Document

Wír wo wù kér kíghàʼ wo tavín

Ursula Nafula

Mandu-uù dzə́ wùn à tàá və, à yàá, à jemèr wùn lùmer tàr wov. Mandu-uù kér ŋgvəv wùn à bvə́y, à njiì, à kǔnnyàm.

Ŋgvəv-iì shiiy e wàn kibìrìʼ, a bvə́y wùn à njiì, à kǔnnyàm rə́si tsə́ŋ a dzə̀ é wǔnlav. Tàá wùn yàá dzə̀ wíri a vé-eè dzəə́ kér vitaáví. Jèmèr wùn lùmer tàr wov kù-uù sə́ Mandu e lìm.

Viyá vi lòo liysín, vinyo vi kúvsín. Vidzəənè ví-iì yiì, a tàá wùn yàá yòʼ yú vinyo kijuŋ, aá yòʼ yén sa virə́ʼ kijuŋ.

Jèmèr tàr wov nèn lò sa a jòyrì jòyrìn, a yòʼ kfə̀n dzə̀ wù yù fó a yèr lav.

A lùmer tàr wov kù rə́sí néŋ neŋén, a wù yòʼ kfə̀n yú fó a sə a yiír nyám si.

Nyám si nén a toŋnín toŋnín, a fo njèʼèr, bìʼ jíŋ.

Lav nen lò dòtí a beemé beemén, bìʼ fo jèmèr tàr wov yòʼ kfə̀n yerì.

Mandu-uù lo wù kù lìm lim límen e dòr é shuù wo. A wù kù fəə́ kishiíy kidzə̀m du taʼ viyikìr ve wìr dzə̀m.

Wáa dzə e kishiíy kímóʼ kí, vinyo vi táv. Mandu nèn yòŋ ji tàá və wùn yàá leéy o ji a sà kiʼ kinyo bèn á yèe le?

Bó tàá wùn yàá yoʼ fə̀m yù kinyo ke Mandu yòŋèn, Mandu yú bír sho feyì.

Jèmèr tàr wov wo wù jòy jòyìn suúy kfə́ jii, "Shií wom dzə̀ kfə́ ji m buúné kijuŋ vitsə́ʼə́, a yìmèn a sì kijàvndzə."

Lumèr tàr wov wo dzəə̀n njoó suúy kfə́ jii, "Fiìnè nyám si, e nèn yùn viyíkìr vi e fò e tàa wò wùn yàá. Áwune lóo yikír, lóo buuné, é la wìr yòʼ dzəə́ a fo wò ŋgeʼ. "

Ẁú suúy bey ki nyár Mandu, "Bàá, à kì ji yòʼ dzə̀ m fiìnè á nyám si. Káv wómé kù jòʼ nyám sìn."

Wáa dzə vitsə́ʼ vímóʼ ví, Mandu shiíy e làa yòʼ buuné. Wù nèn kuùmé taà vifií wùmòʼ wo á kiìn ji kinyo ki yòʼ dzə̀ á sho ke dzə̀ kí ghàʼá wun.

Mandu bvəə́shí e nèn lì nyám sə́, e dù e yèn taà vifií sho. Wù-uù kér bvə́y wùn à njiì, à ŋkǔnnyàm aàkfəə̀, nèn kér ŋgvəv e kiwo.

Mandu wáa meé e taà vifìí laʼ, a wù dór ne, a jìŋ kfə̀n yár wun.

Wù naàrì kigháʼ və, e màysì, taà vifiì suúy jii, "M lo e sə wò, yii bèy, à kér fóo yiì vinyo ve m yoŋè."

Mandu bìnèr jii, "A fə̀m dzə̀ ji m yii ka, m kù yiì, e fíʼ keerí rəsìn."

Taà vifiì yóŋ jii, "Màʼtì nyám si fen a kfən e bàm e wò lav."

Mandu suúy jii, "Kiíy ji vèr à nyám sém sí dzə̀ʼə̀m ne ntàmda. Káv wómé kù jòʼ nyám sìn."

