Kîrî ntûra ya Masoyi, nî kwarî na mwarî ûmûûme wetagwa Nomusa. Bakaranagia na ûjûwe, ûrea warîmaga mpempe.

Antû babaingî ntûrene batîngîthoma kana baandîka. Baitaga mbeca kuuma miundene yao.

Nomusa eendete gwîta cukuru, na ûjûwe akenaga mono iwe.

O ntukû auma cukuru, ûjûwe amwejaga ngûgî cia muunda.

No mwanka akîîngata marukî na nyoni irea ciendaga kûrea mîmera yao.

Nomusa neejîre kûona nî ûntû bûbûmû kûîngata marukî na nyoni mûthenya juunthe. Atarî na kaanya ga kûthiria ngûgî ciawe cia cukuru.

Aana barea baingî ntûrene batetaga cukuru nontû baitaga ngûgî miundene.

O ûrea kanya getîre gekûrûkaga, Nomusa etîre na mbere kûnoga i kwînga nyoni na marukî.

"Kûrî ûntû nkûthûgania," aracithûganîria.

Nomusa aragwatanîthia mîtî îîrî îmîîraaja. Aramîîkira nguû ciawe cia ngûgî.

Aramîrûngîka na amîîkî nkobia yawe ya ngûgî îgûrû.

Îratwîka gîntû gîa kûmakania.

Nomusa aarîîkîîra gîntû kîu gîa kûmakania gatagatî ka muunda jwa mpempe.

"Gîntû gîkî gîa kûmakania gîkandûngamîîra nkîthithagia ngûgi cia cukuru. Jûjû athûganie i ûni ndî muundene," Nomusa araikeneera.

O ntukû, aikagia kiondo kîawe gia cukuru muundene.

Aakaraga na nguû cia cukuru, agekîra nguû ciawe cia ngûgî kîrî gîntû kîu gîa kûmakania.

Agacoka akathithîria ngûgî ciawe cia cukuru mûgunyene jwa mûtî.

Ntukû irakûrûka na Nomusa arathûgania, "Jûjû atîkaromenya mubango jwakwa."

Nomusa arakena na amaaki o rîmwe.

Marukî na nyoni iteeja muundene jwa mpempe kaîrî.

Mûthenya jûmwe, jûjû o Nomusa areeta muundene kûthagana mpempe.

Muunda ijwakiri mono. Gûtirî noo kwarî na marukî kana nyoni.

Jûjû aracithûganîria, "Nomusa naguita ngûgî înjega."

Jûjû areetana, "Nomusa! Nomusa! Inaa ûri?"

Gûtari na gîcokio.

Aracoka aroona gîntû kîu gia kûmakania gatagatî ka muunda, gîîkîrîte nguû cia Nomusa!

Rîrîa jûjû amenyere ûrea Nomusa athithîtie, nî akenere mono nî kajûjû kawe.

Arathûgania, "Bûbû nî ûntû bûbûûme. Tomwanka Nomusa eete muundene kwîngata marukî na nyoni."

Muntû wonthe ntûrene neendete mathûgania jamoome ja Nomusa. Bonthe baarambia gûtumîra into bia kûmakania miundene yao.

Into biu ibiengaga marukî na nyoni miundene.

Na aana ibeetaga cukuru antu beeta gûkaria mîmera.