Kokala, nyamandu ra isakenyi redesowa machi.

Rikalola kila andu rikasowa.

Rikakuana kulola isuluhisho ja wasi gwawo.

Nyamandu rose rikacha kwa kipughi ela, Koshi ya isakenyi ndeyechee.

Koshi ya isakenyi ikaghora, "Nidima wada kuenda kwa kipughi na kobe inukagha?"

Aho kipughinyi, nyamandu rikarumiriana rikote ndiwa.

Kilemu ikaghora, "Ndiwa yedu idakaiya ndenyi na shapa. Ikachua, jingi ndedisowagha machi sena."

Rikabora na kuvina rikibariana kukota ndiwa.

Mwisho ghwaro, machi ghikavara kufuma ndoenyi na ghikachura ndiwa.

Rikapoilwa shuu. Jingi nderetoiee machi ngisingie na ghiko ghielie.

Alafu, ituku jimu, nyamandu rikashuku kukaiya umweri wawo odeka ukiogelea machinyi na kughilusha.

Wikawusa ngelo relindia ndiwa.

Edeka ni ngelo ya Kwaru kulindia ndiwa. Koshi ya isakenyi ikacha na kamba yake yerama.

"Kwawebonya kii aha?" Koshi ya isakenyi ikakotia.

"Nawelindia machi ghedu," Kwaru ukatumbulia.

Koshi ya isakenyi ikakotia Kwaru risarighanye.

Ugho mchezo ghodeka ni ghofunga umweri waro na kamba, kubula meso na kutala mpaka lufu lumweri.

Kwaru ukarumiria kusarigha.

Koshi ya isakenyi ikafunga Kwaru, ukabula meso na ukazoya kutala.

Koshi ya isakenyi ikanywa machi kufuma ndiwenyi na ikaogoelea.

Nyuma yaro, Koshi ya isakenyi ikawusa machi na ikaenda. Kwaru ukakaiya bado wawetala.

Kwaru ukameria kutala na ukafungua meso.

Koshi ya isakenyi ndeikoghe andu kungi.

Kwaru ukakema nyamandu zima riche rimfunguo.

Nyamandu rikaendelea kuwusa ngelo yelindia ndiwa, ela rose rikalemwa ni kuwada Koshi ya isakenyi.

Kobe ukaghora, "Sigha ini nilindie." Ukarama ndiwenyi kondenyi kuweseria Koshi ya isakenyi.

Koshi ya isakenyi yendavika, ikaririkanya, "Nyamandu ingi ndeiko aha!" Ikazoya kunywa.

Ikasikira kilambo chamluma lumi lwake. Na ukarudwa machinyi kondenyi!

Nyamandu rimu rikacha rikikimbia rendasikira Koshi ya isakenyi ikilila na kukabakaba machi.

Nyamandu rikafunga Koshi ya isakenyi.

Kobe ukaizera Koshi ya isakenyi, "Kwadikosera isi diwose. Kudanekwa kitubio." Nyamandi rikamsifu kobe sa ishujaa jawo.

Kufuma ijo ituku, wikaendelea kupoilwa ni kunywa machi ghielie bila kuredelwa wasi.