Onyinya mè Ibo ere atata unene.

Ema mîgbaan̄ ichieek ibe ema mêsi ikpọ ogwu unene kiban̄, Gwun̄ Unọn, me usen iman kan̄. 

Gwun̄ Unọn ìkiluuk me ofifi ama. Ìboben Onyinya mè Ibo usen iba isasa ije ire ama ya.

Onyinya mè Ibo ekaan̄ esese esese eru.

Ibo îma ikekirie inorie mè ilaak, mè ikima iweweek ikọ usini mgbọ.

Onyinya îkikaan̄ ejit nsan mè ikichili ubọk icheche inu inyi ene, mè ire si ogwu mêkọtbe itoon̄ ejit me lek.

Ema mînichichini me uwu kè Ibo inyi etọt ike ema ebesa ije ije kiban̄.

Ibo obebe, "Emi mâsa inorie eji eberie me adasi usen inu."

Onyinya obebe, "Mâsa inorie eyi òso usen iba inu."

Ema egege otutuuk inu itap me ikpa inyi ekawuuk.

Ike Ibo okisa Onyinya ije iban me uwu kan̄, itutumu ibe, "Môtop enenen imumun̄ Gwun̄ Unọn. Îfiin̄ mgbọ eji emun̄be ogwu unene kiji."

Onyinya obebe Ibo, "Onirọ me lek osabe emi ije ire uwu n̄a."

Ema enenichichini me otu ewelegwe me ofit-iwele inyi ema ebene ije kiban̄. 

Ema ekekikọt okwa, mè ikijop me ubelejit me oniin̄.

Sọntiik mgbọ iraraka, ema esisiki efuuk me irak uti ilile ge. Onyinya obebe, "Uraafiọọn̄ òkitaka emi! Eji erie inorie."

Ibo ogwagwat lek ichibi inorie itap me emen bọli iba. Inorie ya ìkup mumun̄ mè iwa aran̄ me lek.

Onyinya ododo ibe, "Ìre eyi ire inorie osabe inu ibe eji ene iba erie?"

Onyinya onanaan̄ ejit mije ogwu unene kan̄ ìkasa inorie ema egbaan̄be ichieek ìsa ìnu. Ìkarie inorie kè Ibo.

Ibo ododo ibe, "Ìre keke ke owu okikeke iban?" Ìkikpọ chieen̄ ibe ke Onyinya môtele inununuun̄ mè irie inorie ya.

Me unaan̄-ejit, Onyinya ododo ọmọ ibe, "Ìre keke orọ mè owu òsa inorie owu gaalek omabe ònu?"

Ibo okekirie inorie ye ugwat ugwat ire lek alala okwalabe irọn̄.

Otutuuk inorie kè Ibo ogbugbuku igwook me ijọn̄.

Onyinya obebe, "Kasisaak lek une n̄a.

Onyinya osasan̄a fituru nririeen̄ echi òjajaan̄ ichit isibi, mè ibene ikitaka.

Ibo okekikpọ inorie kè Onyinya me chieen̄ ito.

Mgbọ Onyinya oriebe inu isan̄a, ikpulu inu kan̄ itap me akpa mè itumu inyi Ibo ibe, "Ìre eji mêkọt ibene ije inyi isi me ije kiji?"

Ema kpeyaka ikpa ukpatu geege me inyọn̄ ije ya. Owot okekifuku Ibo mije uraafiọọn̄. 

Ikakwun̄ ya, Onyinya ochichibi inorie inyi lek kan̄. Mgbọ îsibe isi isiki ilaak, ikekibele ejit ibe ke înwọn ọmọ osabe inorie òwawa iso inu.

Ibo osisi ilaak me uraafiọọn̄.

Me ewelegwe, Onyinya otatap sọntiik inorie ewelegwe inyi lek kan̄. Ibo ìkakọt ìtet lek kan̄ me ikpọkpo inorie kè Onyinya. 

Onyinya ocheche inorie kan̄ inyi Ibo.

Ibo obebe, "Tele nyi emi. Inu ya nrọbe, ǹkeek lek n̄a gaalek."

Onyinya ofọfọọk ibe, "Na mè eji egbaan̄ erie."

Ema esisiki ikweek irie inorie.

Ike ema ekije inyi isi me inyọn̄ ije kiban̄, ema eyayaka ire unene!

Ema mîre uwu kè Gwun̄ Unọn me ata mgbọ.

Gwun̄ Unọn obebe, "Ebi unene n̄a, ije kinyi ìkukup?"

Onyinya mè Ibo efọfọọk ibe, "Inwọn enenen," mè ikichak, ge ikpọ ge.

Ijọk usen iman ya îmin enenen.

Ema mîrie, mè ikọt, mè ijop.