Ettûbûtatio nyia hôhôî îhaŋ hahanyi hoŋ îtayîriere êyabîta honyi. Etoŋotio hôhôî îmaji hîma ênnê înahînî ihiloŋoni.

Itterio hahanyi hoŋ êyaba honyi ecuŋi jio attarî nyia êttê ijiaran, "Asaî nyia Hitojo iko Tômê allônyîharî buo fê ôrrîahaî."

Omuno nyia Hitojo eboluho, buo ibuoyo arômô. Attatî inyi ihoholutta eboluho Tômê.

Idûlak nyia Tômê arraboloi iko esesei jio êêŋa nyia. Anîa abeŋi nyia eboluho jio Hitojo.

Ihûrîa nyia Hitojo. Attatî lêtên ihoholuno arraboloi Tômê.

Ahêrû nyia Tômê jio jio ohoholutta ôbô aciaŋ arraboloi honyi. Alô jio Hitojo êttê ijiaran, "Ohoholutta ôbô aciaŋ êrrê hoŋ."

Ifî Hitojo, "ŋaî ôlôhôhô lîa?"

Attatî Tômê itterio edolio ôbô afure honyi ônnô ojio, "Attu nî înêfûna ôlôhôhô lîa! Aaah! Attu nî înêfûna ôlôhôhô lîa! Ooo!"

Alô nyia Tômê ifiyo ŋidony ôŋîda ôlô icia amana honyi. Abeŋ Hitojo ottu ihoholio jio ôlôŋ iko attarî nyia. Obeŋ nyia buo fê Hitojo ottu ihoholio jio ôlôŋ êtarrîhî iko attarî honyi.

Amîratio nyia ecia jio ŋidony.

Ojio nyia motie, inyiak fê Hitojo îlêtên ihoholio îmana Tômê.

Hinyia alô Tômê iherio amana honyi, êttê Hitojo îlêtên îdîma itua ihaya.

Igonyu Tômê abênê îttîttanîŋaî attatî buo idolo, "Enêfû nî ôlôhôhô! Aah! Enêfû nî ôlôhôhô! Ooo!"

Attifia Tômê amasik ꞌdaŋ buo obeŋ ônyûrak ôbô ôlôhôhô.

Tô ôbô nôlôŋ, inyiak fê Hitojo îlêtên îmana Tômê ihoholio.

Afany Tômê itua mana honyi buo Hitojo êttê îllûhîna itua ôbô êsêsê ninyia ôbôlô ꞌtô bêbê, êttê îdîma diyya.

Ahêrû Tômê êsêsê ônô ôbôlô ꞌtô anîa êttê ijiaran, "Ooo! êsêsê ônnô ôbôlô ꞌtô bêbê ana. Attu nî iŋiyo anîa ta afannî."

Attaî inyi ittuna idiloro êsêsê anîa êlûŋa.

Ojio nyia Hitojo allû adî tô tua hîsêsê, buo ôgôl jihonyi.

Ollûta nyia ôbô narîŋ itua hôhê Tômê, attatî ijiaran, "Nanyio hîsêsê ônnô ôllûta ꞌtô ana itua hôhê hoŋ?"

Attatî Tômê îyahûna êsêsê nyia addi. Hojio ihuania jio halô inyi îhûm îmî êsêsê nyia, êttê Hitojo ijiŋuna tô tua hîsêsê teyya êttê iruat fîr-fîr.

Ajio hahanyi, "Ecuŋi ônô nêyaba nyia anîa."

"Hûmô bêbê hahanyi hôhôî," êtarraŋak hôhôî buo hôhôî ꞌdaŋ êbûnyîta. Attatî hôhôî itturoro buo eyyiutta êyaba hahanyi hôhôî anîa.