Tena ìre ogwu enerieen̄ ge ikakaan̄ge uwu. Ìkititen̄e mfut uti me emen aka oron isa irọ inorie.

Usini mgbọ îkilaak me emen oron ya, ebi kè mkpinyọn̄ ile mè nriọk ekekikup me inyọn̄ uti mè emen asabọn oron òkup me ere ya ikikpọ ọmọ.

Îjijen̄e ikana emen aka oron ya mè imun̄ owuwa uti igbaalek echi îwuukbe lek imun̄.

Ikekikeek me ejit kan̄ ibe, "Uti chi ekup me ere yi me ikike."

Mije jen̄ejen̄e, lek îwọ ọmọ, isisiki ikweek mè ibieen̄ lek kan̄ me lek uti ge mè ilaak.

Uti cha ekwekwek ọmọ ura me lek, ebi kè ofut ekekiwulu me inyọn̄ ere ya mè ikikọt utop utop okwa.

Ekiket ge oninin̄ ọmọ ejit.

"Ire mfieek usini uti chi, mâkọt ikaan̄ ikpoko mè ikana ogwu òkaan̄ owuwa uwu ilile."

Isisi emen ama ya mè isi ifọọk ojijọọk. Ibebene ikicho uti cha.

Nriọk ya okekiriaak ọmọ ibe, "Soso, kacho uti cha. Ema ere uwu inyi eji mè ebi kè ofut. Mfut kiban̄ ire inorie inyi eji."

Tena otutumu ibe, "Emi ǹkiweek ikpoko mbasa inama uwu eyi n̄a."

Nriọk ya otutumu ibe, "Owu ijijijaka uwu owuwa anam mè ofut mè isa inama eyi kwun̄, ìkijeen̄ ibe ke òkikeek inu ofolek kwun̄ gaalek."

Tena ofefieek ejit mè iyaka ojijọọk ya ito mè ikat nriọk ya.

Nriọk ogwu unene kan̄, onyinyi ọmọ ifuk-ibot ibe ke ogwugwu môkọt isa ibat irọ okpungwu. Mè isa mbubet mè nchat uti isa inama gwun̄ uwu.

Sa me ikeya, ema agan̄ iba mêkaan̄ uwu ikiluk.

Tena ochechieek. Me mgbọ me mgbọ ikekisi ikpọ nriọk ya. Nriọk ya okekitele ọmọ igbem owuwa mfut mè oke nchat uti geelek îweekbe.

Eme ekakana atalek unene.