Tene, tene mono, nyomoo cia kîthaka iciagîre rûûjî.

Irachûa kuunthe îndî itarwona.

Iroothûrana kûona ûrea igateetheka. Nyomoo cionthe iciejîre mûcemanione, îndi Mbîrwa îteeja.

Mbîrwa îrauga, "Natea mpûmba kwîja mûcemanio jwîna nkuru îkûnunka?"

Mucemanione, Nyomoo iretîkanîria kwînja kîthima.

Nkûrûngû îrauga, "Kîthima gîetu gîkethîrwa gîtonyeete mono na gîkîariî. Rîrea kîûjûri, tûtîkaro aga rûûjî kaîrî."

Baraina na gûceetha bagîcîncanagia kwînja kîthima.

Betîte na mbere, rûûjî rûrauma nthîgûru na rwojûria kîthima.

Barakena mono. Batacema rûûjî rûngî ta rûu rwîna mûreo na rûtheri.

Nandî, ntukû îmwe, nyomoo irea ciamenya atî kwînawe ûkûthambira rûûjîne akîrwakaga rûko.

Baracîncania gûkaria kîthima.

Ngitûûjû nîyo yakaarîtie ntukû îu. Mbîrwa îreeja îkamatîte mûkanda jwa kûthûngûtha.

"Imbio ûkûthithia aja?" Mbîrwa îroria.

"Gûkaria rûûjî rwetû," Ngitûûjû îrachokia.

Mbîrwa îroria ngitûûjû kethîra no baceethe nawe.

Mûceetho jûjû jûbatîîri mûceethi ûmwe aogi na mûkanda, amincîtie na atare îmwe mwanka ngiri îmwe.

Ngitûûjû îretîkîria gûceetha.

Mbîrwa îraoga ngitûûjû, ûrea waingîre metho na anjia gûtara.

Mbîrwa îranyua rûûjî kuuma kîthimene na yathambîra.

Mûthiene, Mbîrwa yajûkia rûûjî rûkai na yeta. Ngitûûjû noo yatataraga.

Ngitûûjû yathiria gûtara na yarugûra metho.

Mbîrwa îtonekana au.

Ngitûûjû îreeta nyomoo iu ingî ciîje imûogore.

Nyomoo ireeta na mbere gûkaria kîthima bagîcîncanagia, îndî batoomba kûgwata mbîrwa.

Nkuru îrauga, "Ûûni gankarie." Îratoonya kîthimene gwetera Mbîrwa.

Rîrea mbîrwa yakinyire, îrathûgania, "Gûtirîwe ûrî aja!" Îraambia kûnyua.

Îraigua gîntû kîamîrûma rûrûme. Îracooka îrakuucua ndeene rûûjîne.

Nyomoo iu iingî ireeja imatûkîte ciîkuigua mbîrwa îkîrîra na kûgeragera rûûjî.

Nyomoo iraoga mbîrwa na mîkanda.

Nkuru îrera mbîrwa, "Nîûtûîîrîtie twinthe. ûkaewa nthînje." Nyomoo cionthe irakaatha Nkuru arî nchamba yao.

Kuuma ntukû îu, barakenera kûnyua rûûjî rûtheri batîgûcumbûrwa.