Nanemɛi kpakpai ji Alonte kɛ Gbee.

Amɛkpɛ amɛyiŋ akɛ amɛbaayasara amɛnaanyo, wuɔbi yɛ efɔmɔ gbi nɔ.

Wuɔbi yɛ akrowa kroko mli. Ebaahe Alonte kɛ Gbee gbii enyɔ dani amɛbashɛ jɛmɛ.

Alonte kɛ Gbee jie amɛjeŋ yɛ gbɛ̀i srɔtoi kwraa nɔ.

Gbee sumɔɔ niyeli kɛ wɔɔ ni efeɔ basabasa yɛ bei komɛi amli.

Alonte mli hi, ehaa nii babaoo ni abaanyɛ akɛ he afɔ̃ enɔ.

Amɛkpe yɛ Gbee shia koni amɛto amɛ gbɛfaa lɛ he gbɛjianɔ.

Gbee kɛ ehe ha akɛ, "Mikɛ niyenii kɛha klɛŋklɛŋ gbi lɛ baaba."

Alonte kɛɛ akɛ, "Mikɛ gbi ni ji enyɔ lɛ baaba."

Amɛŋmala nɔ fɛɛ nɔ amɛshwie shi koni amɛhiɛ akakpa nɔ.

"Ebaafee miishɛɛ akɛ wɔbaana Wuɔbi etsɛŋ. Be ko eho kɛjɛ be mli ni wɔna wɔnaanyo lɛ," Gbee kɛɛ beni ekɛ Alonte nyiɛɔ kɛyaa shia lɛ.

Alonte kɛɛ Gbee akɛ, "Oyiwaladɔŋŋ akɛ okɛ mi tee shia."

Amɛkpe mra waa enɔ jetsɛremɔ lɛ koni amɛje amɛ gbɛfaa lɛ shishi.

Amɛlá ni amɛjo kɛ miishɛɛ yɛ gbɛ lɛ nɔ.

Be fioo sɛɛ lɛ, amɛjɔɔ amɛhe yɛ tso agbo ko shishi. "Hɔmɔ miiye mi! Ha wɔ ye nii," Alonte kɛɛ.

Gbee kɛ oyaiyeli shwie niyenii ewo tsɛnsii enyɔ mli. Niyenii lɛ mli eyi kɛ fɔ kɛ nu.

Alonte bi akɛ, "Ani niyenii ni okɛbaha wɔyi enyɔ lɛ fɛɛ nɛ?"

Alonte mli fu ejaakɛ enaanyo lɛ kɛ niyenii ni amɛkpɛlɛ nɔ lɛ baaa. Eyeee Gbee niyenii.

"Mɛni hewɔ omɛɛɔ?" Gbee bi. Ehiɛ ka nɔ akɛ Alonte baakpa huhuuhu wiemɔ ni eye nii.

Akɛni Alonte mli efu hewɔ lɛ, ebi akɛ, "Mɛni hewɔ okɛ niyenii ni bo pɛ osumɔɔ ba lɛ?"

Gbee miiye nii oya aahu akɛ tsɛnsi lɛ jɛ edeŋ.

Gbee niyenii lɛ fɛɛ shwie shikpɔŋ.

Alonte kɛɛ akɛ, "Kaahao ohe minaanyo."

Alonte jie sandwitsii ni yɔɔ fɛo fe fɛɛ lɛ. Ebɔi niyeli.

Gbee kwɛ Alonte niyenii lɛ kɛ hiŋmɛii ni kpaɔ fai.

Beni Alonte ye nii egbe naa lɛ, ekɛ enibii lɛ to ni ekɛɛ Gbee akɛ, "Ani wɔbaanyɛ wɔtsa wɔ gbɛfaa lɛ nɔ?"

Amɛwieee yɛ gbɛfaa lɛ mli be ni eshwɛ lɛ fɛɛ mli. Gbee musu lɛ tswa kɛjɛ hɔmɔ mli.

Nakai gbɛkɛ lɛ, Alonte shwie niyenii eha ehe. Ewɔ kɛ miishɛɛ akɛ ekɛ niyenii ni fa bɔ ni sa eba.

Gbee tee wɔɔ kɛ hɔmɔ.

Leebi lɛ, Alonte ha ehe leebi niyenii bibioo ko. Gbee nyɛɛɛ akpa Alonte niyenii lɛ kwɛmɔ.

Alonte ha Gbee niyenii ko.

Gbee kɛɛ, "Kɛ ke mi. Misusu mi pɛ he."

Alonte ha hetoo akɛ, "Ha ni wɔ ye nii."

Amɛtara shi koni amɛye nii.

Beni amɛyaa nɔ amɛfãa gbɛ lɛ, amɛbatsɔmɔ nanemɛi ekoŋŋ!

Amɛyashɛ Wuɔbi shia yɛ bei ni sa mli.

"Te nyɛ gbɛfaa lɛ tee nɔ eha tɛŋŋ minanemɛi?" Wuɔbi lɛ bi.

Beni amɛmiiŋmɔ amɛhe lɛ, Alonte kɛ Gbee ha hetoo akɛ, "Ehi waa."

Eji fɔmɔ gbijurɔyeli kpeteŋkpele diɛŋtsɛ.

Amɛye nii, amɛla ni amɛjo!