Document

Nomusa woo fií

Zandile Malaza

Simon Mokoena

Yì-iì dzə̀ é ntè' yee Masoyi, a wan woo wiíy wùmò' dzə̀ fó, a dzə̀ fií, aá yoŋ wun ji Nomusa. Wù-uù dzə́ wùn yàá və, a yàá yii lim ngwàsáŋ.

Wír anín veé ntè' fene yò' kì móo yòŋ ŋwà', a móo saŋ. Áwune-eè lim a dzə̀ súm bó a yikír.

Nomusa-aà kòŋ shikur she duun shí, a yàá və lo wù wàa yu wún bi' wun.

Wù yií fəə́ fo shikur kishiíy kidzə̀m, bo yàá kù fó lim yeé sum ye wù waa lìm.

Wù kù-uù kér fó du a jùm akán wùn à menə́n mè me mè yí vifá fo sum.

Nomusa du e kwaʼ, wù nèn lì ghán sidzə̀m a jùm akán wùn à menə́n me, e nèn bùŋ ghán sée yiì lim yeé shikur kijuŋ. Wù nén a yu bír sho.

Wónlě ŋwàʼ anín veé ntèʼ fene-eè lò á nèn kù gòʼ gòʼòn fo laʼ bì' lim yév yeé kwaʼ.

Nomusa nen lò a dór fo kiléʼnìn kee léʼ e menə́n me bàm wùn à áàkáné bàm.

Kwaʼtì yímóʼó nen wìy e wun vifií, wù yóŋ jii, "M yén ji kwaʼtì rə̀ne dzə̀ á e juŋ."

Nomusa lí vicí ve da vi vibaà e tàtí, e nèn lì ghán e kùr. Wù kúr bey, e nèn lì ndzə̀y sə́ se kwa' e mà' e wùn wo.

Wù nán vicí vee shooy e tìír tìítiy e nèn sòv tán é kitu wo.

Yì-iì sì kibámmbó bey!

Nomusa nèn tìír kibámmbó kiy e kintìntìn ke súm ŋgwàsáŋ.

"Kibámmbó kin ki yii lòo lìm kilíŋ kém, é m nèn a yiì lim yeé shikur. Yàá kù lo a kwà' kfə́ ji m dzə́ a e sum," Nomusa ŋwé' shé'.

Kishiíy kidzə̀m, wù lo wù lì kibam kfə́ ké shikur e dù sho e sum.

Wù lo wù gò' wùn à gwǎrkìŋkàŋ e wun, e nèn mà' ndzə̀y sə́ sé kwa' e kibámmbó kí wun.

Lo, wù nèn dù dzə̀ʼə̀m e sar kici, fó kindzə̀ə́ndzəm, a yiì lìmfóla' və.

Vishiíy ví lòo dù Nomusa kwa'ti jii, "Yò' dzə̀ Yàá wìy kìíy vifií ve m yiìn."

Wúné-eè boŋ Nomusa, a kí kfə̀n fó wun ghá'.

Bó akán wùn à menə́n me yò' dzə̀ə nə̀ə́ e súm ŋgwàsáŋ.

Lòo dzə e kishiíy kímó' kí, a shùy teém ne, Yàá nèn dù e sum ji wun kív á ŋgwàsáŋ wo shoòŋ.

Súm-eè dzə̀ ji nyoòŋ. Á yòʼ-oò yú kikum ke kán kìn ké shinə̀n.

Yàá wáa kwà'tì jii, "Fèn dzə̀ bìʼ lim ye juŋe ye Nomusa lime."

Yàá jàŋ jii, "Nomusa! Nomusa! À bèé?"

Bó wìr yoʼ sùŋnín.

Wù nèn lò yèn kibámmbó e kintìntìn ke sum, a kí kér ndzə̀y sé Nomusa e wun.

Yàá yén kinyo ke Nomusa yiìn, e nèn a ker kiŋko'òrwùn bìʼ wán wan və.

Wù yóŋ jii, "Kin ki dìn vifií. Nomusa yò' dzəə́ kér fo a dù e sum ji wun jum a akán kìn menə́n."

Wír veé ntè' fene wáa kòŋ vifií vé Nomusa wìyìn shó. Á bèy, áwune adzə̀me nen kè' a tití vibámmbó aáwune sum sí.

Vibámmbó ví nen kù a jùm akán wùn à menə́n me fo sum sí.

Wóné nen bòy fó a dù a shìy vifá, e nèn a dù lèn a dzə̀ fó shikur.

You are free to download, copy, translate or adapt this story and use the illustrations as long as you attribute in the following way:

Nomusa woo fií

Author - Zandile Malaza
Translation - Beatrice Tafon Takeh and Mbinkar Emmanuel Keelen
Illustration - Simon Mokoena
Language - Lámnsoʼ
Level - First paragraphs