Mandu kɛ enaa, enii, enyɛkwɛ̃ kɛ etsɛkwɛ̃ ko hi shi. Eyɛ kooloo, wuɔ, too abotia, too gwantɛi kɛ kpootoo.

wuɔ lɛ hi tsũ bibioo ko mli. Akɛ too abotia , too gwantɛi kɛ kpootoo lɛ fĩ gbogbo lɛ he. No mli lɛ, enaa kɛ enii lɛ he wa lolo. Nyɛkwɛ kɛ tsɛkwɛ̃ ye amɛbua yɛ nitsumɔ lɛ mli.

Enɛ tsake yɛ afii fioo komɛi asɛɛ. Mandu naa kɛ enii edara ni amɛnuuu nii loo amɛnaaa nii jogbaŋŋ.

Hela mɔ enyɛkwɛ̃ lɛ ni enyɛɛɛ eye ebua ni asaa shia lɛ mli.

Etsɛkwɛ̃ lɛ wɔɔ be fɛɛ be ni eyeee ebuaaa kooloi lɛ niyenii.

Koolooi lɛ fee hoo waa ejaakɛ hɔmɔ miiye amɛ.

Shĩa lɛ mli ewo muji waa ejaakɛ enyɛkwɛ̃ lɛ esaaa jɛi.

Etɔ Mandu be fɛɛ be. Ehe bahia ni eje kpo daa gbi koni eyatao niyenii eha amɛ fɛɛ.

Mandu nyɛɛɛ adamɔ shihilɛ lɛ naa dɔŋŋ. Ebi enaamɛi ni edara lɛ koni amɛha lɛ tsabaa. Emii shɛɛɛ ehe ejaakɛ enaamɛi nuuu lɛ toi.

Etsɛkwɛ̃ ni hela mɔ lɛ kɛɛ, "Nɔ pɛ ni misumɔɔ ji ni manyɛ mawɔ gbɛkɛ ni mate shi leebi."

Etsɛkwɛ̃ ni bɛ jwɛŋmɔ lɛ kɛɛ, "Hɔɔ kooloi lɛ ni ohé niyenii oha onanamɛi. Amɛbaawɔ ni amɛgbaŋ bo naa."

Mandu mli fu. Ekɛɛ, "Tsɛkwɛ, ole akɛ minyɛɛɛ mahɔ̃ɔ kooloi lɛ. Amɛ pɛ ji ninamɔ ni miyɔɔ."

Gbi ko gbɛkɛ lɛ, Mandu kã shi. Ekai nilelɔ ko ni aheɔ ayeɔ akɛ eyɛ naagbai fɛɛ anaa tsabaa lɛ.

Mandu kɛ ekooloi lɛ tee ni amɛyasara nilelɔ lɛ. Ekɛ kpã fɔ̃ɔ too, too kɛ kpootoo nɔ ni ewoɔ kooloo lɛ.

Mandu yashɛ nilelɔ lɛ shia, ni etɔ lɛ ni hɔmɔ hu miiye lɛ.

Beni nilelɔ lɛ gbala enaagba lɛ mli etsɔɔ nilelɔ lɛ sɛɛ lɛ, ekɛɛ, "Maye mabua bo shi esa akɛ ofee bɔ ni mikɛɔ lɛ."

Mandu ha hetoo akɛ, "Mafee nɔ fɛɛ nɔ koni matsu minaagba lɛ he nii."

Nilelɔ lɛ kɛɛ akɛ, "Shi kooloi lɛ yɛ biɛ ni oya oshia."

Mandu kɛɛ, "Shi mikɛ mi kooloi lɛ ehi shi be kakadaŋŋ. Amɛ pɛ ji ninamɔ ni miyɔɔ."

Nileelɔ lɛ kɛɛ, "Mikɛɛ bo akɛ maye mabua bo shi esa akɛ ofee bɔ ni mikɛɔ lɛ."

Ehe miihia ni Mandu ana enaagba lɛ naa tsabaa. Eshi ekooloi lɛ ni eku esɛɛ kɛtee shĩa.

Eshia lɛ mli efee dioo tsɔ ni nɔ ko bɛ mli. Mɔ fɛɛ mɔ hiɛ kpa koolooi lɛ anɔ. Mandu naa kɛ nii wie huhuuhu ejaakɛ amɛbɛ too lɛ fufɔ mli nu.

Tsɛkwɛ lɛ kɛɛ, "Wɔye ohia waa, mɔ fɛɛ mɔ miiŋmɔ wɔ."

Mandu nyɛɛɛ akpee huhuuhu wiemɔi lɛ anaa dɔŋŋ. Kɛfata he lɛ, ehiɛ kpa ekooloi lɛ hu anɔ.

Eku esɛɛ kɛtee nilelɔ lɛ ŋɔɔ koni eyabi lɛ ŋaawoo. "Shihilɛ yɛ srɔto kwraa kɛji mi kooloi bɛ shĩa. Miwekumɛi lɛ ahiɛ kpaa amɛnɔ waa."

Nilelɔ lɛ kɛɛ, "Maye mabua bo shi esa akɛ ofee bɔ ni mikɛɛ bo lɛ. Yaa shia ni oyajie onanamɛi kɛjɛ shia."

Mandu kɛɛ, "Te mafee tɛŋŋ mafee nakai? Amɛji minaa kɛ minii ni hiɛ ka minɔ."

Yɛ naagbee lɛ, Mandu tee shia ni eyafee bɔ ni akɛɛ lɛ lɛ. Ebɛ jwɛŋmɔŋ toiŋjɔlɛ ko kwraa.

Enaa kɛ enii bɛ he ko ni amɛbaaya. Amɛbɔle amɛhe, ni amɛmiitao ni amɛkɛ nibii akakpe. Amɛnu dɔlɛ he yɛ shwane mli, ni amɛnu fɛ̃i he gbɛkɛ.

Enyɛkwɛ̃ ni bɛ hewalɛ lɛ fo akɛ, "Kaashwie mi kɛje kpo!"

Etsɛkwɛ̃ anihaolɔ lɛ bolɔ akɛ, "Kaashwie mi hu!"

Mandu nyɛɛɛ ekɛtsu nii dɔŋŋ. Eku esɛɛ kɛtee nilelɔ lɛ ŋɔɔ ni eyiŋ efutu lɛ ni emli efu.

Efo ni ekɛɛ, "Enɛ fa tsɔ kɛha mɔ kome. Ha mi tsabaa kpakpa."

Nileelɔ lɛ kɛɛ, "Naa, okɛ okooloi lɛ aya shia ni okɛ onanamɛi aku sɛɛ kɛba shia."

Mandu fee bɔ ni akɛɛ lɛ lɛ. Etsɛkwɛ̃ kɛɛ, "Matsumɔ shĩa lɛ mli."

Etsɛkwɛ̃ kpa anihaofeemɔ ni eye ebua Mandu kɛ nitsumɔ. Amɛ fɛɛ amɛmii shɛ amɛhe shikome ekoŋŋ.