Taà vifiì yóŋ jii, "M kì yòŋ ne e wò ji dzə̀ m sə̀ á wò, yii bèy, à kér fóo yiì vinyo ve m yoŋè."

Mandu-uù shií a dzə̀ ji wun ku keèrí a rəsìn fo wun kíghàʼ. Wù nen kù màʼtì nyám si e kfə̀n é bàm.

Wù meé é laʼ, a yí sì ji nyoòŋ, a kifá ki yòʼ dzə̀ə́ fo. Wìr dzə̀m-eè joy kinyo kee ji nyám sí yòʼ waà dzə̀ə́. Tàá və wùn yàá wáa shwemkír bìʼ fo vín bvəyi yòʼ kfə̀n dzə̀ ye á wáa kam a fo aáwune.

Lumèr tàr wov yóŋ jii, "Vèsən kfə̀n ne ji vé kitàne, a wìr dzə̀m sí shéʼ vèsən."

Mandu nèn mèŋ fó dù e shwémkíri ye wìr dzə̀m shwémkirìi. A wúnwun kitú kfə́ kù joy sa ji nyám sə́ sí yòʼ waà dzə̀ə́.

Wù kfə́n ji wun sə́ á ntir fo taà vifiì. "Dzəʼə̀m yee mǒ laʼa sì ji kifá kímóʼ kí bìʼ nyám sém se sí yòʼ dzə̀ə́. Wír vémé joy kinyo kìn feyì."

Taà vifiì yòŋ jii, "M lo e sə wò, yii bèy, à kù kér fóo yiì mo m yoŋè. Dù fo laʼ e fə̀ə́r tàa wò wùn yàá fo lav."

Mandu yóŋ jii, "Yòʼ dzə̀ m yiì bey. Dzə̀ tàá wom wùn yàá, a leey mo fo áwune."

Kí gháʼ, wù ku dù e yiì mo á kì yòŋèn. Mo wù yiin bey, kitú ki wáa saʼ wun.

Bó tàá wùn yàá yoʼ kòóy fo dù. Áwune nen kù a jiiŋè a kar, a bàʼàr fó a bàyrìn e vifa. Lóo dzə e shùy, lume wàa ghaʼ áwune, lóo dzə̀ vitsə́̀ʼ wàa dzə kidzə́r.

Jèmèr tàr wov ye yì joy jòyìn wáa toŋ a yòŋ jii, "Lá à yòʼ cùúr mo é ndzə."

Lumèr tàr wov ye dzəə̀n njoó, wáa toŋ a yòŋ sa jii, "Lá à yòʼ cùúr mo é ndzə."

Mandu nen mèŋ kinyo kée yii. Wù kfə́n ji wun yén á taà vifiì, a kí nyár ne wun, vifií ví bvəə́rí.

Mandu wáa toŋ a suúy jii, "Vinyo ve m shaa shó vi tàv e shaà mo. Suúy mo kinyo ke réŋ kí."

Taà vifiì yòŋ jii, "Lì ri nyám sé si lèn, e kfə̀n shó fo laʼ. À du, à siìr tàa wò wùn yàá é lav."

Mandu nen dù e yiì mo á kì yòŋèn. Jèmèr tàr wov yóŋ lèn jii, "M lo a yèr láʼ."

Lumèr tàr wov yee njoó rə̀y máʼtí lèn vinjoó, e nèn a sə Mandu a yiì lim. Á bèy, wìr dzə̀m nen siì kfə̀n a dzə kijuŋ.

You are free to download, copy, translate or adapt this story and use the illustrations as long as you attribute in the following way:

Wír wo wù kér kíghàʼ wo tavín

Author - Ursula Nafula
Translation - Beatrice Tafon Takeh and Mbinkar Emmanuel Keelen
Illustration - , Abraham Muzee
Language - Lámnsoʼ
Level - Longer paragraphs