Rajabu ŵatamaga ni acanganga ŵawo, baba ŵawo ŵakongwe ni mjomba ŵawo. Ŵakwete nguku, mbusi, ngondolo ni liguluŵe.

Ngukujo jatamaga m'citundu camwana. Mbusi, ngondolo ni liguluŵe cilicoseco cataŵigwaga mumbali mwa lipupa. Acanganga ŵawowo ŵali ciŵela macili. Baba ŵawo ŵakongwe ni mjomba ŵawo ŵakamucisyaga kukamula masengo.

Yeleyi yacenjile yili yipite yaka yamnono. Acanganga ŵawo Rajabu ŵakalambele ni nganakombolaga kupikana kapena kulola cenene.

Baba ŵawo ŵakongwe ŵatandite kulwalalwala ni nganakombolaga kusamalila m'nyumbamo.

Mjomba ŵawo ŵagambaga gona ni nganakamucisyaga kulisya yinyamayo.

Yinyamayo yatendaga masegwe mnope ligongo yaliji ni sala.

Nyumbajo jaliji jangasamalila ligongo baba ŵawo ŵakongwe nganajisamalilaga.

Rajabu ŵaŵaga ŵakupela ndaŵi syosope. Ŵajenelaga kwawula kukusosa yakulya ya wosope.

Rajabu nganakombola kutama cenene ni mwayaŵelele yindu. Ŵaŵendile acanganga ŵawo kuti ŵasalile litala lyakumalana nayo yakusawusyayo.

Nganasangalala ligongo acanganga ŵawowo nganayitendela atende yaŵaŵecetagayo.

Baba ŵawo ŵakongwe ŵakulwala ŵatite kuti, "Une yangusaka ni kugona ni kwimuka kundaŵi."

Mjomba ŵawo ŵawulesi ŵatite kuti, "Msumisye yinyamayo ni mwasumile yakulya acanganga ŵenu. Cagoneje ni ngamlagasyaga m'mwejo."

Rajabu yasakalisye. Ŵatite kuti, "Mjomba, mkumanyilila kuti nganimbasumisye yinyamayo. Ni cipanje peco cangwete."

Cilo cinecakwe Rajabu nganagona lugono. Ŵamkumbucile jwamlume jwalunda jwaŵamkulupililaga ŵandu kuti jwakwete matala gakumalana ni yakusawusya yosope.

Rajabu ŵayijigele yinyama yakwe ni kwawula ku jwalumejo. Ŵajitaŵile lukonji mbusi, ngondolo, nambo soni liguluŵe ni ŵajinyakwile nguku.

Rajabu ŵayice kunyumba kwa jwamlume jwalundajo, ali apesile nambo soni jili jwakwete sala.

Pambesi pakumlondecesya jwalume jwalundajo yakusawusya yawo, jwamlume jwalundajo jwatite kuti, "Cinamkamucisye nambo mtende yacinjile kamsalile."

Rajabu ŵajanjile kuti, "Cindende cilicose kuti malane ni cakusawusya cangu."

Jwamlume jwalundajo jwatite kuti, "Myilece yinyamayo akuno ni mwujile ku nyumba jenu."

Rajabu ŵatite kuti, "Nambo mbele ndili mkutama ni yinyama yangu kwa ndaŵi jelewu. Ni cipanje peco cangwete."

Jwamlume jwalundajo jwatite kuti, "Namsalile kuti cinamkamucisye nambo mtende yacinjile kamsalile."

Rajabu ŵasosekwaga kukola litala lyakumalana ni cakusawusya cawo. Ŵayilesile yinyamayo ni kuwujila kumangwawo.

Nyumba jawo jaliji jajii mnope ni jangali kalikose. Ŵaliwose ŵayisoŵile yinyamayo. Acanganga ŵawo Rajabu ŵadandawile ligongo nganakola mkaka wa mbusijo.

Mjomba ŵawo ŵatite kuti, "Tuli ŵakulaga mnope, ŵaliwose akutuseka."

Rajabu nganakombola kuŵa cenene ni yidandawuloyo. Kupwatika pelepo, nombe nawo ŵayisoŵile yinyama yawoyo.

Ŵawujile ku jwamlume jwalundajo kukuwusya lunda. "Umi uli wakulekangana mnope pakuli kwangali yinyama yangu m'nyumba jetu. Acalongo acimjangu ayisoŵile mnope yinyamayo."

Jwamlume jwalundajo jwatite kuti, "Cinamkamucisye nambo mtende yacinamsalile. Mjawule kumangwenu ni mkakoposye acanganga ŵenu m'nyumba."

Rajabu ŵatite kuti, "Mpaka ndende yeleyo camtuli? Jemanjawo ali acanganga ŵangu nambo soni akusandalila une."

Pambesi pakwe, Rajabu ŵapite kumangwawo ni ŵatesile yaŵasalileyo. Nganakola mtendele wamumtima uliwose.

Acanganga ŵawo nganakola kulikose kwakwawula. Ŵagambaga kwendajenda, kulinga kuti akagunda yindu. Ŵapikanaga kutukutila kwa lyuŵa musi ni kusisima cilo.

Baba ŵawo ŵakongwe ŵalisile kuti, "Ngasimunjasa pasa!"

Mjomba ŵawo ŵawulesi ŵalisile kuti, "Nombe une ngasimunjasa pasa!"

Rajabu nganakombola kuŵa cenene nayo yeleyo. Ŵawujile ku jwamlume jwalundajo ali ŵakusokonecela nganisyo nambo soni ŵakutumbila.

Ŵalisile kuti, "Yeleyi yekulungwa kwa mundu jumo. Mumbe litala lyambone lyakumalana ni cakusawusyaci."

Jwamlume jwalundajo jwatite kuti, "Myice akuno, myijigalile yinyama yenu kumangwenu ni mwawucisye acanganga ŵenu m'nyumba."

Rajabu ŵatesile yaŵasalileyo. Baba ŵawo ŵakongwe ŵatite kuti, "Cisamalile m'nyumba."

Mjomba ŵawo ŵalesile kutenda ulesi ni ŵakamucisyaga Rajabu masengo. Wosope ŵaliji ŵakusangalala kane soni.