Korekoghe na mwana wa waka uwangwagha Maṱodzi.

Maṱodzi odeka ukikaia kijijini na mae na wawae.

Ituku jimu, mae Maṱodzi ukamzera uenje wujumbe kwa mruna mae kijijinyi kizima.

"Kunughe ija chia diitumia," mae ukamkumbusha Maṱodzi.

Maṱodzi ukanughiria ichenija chia uichi yeenda kwa nyumba ya mruna mae ukavisa wujumbe.

Ukielekea mzawo, ukaskira lwaka lutini kavui lukighora, "Nalomba kunitesie."

Maṱodzi ukazighanazighana ukawona mka walala barabara.

Ukaroghua uo mka alafu ukamkotia, "Kwaki kwalala andonyi aha?"

Uo mka ukamtumbulia, "Nasilwa ni ndighi na neka mkongo, na sena neka kula shuu na mzinyi."

Maṱodzi ukamwonia uo mka wughoma.

Ukamzera uo mka, "Nidakuenja mzedu angu koko kavui."

Maṱodzi ukamtesia uo mka kuwuka. Wikaendanya mboa mboa paka wikavika.

Maṱodzi na mae na wawae wikamzighana uo mka paka ukasikira nicha.

Uo mka odewishukuru kwa kumzighana.

Ukamsifu Maṱodzi kwa kukaia na wujasiri na ngolo ya wughoma.

Uo mka ukamzera Maṱodzi na wandu wa kwawo, "Jingi siduagha niliwe ichi munibonyere.

Baada ya matuku adadu, nekunde munighorie haja renyu iwi."

Ghendaida matuku adadu, Maṱodzi na mae na wawae wikanekana haja rawo iwi.

Haja ya imbiri wipate nyumba ighokie.

Ya kawi wikaie na kilemba kavui na nyumba eri wiseendeghe kula kulola mbande.

Haja rawo rose rikatimizwa, seji uja mka oghorieghe.

Maṱodzi na wandu wa kwawo wikakaia na kupoilwa andenyi ya nyumba ya mzawo kavui na kilemba.