Document

Kibóŋaàrí kee fií

Ntombifuthi Ncwayiba

Khanyisa Masemola

Yì-iì dzə̀ é ghan símóʼ sí fó yàngù', nyám si nèn lò e bùŋ mendzə́v.

Áwune tàʼ virə́' vidzə̀m e làa yò' yen.

Áwuné nèn bà'tí ji á yén o ji sà dzə̀ á ghàn é le bóo koóy mendzə́v a? Nyám sidzə̀m si-iì wìy fó dzə̀ʼə̀m, ku jòʼ Kimbè'bìy.

A Kimbè'bìy kí gháy wún və́ jii, "Yò' dzə̀ m dù dzə'ə̀m ye kirə̀mfə̀ŋ ke Ŋaàrí kí dzəə̀n fó."

Á dzə̀ʼə̀m bèy, Nyám sidzə̀m si biímé ji á túŋ a bií ndzəv.

Shishùy shí suúy jii, "Bií ndzəv wosən vəne lo e shoo, e kfə̀n fàŋ. Mendzə́v me yií rún sho, e la vèsən yò' dzəə wìy búŋ mendzə́v."

Áwune nèn a túŋ bií ndzəv vəy, túŋ bèy yovì, ceŋè, a wìr túŋ fó kilíŋ e wùmò'.

E bǎm shintàm, ndzə́ví nèn meè fó nsay e rùn bií.

Áwune wáa kér kìshé'rì. Áwune yò'-oò yiì ne yùtí mendzə́v me mè wáa nyòm e kfə̀n a rə̀sìn bèn.

Wìy lòo dzə é kishiíy kímó' kí, nyám si nèn yèn ji wìr sí wìy lá'a ndzə́v, nèn yii, a yí dóti.

Á nén kèʼ a shìy bií ndzəv, a wìr shiy, wù fò kilíŋ e wùmòʼ.

Wáa dzə e kishiíy kímóʼ kí a Waàŋgáa shiy bií ndzəv, Kimbè'bìy kí nèn wìy wùn à kfəə̀ və wo liyín.

Kimbe'bìy kí dzə́r e Waà̀ngáa jii, "À yii ka fen?"

Waàŋgáa bìnèr jii, "M shìy ndzə́v yér."

Kimbè'bìy kí yóŋ ji wùn Waàŋgáa wàá wáa səərí.

Visəə́rí vin vi dzə̀, aá lo, á kùr wír e kfəə̀, wù nèn sə̀tí sí rə́ a taŋ e kèʼ fo mòʼón e dù mèé e nsə̀kì.

Waàŋgáa biímé visəə́rí.

Kimbè'bìy kí kúr Waàŋgaa, wù sə̀tí sí rə́, e nèn kè' a taŋ mòʼón, baà.

Kimbè'bìy kí nó mendzə́v fo bii fey, e kfən wùr ndzə́v.

Wù máysí, e tù mendzə́v e nèn lò fo fo, a Waàŋgáa kù dzəə́ táŋé.

Waàŋgáa yii màysì kintaŋ e nèn mvə̀' sí.

Wù yoʼ kfə̀n yen fo kimbèʼbìy kí dzəə̀n.

Waàŋgáa rəə́mé, nyám símó' sí nen wìy e bvə̀tì wun.

Nyám si ku shaà fo mbìy a shìy ndzə́v, a wìr shiy wù fó kilíŋ e wùmòʼ. Yii bèy, la wìr mòʼón yòʼ koò Kimbè'bìy.

Kibóŋaàrí kí nèn lò yoŋ jii, "Vèn ma'ti é m shiy". Wù yòŋ bèy e nèn tò é ndzəv, a shìy Kimbè'bìy.

Kimbè'bìy kí wíy, nèn a kwà'tì jii, "Wìr yò' dzə̀ fen!" Wù nèn kèʼ a no mendzə́v.

Wù lo e yù mo kifá ki lumen kiliímé kfə́, e nèn sə̀ŋ wun e nə̀ə́ sho e sar ndzəv.

Nyám símó' sí yú mo Kimbè'bìy kí tóŋ bú'ú, e nèn lèʼ wìy.

Nyám si wìy bèy e kùr Kimbè'bìy.

Kibóŋaàrí kí yòŋ é Kimbè'bìy kí jii, "À yiì kinyo kí nyár ver. Vèr lo e ponér wò." Nyám sidzə̀m si wáa burí Kibóŋaàrí ji wù dzə̀ á ntav wov.

Kèʼ fo kishiíy foo fèy, áwuné nèn a no mendzə́v mev me ranén mè, là kinyo.

You are free to download, copy, translate or adapt this story and use the illustrations as long as you attribute in the following way:

Kibóŋaàrí kee fií

Author - Ntombifuthi Ncwayiba
Translation - Beatrice Tafon Takeh and Mbinkar Emmanuel Keelen
Illustration - Khanyisa Masemola
Language - Lámnsoʼ
Level - First paragraphs