Mandu odeka ukikaia na weke wawae, mruna ndee na ndee wake. Odefugha nguku, mburi, ng'ondi and nguwe.

Nguku yedeka ikikaia kwa kitangara kitini. Mburi, ng'ondi na nguwe redeka rikifungwa idawonyi. Weke wawae bado wedeka na ndighi. Mruna ndee nan dee wake wedeka wikitesia kazi.

Miaka ndiwi kufuma iro ngelo malagho ghikaghaluka. Weke wawae wikaghosia n ahata kulemwa ni kusikira angu kuwona nicha.

Mruna ndee ukazoya kuwuya mkongo hata ukazoya kulemwa ni kubonya wusafi ghwa nyumba. Ndee wake ukazoya kulala kila ngelo na kulemwa ni kutesia kulela mifugho.

Mifugho rikazoya kudoka nandighi kwa wundu ghwa njala.

Nyumba ikakaia yalua nandighi angu mruna ndee usedimaa kubonya wusafi ghwa nyumba.

Mandu ukakaia ukisilwa ni ndighi kila ngelo. Odeka ukifuma kila ituku ukienda lola posho kwa wundu ghwawo.

Mandu ukazoya kulemwa ni iyo hali. Ukazera weke wawae wimuneke isuluhisho. Ndoupoiloghe angu weke wawae wedelemwa ni kumusikira.

Mruna ndee ukaghora, "Ichi nikunde ni kudima kulala nicha nakio na kuwuka ndoo ikaela."

Ighade ja ndee wake jikaghora, "Uza iri mifugho eri kugue weke wawayo vindo. Widalala na wisighe kukusumbua."

Mandu ukazamilwa. Ukaghora, "Aba, kwamanya putu sidima kuuza iri mifugho. Nirereni mali niko nayo."

Kuo chimu Mandu ukawuka, Ukaririkanya mundumu omanyikane kwa kukaia na masuluhisho ra kila wasi.

Mandu ukwusa mifigho rake na ukaenda muwona uo mundu. Ukawika Kamba kwa mburi, ng'ondi na nguwe anduamweri na ukaduka nguku.

Mandu ukavika kwa uo mundu wachoka na sena wabaghwa ni njala.

Uenda mghoria uo mundu wasi ghwake, uo mundu ukaghora, "Nikutesiaa ela mpaka kubonye seji nighora."

Mandu ukaghora, "Nibonyagha kilambo chochose ela kumeria wasi ghwapo."

Uo mundu ukamzera, "Sigha iri mifugho anyaa alafu kuwue nyumbenyi kwako."

Mandu ukaghora, "Lakini neishi na mifugho rapo kwa ngelo ndacha. Niyo mali niko nayo."

Uo mundu ukaghora, "Nekuzerie nikutesiaa ela kubonye seji naghora."

Mandu odekunda isuluhisho ja wasi ghwake. Ukasigha mifugho rake ukagala.

Nyumba yake yedenyama na kukaia nduu. Kila umweri oderirwa ni mifugho. Weke wawae wikalalamika kwa kusowa mariwa gha mburi.

Ndee wake ukaghora, "Deka wakiwa, ata kila mundu wawediseka."

Mandu ukalemwa ni malalamiko. Upande ghumu, uderirwa ni mifugho rake pia.

Ukawuya kwa uja mundu kulola wasia. "Maisha gheka Tofauti bila mifugho nyumbenyi. Wakichuku wapo warirwa ni rereni shuu."

Uhu mundu ukaghora, "Ini nikutesiaa lakini mpaka kubonye siji nakuzera. Gala mzinyi kuende kufunye weke wawayo shighadi ya nyumba."

Mandu ukaghora, "Ijo nijibonyaa wada? Awa ni weke wawa na wadanitegemia."

Mwisho ghwaro, Mandu ukagala ukenda ukabonya seji ozereloghe, ukasowa sere putu.

Weke wawae ndewenee andu koenda. Wikazoya kumaramara eri wisekwane na ghamu mazima. Wedeka wikisikira mruke nadime na mbeo nakio.

Mruna ndee mkongo ukalila ukighora, "Kuseke niwinga!"

Ighade ja ndee wake jikamzera, "Ata ini wori kuseniwinga!"

Mandu odechokeshwa ni agha malagho. Ukawuya kwa uja mundu waranganyikilwa na kuzamilwa.

Ukalila ukighora, "Agha malagho ni mabaha nandighi kwa mundu umweri. Nineke isuluhisho jimu izima."

Uja mundu ukaghora, "Indoko, wusa mifugho rako kugale naro na kuwunje weke wawayo nyumbenyi."

Mandu ukabonya seji ozereloo. Mruna ndee ukaghora, "Ini nidasafisha nyumba."

Ndee wake ukasigha kughada ukawoka kumtesia Mandu kazi. Wose wikakaia na kupoilwa kungi sena.