Abaan̄ ekiluk me esese esese lek uwu. Usini abaan̄ ekigbaan̄ iluk ogbogbo me ere ge, sà usini ekiluk me lek kiban̄ gaalek.

Urọk yi ìkitumu ikọ ofolek Nayeku mè Naserian – nkarankat iba ìrere ngwan̄ ibaan̄, ìkiluk me agan̄ ijọn̄ mbubet me Kenya.

Ngwan̄ ibaan̄ iba chi ekiluk me ọgbọn̄ nkarankat ge, ema mèlek ofifi akọp obop nkarankat jeeta (80,000).

Ebi kè nkarankat ìkiluk me ọgbọn̄ ekiluk me emen orion ema esabe ntitaak inama. Orion ya môkọt ikup me irak ijọn̄ mè ìre inyọn̄ ijọn̄ mè ìre usini agan̄ me irak ijọn̄ usini agan̄ me inyọn̄ ijọn̄.

Agan̄ uwu kiban̄ eyi eji ekimun̄ me inyọn̄ ijọn̄ ore orion nkarankat. Usini orion nkarankat îkibene me ijọn̄ iso mita iba re lek mita go.

Nkarankat geelek òkup me ọgbọn̄ nkarankat, îkaan̄ esese ikwaan̄ îkirọ isa itap ubọk inyi otutuuk nkarankat kechilọ òkup me ọgbọn̄ ya. Nayeku mè Naserian ere nkarankat echi ikwaan̄. Otutuuk nkarankat echi ikwaan̄ ìre uman. Nayeku obebe, "Eji ire ebi ìkinama inu mè ebi usọ-ikwaan̄!"

Nkarankat echi ikwaan̄ ekinama mè ikikpọ chieen̄ me lek orion nkarankat. Naserian obebe, "Eji ekinama uwu òmimiin̄ mè ikup lọkọlọkọlọkọ."

Nayeku oneninyi nkeek ibe, "Eji ekpa ewele ike eji ekisa inama uwu kiji." "Eji ekibene sa me irọrọkọ udọn̄ itibi irak ijọn̄."

Nasarian obọbọkọ ọmọ ikọ ya me otu mè ibe, "Eji ekisa unye unye uga kiji isa irọkọ udọn̄ itibi irak ijọn̄. Eji mîkaan̄ unye isasa iben owuwa ntitaak inan̄a me ere ge isi ofifi ere!"

Naserian otutumu ibe, "Eji ekigbaan̄ ataak kiji mèlek ntitaak ifuku mè isa ichọkọ agba uwu kiji inyi inye."

Nayeku otatap isọkọ ibe, "Mgbọ inu ya egbaan̄be ifuku inyi ikup ibat ibat ya isichat, mônye kubọk ibat. Orion nkarankat îkikup ifiin̄ mgbọ enenen."

Naserian otutumu ibe, "Eji ekikpulu ntitaak echi eji erọkọbe isa isinama orion me inyọn̄ ijọn̄. Orion ya ìkikup okokop mè ìre ikup oket oket mè ikaan̄ owuwa oniin̄ me lek."

Nayeku otumu ibe, "Usini orion îkijọn̄ọ ire lek mita onaange!"

Ebi kè nkarankat ìre abaan̄ ìkigbagbaan̄ inu irọ, ebi ìkiluk ogbogbo me ọgbọn̄. Ema ekirọ esese esese ikwaan̄ me inanama ere-nluk kiban̄ mè ikikpọ chieen̄ me lek.

Nkarankat echi ikwaan̄ kubọk Naseru mè Nayeku
ekirọkọ mè inama orion. Nkarankat echi akọn̄ ekibem orion. Ebi ikwaan̄ mè ebi akọn̄ ekigbaan̄ ijijen̄e iweek aya ere ebenama orion.

Nkarankat echi òban-ene ekikpọ chieen̄ me lek nga orion mè bọn nkarankat echi ekigwen mbuk nkarankat.

Orion ìkaan̄ esese esese agan̄. Nga orion îkaan agwut kan̄, agwut òwa inyi ebi kè mbuk, agwut ekisa itap inorie òwa si.

Nga orion omin ichit me etete ebi kè nkarankat, ọmọ si okiluk ugwem ifiin̄ mgbọ ichit.

Naserian ojeje inyi isi mè ibe, "Eji ekinama udọn̄ efet inisibi me inyọn̄ ijọn̄ inyi ata efet ikiwut inin̄ emen orion ya."


Nayeku otatap isọkọ ibe, "Ebi kè nkarankat mîweek ata efet inyi ema eluk ugwem. Udọn̄ efet cha si okidọmọ oke uyok òkup me emen orion ya inyi ikayok ìraka oke."

Naserian otumu ibe, "Eji mikaan̄ uko me emen orion kiji, ere eji ekiwop urip. Eji mîkititen̄e mkpukpọk uti mè ofifi inu-orom isa ikitaak me ebon utip cha eji ewopbe inyi itibi ijaan̄."

Nayeku otataan̄ "Yum! "Uko urip ya okisan̄a inorie isibi inyi otutuuk nkarankat ekiluk me orion. Eji gaalek ere esese abaan̄ òkiwop urip."

Ọgbọn̄ nkarankat geelek îkikaan̄ ubọọn̄ orion mè nga orion. Nkarankat echi ikwaan̄ ekinyi ema inorie mè ikibem ema mije ema ekupbe me uyọt enenen me orion ya.

Nga orion îkiluk ugwem iso akọp acha iba re akọp acha ita. Môkọt ito efie efie nkwa me ugwem kan̄. Mbuk ìkikpọk inan̄a me emen nkwa. Isikpọk, nkarankat echi òban mêkpọ ema chieen̄ me lek.

Naserian obebe, "Me ama ebi kè nkarankat, esusun̄ otutuuk inu me onineen̄. Otutuuk nkarankat ekirọ inu isa itap ubọk inyi ama kiban̄ ikije inyi isi mè ikitibi imin."

Nayeku otatap isọkọ ibe, "Eji geelek mîkaan̄ ikwaan̄ eji ekirọ, eji si kpekilọ irọrọ ikwaan̄ ya. Ebi kè nkarankat mîriọọn̄ ike ekigbaan̄ irọ ikwaan̄." Naserian obebe, "Iin̄," isa ijeen̄ ke ọmọ îchieek. "Mgbọ keyi eji egwu ekom esi ekerọkọ ijọn̄."