Yɛ hulutsoo be mli gbi ko ni edɔ waa lɛ, Khosi miiho kɛmiiya kɛmiiba, ni eesusu nɔ ni ebaafee lɛ he.

No mli lɛ, emami etee ŋmɔ mli ni eshi Khosi.

"Mɛni mafee mi diɛŋtsɛ mihe?" Khosi kɛɛ ehe.

Jwɛŋmɔ ko ba Khosi jwɛŋmɔ mli.

"Miiya nu yɛ faa lɛ naa, shi namɔ baafata mihe?" Khosi susu he.

Nakai beaŋ lɛ, Mama Sophie ho kɛmiiya faa lɛ naa. Ehiɛ kɛntɛŋ agbo ko ni atadei eyi mli obɔ.

"Miiya ni mayanyiɛ Mama Sophie sɛɛ kɛya faa lɛ naa!" Khosi kɛɛ ehe.

"Ofainɛ, ani manyɛ mikɛ bo aya faa lɛ naa?" Khosi bi lɛ. Mama Sophie ŋmɔ ni ekɛ ehiɛ tsɔɔ ŋwɛi.

Yɛ gbɛ lɛ nɔ lɛ, Nozipho bafata amɛhe. Nozipho sumɔɔɔ nu wumɔ kɔkɔɔkɔ shi esumɔɔ ni ekwɛ mɛi krokomɛi ni wuɔ nu lɛ.

Yɛ faa lɛ naa lɛ, Khosi kɛɛ ehe akɛ, "Ŋmɛnɛ, migbe nu ni mli kwɔɔɔ mli wumɔ naa, tamɔ abifao! Miiya ni matsɔɔ mɔ fɛɛ mɔ akɛ mi hu manyɛ mawu yɛ nu ni mli kwɔ mli."

Ekɛ ehe wo faa lɛ mli. Shwiemɔ!

Nozipho kwɛ kɛjɛ he ko ni yɔɔ shweshweeshwe.

Beni Nozipho kwɛɔ lɛ, no mli lɛ gbekɛbii lɛ fɛɛ miijie amɛhiɛtserɛ yɛ faa lɛ mli.

Amɛmiiwu nu lɛ kɛ hoofeemɔ.

Amɛbolɔ amɛwo amɛhe kɛ miishɛɛ yɛ nu lɛ mli.

Nozipho kwɛ jogbaŋŋ ekoŋŋ, nɔ ko tamɔ nɔ ni yɔɔ srɔto. Khosi miiwu nu yɛ he ko ni kɛ gbekɛbii krokomɛi lɛ teŋ jɛkɛ. Nozipho tsi ebɛŋkɛ ni ekwɛ ekoŋŋ.

Akɛni nɔ ni ena lɛ wo lɛ gbeyei hewɔ lɛ, ejo foi kɛtee yei ni miifɔ amɛnibii ahe nii yɛ faa lɛ naa lɛ aŋɔɔ.

Nozipho bolɔ akɛ, "Aye abua me! Nuŋmi Khosi.

Yɛ ŋmlɛ mlijaa kome mli lɛ, Mama Sophie tu kɛbote nu lɛ mli. Efo faa lɛ shishi.

Ekɛ ehe wo nu lɛ shishi, kɛkɛ ni ekwɔ, kɛkɛ ni ekɛ ehe wo shishi ekoŋŋ, ni etao Khosi.

Emɔ Khosi nine mli ni efo kɛtee nu ni mli kwɔɔɔ mli lɛ mli. Kɛkɛ ni, Mama Sophia wo Khosi kɛjɛ faa lɛ mli.

Mama Sophie kɛ oyaiyeli tsɔ gbekɛbii kɛ yei akuu ni miifó ni amɛmiibolɔ lɛ hiɛ.

Nozipho jo foi kɛnyiɛ esɛɛ beni ekɛ oyaiyeli tee akrowa lɛ helatsamɔhe lɛ, ni ehiɛ Khosi yɛ esɛɛ lɛ.

Yɛ helatsamɔhe lɛ, nɛsifonyo Noxolo ni jo foi kɛtee koni eyaye ebua lɛ kɛ Mama kpe.

Nɛsifonyo Noxolo kɛ Khosi tee tsu ko mli oya ni nɛsifonyo krokomɛi fee oya koni amɛbaye amɛbua.

"Eyɛ jogbaŋŋ! Wɔyɛ naagba akɛ ebɛ nu shishi ŋmlɛ kome po dɔŋŋ!" nɛsifonyo Noxolo kɛɛ.

Mama Sophie mu hejɔɔmɔ kple ko. waa.

Mɔ fɛɛ mɔ ni yɔɔ helatsamɔhe lɛ jie lɛ yi yɛ ekãa kɛ ŋaa ni eyɔɔ yɛ nu mli shwiili mli lɛ hewɔ.

Mama Sophie kɛ heshibaa kɛɛ akɛ, "Miida shi akɛ minyɛ mihere mɔ ko wala yiwala."

Adafitswaa lɛ yashɛ maŋtsɛ lɛ ŋɔɔ. Etsu bɔfo ko koni eyatsɛ Mama Sophie.

Mama Sophie tsɔɔ onukpa lɛ bɔ ni fee ni ebatsɔ nu mli shwiili kpakpa lɛ mli.

"Beni gbekɛ ji mi lɛ, minaanyo lɛ hiɔ faa lɛ naa. Nu fata wɔ daa gbi shihilɛ he. Ehe bahia ni wɔkase nu wumɔ!" ekɛɛ.

Maŋtsɛ lɛ tsɛ kpee ni etswa adafi akɛ ebaaha Mama Sophie nyɔmɔ yɛ ekãa ni efee lɛ hewɔ.

Yei bolɔ, hii kpa bɛlɛ, gbekɛbii lɛ bolɔ kɛ miishɛɛ. Kɛjɛ nakai gbi lɛ nɔ kɛbaa nɛɛ, gbekɛbii sumɔɔ ni amɛnyiɛ Mama Sophie sɛɛ, ni amɛlá akɛ, "Nɔ ko nɔ ko nyɛŋ ata mihe, kɛ Mama Sophie, mɔ ni yɔɔ ekãa lɛ, yɛ mimasɛi!"