Ituku jimu ja mruke, Khosi odeka ukienda enda ukilemwa ubonye wada.

Mae odeenda cha mbuwenyi ukamsigha Khosi nanyuma.

"Nibonyagha wada?" Khosi ukajizera.

Khosi ukapata iwazo.

"Naweenda bung'a modenyi, ela niendanya na ani?" Ukaririkanya Khosi.

Iro ngelo Mae Sophie ukaidia ukienda cha modenyi. Odeduka kidasi kibaha chachua nguwo.

"Nawemnugha Mae Sophie modenyi!" Khosi ukajizera.

"Nadima niendanye na oho modenyi? Khosi ukakotia. Mae Sophie ukavivira na ukamrumiria.

Chienyi, Nozipho ukakuana nawo. Nozipho ndoupoilwa ni kubung'a ela wadapoilwa ni kuzighana wambao wikibung'a.

Aje modenyi Khosi ukajizera, "Idime, nameria kubung'a na machi gha ighu ighu, sa mwana mtini! Naweenda bonyera kila mndu nadima kubung'a kwa machi ghiko ndenyi ata ini."

Ukajikumba modenyi. Ukaghipacha!

Nozipho ukamzighana kwa kula.

Nozipho ukizighana, wana wose wedeka wikipoilwa ni kukaia modenyi.

Wedeka wikibung'a kwa kudoghoda.

Wikidoghoderana kwa kupoilwa wiko machinyi.

Nozipho ukazighana sena nicha, ukawona wuzima. Khosi odeka ukibung'a kula na wana wambao. Nozipho ukasoghoda kavui ukazighana sena.

Ukaobushwa ni ichi uwonie, ukakimbia kwa waka wamu wekoghe wikioghosha nguwo rawo modenyi.

"Nitesienyi! Khosi waweneng'ena machinyi," Nozipho ukakema.

Kwa ngelo ndini tu, Mae Sophie ukarama machinyi. Ukabung'a nokoisi cha modenyi.

Ukangia machinyi kondenyi, ukafuma, alafu ukangia sena ukimlola Khosi.

Ukamuwada Khosi mkonu ukabung'a nao paka kwa machi gha ighu ighu. Alafu, Mae Sophie ukamduka Khosi ukamfunya modenyi.

Mae Sophie ukaida shwa shwa kwa kipughi cha wana na waka wikikema na kudoghoda.

Nozipho ukakimbia nanyuma yake shwa shwa wikienda kwa kiliniki cha kijijinyi ukimuwadia Khosi mghongo.

Aja kiliniki Mae Sophie ukakwana na mrighiti Noxolo ukamkimbiria kumtesia.

Mrighiti Noxolo ukamuwusa Khosi shwa shwa ukamngira kwa chumba na warighiti wazima wikacha shwa shwa kumtesia.

"Oko nicha! Deko na bahati ndoukaiye machinyi kondenyi ngelo ndacha!" mrighiti Noxolo ukaghora.

Mae Sophie ukafura ngungu kwa kusikira nicha.

Kila mundu kiliniki ukamneka hongera kwa wujasiri ghwake na maarifa ghebung'a.

"Ni chawucha angu nadima kukira maisha," Mae Sophie ukaghora kwa wunyenyekevu.

Maeresho ghikamvikia Chifu. Ukaduma mdumwa umuwange Mae Sophie.

Mae Sophie ukamweleza Chifu seji omanyireghe kubung'a nicha.

"Sa mwana, mgenyi wapo odeka ukikaiya na kimonu cha moda. Machi ghedeka ni malagho gha kila ituku. Ikadishekeria dimanye kubung'a!" ukaghora.

Chifu ukawanga wandu kipughinyi na kuwizera udamneka Mae Sophie zawadi kwa wundu ghwa wujasiri.

Waka wikakaba vigelegele, womi wikakaba meri, wana wikadoghoda kwa kupoilwa. Kufuma ijo ituku, wana wikakaia wikimnugha Mae Sophie, wikibora, "Ndekune kilambo chingi chiniadadagha, nikakanya na Mae Sophie, mjasiri, nikakanya nao!"