Boi na Koshi ni waghenyi wa kavui.

Wedeamua kumtembelea mghenyi wawo, mwana wa nguku ituku jake jevalwa.

Uhu Mwana wa nguku odeka ukikaia kijiji kizima. Yadadwa Boi na Koshi matuku awi kuvika aho.

Boi na Koshi redeka na tabia zima zima.

Koshi yadapoilwa ni kuja na kulala na saa rimu yadakaia na wuchokozi.

Boi odeka na wughoma, msamaria na otegemeeka.

Wedekuana mzinyi ghwa koshi wipange charo.

"Niredagha vindo va ituku ja imbiri," Koshi ikajifunya.

"Niredagha va ituku ja kawi," ukaghora Boi.

Wikaandika malagho ghose eri wisekeghiliwa.

"Idakaiya ni kupoilwa kuwona Mwana wa nguku kafwani. Ni ngelo ndacha kufuma damuwona mgenyi odu," Koshi ikaghora ikimfumira Boi ugale mzinyi.

"Chawucha kwa kunifumira mpaka mzinyi," Boi ukaizera Koshi.

Wedekwana nakesho ijo ituku wikazoya charo.

Wikabora na wikavina kwa kupoilwa charo chose.

Baada ya ngelo wikahoresha andonyi ya mudi mubaha. "Ini nazughwa! Dije," ukaghora Boi.

Koshi kwa shwawori ikafunya vindo kwa bakuli iwi. Vindo vedeka va mavuda na va machi machi.

Boi ukakotia, "Ivi nivo vindo kwareda vedu diwose?"

Boi ukazamilwa angu mghenyi wake seredie vindo seji werumirianeghe. Ukalegha kuja ivo vindo va Koshi.

"Niki kwaweweseria?" Koshi ikakotia. Edemanya Boi udasigha monyomonyo na uje.

Kwa kuzamilwa, Boi ukakotia, "Kwaki kwareda vindo ivija vikupoia?"

Koshi ikakaia yaweja kwa shwashwa bakuli ikamotoka.

Vindo vose va Koshi vikasasarika andonyi.

"Kusekejali mgenyi wapo," Boi ukaghora.

Boi ukafunya mikate righokie shuu. Ukazoya kurija.

Koshi ikazighana vindo va Boi na meso ghelomba.

Boi wendameria kuja, ukafunganya na ukazera Koshi, "Dadima diendelie na charo?"

Ndewededanyeghe sena charo chose. Kifu cha Koshi chikakaia chaweruma kwa wundu ghwa njala.

Ulo luma lwa kenyi, Boi ukajiwaghia vindo vake. Ukaenda lala wapoilwa angu oredieghe vindo vikate.

Koshi ikalala njala.

Ndoe endaela, Boi ukajiwaghia vindo va asubuhi. Koshi ndechesigha kuzighana vindo va Boi.

Boi ukawaghia Koshi vindo vimu.

Koshi ikaghora, "Nifuye wughoma. Nedeka na wusu mungi."

Boi ukatumbulia, "Dije diwose."

Wikasea kidombo wikaja.

Wikiendelea na charo chawo, wikawuya waghenyi sena!

Wikabusa kwa nyumba ya Mwana wa nguku kwa ngelo ripoie.

"Charo chakoghe wada waghenyi wapo?" Mwana wa nguku ukakotia.

Wikiviviriana, Boi na Koshi wikatumbulia, "Chapoieghe nandighi."

Kughora wuloli jedeka ni ituku ibaha ja kuvalwa.

Wikaja, wikabora na wikavina!