M'musi wa Misoyi, mwapali msikana jwakalamuka jwajwaŵilanjigwaga kuti Patuma.

Ŵatamaga ni anganga ŵawo ŵakongwe, ŵaŵaliji mlimi jwa yimanga.

Ŵandu ŵajinji ŵa m'musiwo nganakombolaga kuŵalanga kapena kulemba.

Ŵapataga yakusosekwa ya pawumi pawo kutyocela muwulimi.

Patuma ŵanonyelaga kwawula kusukulu, ni anganga ŵawo ŵakongwe ŵaliji ŵakusangalala nawo.

Lisiku lililyose ali awusile kusukulu, anganga ŵawo ŵakongwewo ŵampaga masengo gakutenda mumgunda.

Ŵajenelaga kutopola majani ni yijuni yayasakaga kulya mbeju.

Patuma ŵayiwonaga yakusawusya kutopola majani ni yijuni musi wosope. Ndaŵi syejinji nganakolaga ndaŵi jakutendela masengo gawo ga kusukulu gakutendela kunyumba.

Ŵanace ŵajinji ŵa m'musiwo nganajawulaga kusukulu ligongo ŵakwete masengo kumigunda.

Pakupita kwandaŵi, Patuma ŵapitililaga kupela ni kutoposya yijuni nambo soni majani.

"Ngwete nganisyo jambone," ŵaganisisye.

Patuma ŵataŵikenye mwakusamala yitela yiŵili yelewu. Ŵayiwecice yitelayo yakuwala yawo yaŵawalaga pakamula masengo.

Ŵayijimice yitelayo ni kuŵika cisoti cawo caŵawalaga pakamula masengo pacanya pakwe.

Caliji cinyago!

Patuma ŵaŵisile cinyagoco pasikati ja mgunda wa yimangawo.

"Cinyago celeci cicijigale malo gangu pacimbeje ndili mkutenda masengo ga kusukulu. Anganga caganisyeje ndili kumigunda," Patuma ŵamwetulile.

Lisiku lililyose, ŵajigalaga kumigunda cikwama cawo cakujigala kusukulu.

Ŵaŵaga ali awete yunifolomu ja kusukulu jawo ni kuciweca cinyagoco yakuwala yawo yakuwala pakamula masengo.

Kaneko, ŵatendaga masengo gawo ga kusukulu gakamulila kunyumba pam'bulili wa citela.

Masiku gapitile ni Patuma ŵaganisisye kuti, "Anganga ngasamanyilila yakwamba pulani jangu jalunda."

Patuma ŵaliji ŵakusangalala ni ŵakusimonga ndaŵi jimo.

Majani ni yijuni nganiyijinjilaga mumgunda wa yimangawo

Musi winewakwe, anganga ŵawo ŵakongwewo ŵapite kumigundako kujigala yimanga yeŵisi.

Mumgundamo mwaliji mwangali masegwe. Mwaliji mwangali majani kapena yijuni palipose.


Anganga ŵawo ŵakongwewo ŵaganisisye kuti, "Patuma akukamula masengo gambone."

Anganga ŵawo ŵakongwewo ŵaŵilasile, "Patuma! Patuma! Mli kwapi?"

Kwali kwangali kwanga kulikose.

Ni kaneko ŵaciweni cinyago pasikati ja mgunda, cili ciwete yakuwala ya Patuma!

Anganga ŵawo ŵakongwewo paŵamanyililaga yatesile Patuma, ŵaliji ŵakusangalala naco cisukulu cawo cacikongweco.

Ŵaganisisye kuti, "Yeleyi yili yalunda mnope. Patuma ngakwenela kwawula kumigunda kutopola majani ni yijuni."

Ŵaliwose m'musimo ŵasinonyele nganisyo syalunda sya Patuma. Wosope ŵatandite kukamulisya masengo yinyago m'migunda jawo.

Yinyagoyo yatendekasyaga kuti majani ni yijuni yikajinjila m'migundajo.

Ni myoyo ŵanacewo ŵakombolekaga kwawula kusukulu m'malo mwakulindilila mbeju.