Ajiok îhaŋ honyi. Ajio jio Ajiok jio, "Hadi isiarak anî ômûk êjêk."

Ajio Ajiok, "Atuhok nî êjêk ꞌdaŋ jio aciaŋi huduo ofuonni ꞌtô. Iwon duo iyye ajia?"

Itarraŋak amunu, "Ajôtôrô duo nî."

Attatî Ajiok ittifia jio ara halô inyi ibibuoluna ômûk êjêk hunno ofitunei ꞌtô.

Abeŋ ôrûmak ômûk.

Ajio Ajiok jio amunu, "Amehino nî iyye. Abeŋi ômûk êjêk." Aria amunu îhaŋ honyi obeŋi ômûk êjêk."

Many jio ôlôŋ lîa, abeŋ nyia amunu anîa ojotu ajio. Itîla nyia inyi jio ijiara inyi attu ikiomoro moi îrûmaniere êjêk.