Kalakala, yinyama yamwitinji yamsoŵile mesi.

yalolesyaga palipose nambo nganiyigapataga mesigo.

Yinyamayi yasongangene kuti yipate litala lyakumalana ni cakusawusya cawoco. Yinyama yosope yayice pamsonganopo, kupatula Litunu.

Litunu lyatite, "Cimbe uli pa msongano ni Ngong'o jakununga?"

Kumsonganoko, yinyama yakamulene kusola cisima.

Ngolombwe jatite, "Cisima cetu ciciŵe cakusokoka ni cekulungwa. Cili cigumbele mesi, ngasituŵa ŵangali mesi soni."

Ŵajimbaga nyimbo ni kuŵina paŵacenganaga kusola cisimaco.

Pambesi pakwe, mesi gakopwece mwitaka ni kugumbala cisimaco.

Ŵaliji ŵakusangalala mnope. Nganamweje mesi gakunong'a ni gambone gamti myoyo.

Kaneko, lisiku line, yinyama yamanyilile kuti ŵaneŵakwe ŵasugaga m'mesimo ni kugaŵilisya mesigo.

Ŵacenganaga kulindilila cisimaco.

Kalunga jaliji pa masengo gakulindilila cisimaco. Litunu lyayice ni lukonji lwakwe lwakutendela maseŵela ga fishifishi.

"Ana mkutenda cici apano?" Litunu lyawusisye.

"Kulindilila mesi getu," Kalunga jajanjile.

Litunu lyamtesile Kalunga kuti atende nawo maseŵela.

Maseŵelago gakwayanaga kumtaŵa lukonji jumo, kusisina ni kuŵalangaga mpaka kwika sausande.

Kalunga jakundile kutenda maseŵelago.

Litunu lyajitaŵile Kalunga, jajasisinile ni kutanda kuŵalanga.

Litunu lyamwele mesi pa cisimaco ni kusuga.

Ni kaneko, Litunu lyatecile mesi ni kwawulaga. Kalunga jaliji jilimkuŵalangape.

Kalunga jamalisisye kuŵalanga ni jasisinikwile meso gakwe.

Pajasisinikwile meso, jalisimene litunu kwangali.

Kalunga jagumisile kuyiŵilanga yinyama yine kuti yiyice ni yagopole.

Yinyama yapitilisye kucengana kulindilila cisimaco, nambo wosope ŵalepele kulikamula Litunu.

Ngong'o jatite kuti, "Andece une lindilile." Ŵajinjile mu cisimaco kulilindilila Litunu.

Palyayice Litunu, lyaŵecete camumtima, "Kwangali ŵaliwose akuno!" Lyatandite kumwa mesi.

Lyapikene cinecakwe kuluma palulumi pakwe. Kaneko, cinduco caliwutile litunulyo m'mesi!

Yinyama yine yawutucile payapikene Litunu kulila ni kumisa mesi.

Yinyamayo yalitaŵile Litunu.

Ngong'o jalisalile Litunu, "Mtulemwecesye wosope. Cimpocele cilango." Yinyama yajiyamicile Ngong'o pakuŵa mkulupusyo jwawo.

Kutyocela lisiku lyelelyo, yinyamayo yasangalalaga kumwa mesi gambone pangali cakusokonasya cilicose.