Usir taan njwo ki yi shaan si, Khosi kyang tsutso sisi, u kab kyaan ti wu nde.

Ye wuni, Iya wu ruye pu wu na se mwa ya wu ta ti sim.

"Ami nde morng te su mi?" Khosi raan su wu.

Ira ti kab ki sang ba utob na Khosi.

"Ami ro ka pu munn yi uwae Nyim, mwa iye ti ro te-m?" Khosi kab.

Ye wuni, Iya Sophie ba u yabtswa tang, ti wu putswa fenku ti ro na Nyim tang. Awu su tubpwa munn tika ti yang ki.

"Ami u putswa Iya Sophie ro na uwae Nyim!" Khosi ri te su wu.

"Mi putswa ra fu ro na Nyim 'a?" Khosi rang. Iya Sophie nde njwu mumumuen mwa nde su mbwe, ti tatso na wu na cwe pu wu.

Ti ba ta fenku u ro, Nozipho ruba tu ba. Nozipho shang wu ra na munn ti pu be. Awu shang ti wu sae taen ti pu munn.

Yi uwae Nyim tang, Khosi ri te su wu: "Nyika, ami yabtswa pu'm munn ti pu yi uwae mba-kab mi mbwae tinying! Ami tatso nde pataq na mi na pu tu munn yi Nyim ti rurwong mwa."

Awu tasi uwae na Nyim vhimmm!

Nozipho sae wu ti fen ti ruen.

Ti Nozipho tsi wu sae, mime nyisu ba saen utob yi uwae Nyim tang.

Aba pu munn te ira ti nhaan.

Aba tso kun te tso ti utob ti saen yi uwae nisa wu.

Nozipho sae shamki iyip nyinyang, khenki sae yip txi. Khosi pu munn ro ruen sha pu wu te nyisu ti tsitsi. Nozipho ku ro ka fifer mwa sae shamki cwucwo.

Kyaen ti yip wu sae ye wu yipsae mwa wu te ro uwog na anda ba ti jwo tubpwa yi jwu Nyim tang.

"Ndeya! Khosi u ngwa zuzuen," Nozipho tso kunn.

Ya yi ye be miken, Iya Sophie ta'nja si uwae nisa wu. Wu pu munn si uwae na Nyim tang.

Wu pu munn si na ta na nisa, kafe tso ba kafe si ki, shaa we na Khosi.

Wu gbab'ye Khosi ti jwo mwa pu munn ro na uwog ti Nyim wu rong wu rong be. Miken mwa, Iya Sophie ye Khosi ruye uwae na Nyim wu.

Iya Sophie te'nyaan yabtswa mbub na nyisu te anda ti jwubra, tso kun.

Nozipho te nae-tswa wu sim ti wu te ti tsen u ro na sogci ti ten tang, te Khosi yi kasim wu.

Yi sogci tang, Iya Sophie tu Fhean-Kwe Ci, Noxolo ti te ba ti wu ndeya.

Fhean-Kwe Ci, Noxolo yera Khosi sang uwae sog ki titsen mwa fhean-kwe ci ba ki te ruba ndeya.

Fhean-Kwe Ci, Noxolo ri na: "Wu si jim! Yi Nyang ti wu nae wu uwae nisa na ye ki fwaraki be!"

Txu we Iya Sophie mbubta, utob wu nae bein.

Patag ande ti ta sogci tang rwa wu rwa na gbakang utob ti wu tatso, te iyi na munn ti pu wu.

Iya Sophie ri na: "Ami tsintob ti mi ndeya, yesu nyang iki."

Twein na ira wuni ka fwuab uwog Kwe ti ten tang. Wu tom nde ka kunn Iya Sophie ruba.

Iya Sophie pwen te kwe fenku ti wu kafe nde ti pu tu munn.

Wu ri na: "Ti mi si mbwae tinying, wunda'm nae yein Nyim. Nisa si kyaan ru ti nde ti patag usir. Miken mwa, ti kwen kang munn ti pu!"

Kwe wu kunn tifun mwa ya ski na wu na nda Iya Sophie jwo-fwa na gbakang-utob ti wu tatso.

Anda pwen'njwu, urwam kunn jwen, nyisu tso kun uwae utob ti saen. Changtsi usir wuni, nyisu putswa Iya Sophie, yak king na, "Khenki tukunn yi mi be, yi'a si ti Iya Sophie ti gbakang-utob 'a te mi ta te tso!"