Kwa kijiji cha Masoyi, kodeka na mwana wa waka mwerevu uwangwagha Nomusa. Odeka ukikaia na wawae, mkulima wa mapemba.

Wandu walazi kwa kijiji ndewiichi kushoma na kuandika. Wadapata posho rawo kuidia kwa wukulima.

Nomusa odepoilwa ni kuenda sikulu, na wawae odeka ukipoilwa ni omoni shuu.

Kila ituku baada ya sikulu, wawae odeka ukimneka kazi mbuwenyi.

Odeka ukiwinga sawau na nyonyi rekundagha kuja mimea.

Nomusa ukakurilwa kuwinga sawau na nyonyi dime yose. Ndeokoghe ukipata ngelo emeria kazi yake ya sikulu.

Wana wengi aho kijijinyi wedelemwa ni kuenda sikulu kwa wundu ghobonya kazi mbuwenyi.

Baada ya ngelo, Nomusa ukaendelea kusilwa ni ndighi yewinga nyonyi na sawau.

"Neko na iwazo jipoie," ukaririkanya.

Nomusa kwa kuzighana nicha ukafunga vangu viwi andu kumweri. Ukavirusha nguwo rake rebonya kazi.

Ukawadia ivo vangu kimusi ukavirusha kofia yake ya kazi naighu.

Ikakaia sanamu!

Nomusa ukawika iyo sanamu aghadi ya mbuwa ya mapemba.

"Ihi sanamu idawusa wulalo ghwapo nikiendelea kubonya kazi ya sikulu. Wawa udamanya neka mbuwenyi," Nomusa ukavivira.

Kila ituku, odeka ukidwa kikuchu chake cha sikulu mbuwenyi.

Odebaki na nguwo rake ra sikulu na kurusha nguwo rake ra kazi iyo sanamu.

Alafu, ukabonya kazi yake ya mzinyi kijunyi cha mudi.

Matuku ghikaida na Nomusa ukaririkanya, "Jingi wawa ndouchamanya kuhusu mpango gwake ghwa kierevu."

Nomusa odepoilwa na kushinika ichenio ngelo.

Sawau na nyonyi nderecheingia mbuwenyi ya mapemba.

Dime imu, wawae Nomusa ukaenda mbuwenyi kuwusa mapemba mawishi.

Mbuwa yedeka yanyama na ndighi. Sawau angu nyonyi nderekoghe andu kungi.

Wawae ukajizera, "Nomusa wawebonya kazi ipoiye."

Wawae ukawanga, "Nomusa! Nomusa! Koko hao?"

Ukasowa ijibu.

Alafu ukawona sanamu aghadi ya mbuwa, yarwa nguwo ra Nomusa!

Wawae uendamanya ichi Nomusa ubonyere, ukapoilwa ni mchukua wake.

Ukaririkanya, "Ughu ni wuerevu. Sio lazma Nomusa uende mbuwenyi kuwinga sawau na nyonyi noko."

Wandu wose kijijinyi wedepoilwa ni iwazo ja wuerevu ja Nomusa. Wose wikazoya kutumia sanamu mbuwenyi mzawo.

Iro sanamu redeka rikiwika sawau na nyonyi kula na mbuwenyi.

Na wana wikakaia wikienda sikulu badala yeenda lindia mimea.