Guci na Kûru nî acoore babega.

Baretîkanîria kûriûngîra mûcoore wao, Ngûkû ntukû yawe ya gûciarwa.

Ngûkû yatûraga ntûûra îîngi. Îrîbajûkia Guci na Kurû ntukû ijîrî gûkinya.

Guci na Kurû barî na mîître mwanya. Kurû yendete kûrea na kûmama. Rîmwe na rîmwe yarî na mîcetho îtîbui.

Guci yarî na kûejana, kûmenyanîra na gûtegwa îgûrû.

Baracemania gwa Kurû kûbanga rûgendo rwao.

"Nkareta irio ntûkû ya mbere," Kurû arauga akaejana.

"Nkareta ntukû ya ijîri," Guci arauga.

Baraandîka mantû jonthe kenda batîkoorîrue.

"Gîkethîrwa kî gîkeno kwona Ngûkû îgita rîtî kûraaja. I kagita mono twîrîga kûmwona," Kurû arauga aringîrîtie Guci aana kwawe.

"Ibwega i gûmpania," Guci arera Kurû.

Baracemania rûkîîrî mono ntukû îu îîngî baambia rûgendo rwao.

Baraina bena gîkeno gîkînene njîrene betîte. Nyuma e kagita gakai, baranogoka gîtinene kîa mûti jûmûnene.

"Ndîna mpara! Tûrîe," Guci arauga.

Kurû arekîra irio na mpûi thanine ijîrî. Irio biu biari na maguta na rûûjî.

Guci aroria, "Bibi ibio irio ûretere bia tubaîrî?"

Guci athûri nontû mûcoore wawe atareta irio birea betîkanîrîtie. Atarea irio bia Kurû.

"Imbi weterete?" Kurû aroria. Erîgîrîte Guci agatiga kûnung'una na arîe.

Athûûri, Guci aroria, "Nîkî nontû ûretere irio birea akî ûgwe wendete?"

Kurû aarîjaga na mpûî mwanka thaani yawe etendera. Irio biawe bionthe biretîka nthî.

"Ûkamaka mûcoore wakwa," Guci arauga.

Guci araita mîgate îmîthongi mono. Arambia kûrea.

Kurû arategera irio bia Guci na metho ja kîao.

Rîrea Guci athiririe kûrea, arabanga into biawe na arera Kurû, "Twîte na mbere na rûgendo rwetû?"

Bataaria rûgendone rwao runthe. Kîu gîa Kurû kîaruma i mpara.

Ûgoro bûu, Guci aciîkîra irio biawe wenka. Areeta kûmama akenete ûrea aretere irio biakûng'ana.

Kurû areeta kûmama na mpara.

Rûkîîri, Guci araciîkîra tuirio tûkai twa rûkîîrî. Kurû aremwa gûtiga gûtega irio bia Guci.

Kurû arauga, "Ndekera. Îgûcienda."

Guci aracokia, "Tûrîe tûri amwe."

Barakara nthî kûrea.

Betîte na mbere na rûgendo rwao, baratwîka acoore kaîrî!

Barakinya nyomba ya Ngûkû mathaene jamega.

"Rûgendo rwenu rûrakari atea acoore bakwa?'' Ngûkû aroria.

Bakîthekanagia, Guci na Kurû baracokia, "Înjega mono."

Naama iyaarî ntukû înjega mono ya kîatho kîa gûciarwa.

Bararea na kuina!