Ebi ene ekiluk me owuwa esese lek uwu. Usini uwu ìre echi esabe inu-orom ikike, kubọk mbubet inama. Sà echi ofifi ke esa inu ebilene erombe, kubọk umọọn̄ mè okpungwu inama.

Usini uwu ke esa lek inu iba chi, inu echi orom ikike me echi ebilene erombe, kubọk eyi uwu oga òkup me emen urọk keyi.

Kabo mè Tabo ekiluk me agan̄ Gaten̄ òkup me Botswana, me agba lek gwun̄ ama Mochudi. Ema ekiluk melek nga mè nte kiban̄ me emen gwun̄ uwu oga.

"Gwun̄ uwu oga ìre uwu oka mgbọ òkikup òkokop eyi ekisabe oga ichit inyọn̄. Uwu kechi òwa me Afirika Osiki," Kabo okekikpa iwele.

Tabo osasa ije inyi isi ibe, "Owuwa me lek asabọn uwu oga chi ìre òkokop, mè ikaan̄ isotu mè nruruk me lek. Eji mîkaan̄ nruruk echi umọọn̄, echi ema kpekakaan̄ me ukot ikaan."

Kabo obebe, "Ebi nte nte kiji enama asabọn uwu oga chi igọọk ukot oka mgbọ. Nte kiji onenitap aya inu isọkọ me lek."

Kabo obebe, "Ngwa, eji enekpa inu òfolek ike ekinama uwu yi."

Ibebe, "Ebi inama-uwu ekisa mbubak uti, mè oga, mè ebi kè ewuuk, mè abọt mè abọt eyi mun̄-mun̄ isi ikwaan̄.

Ema ekidasi irọkọ udọn̄, mè ènekpulu ewuuk, mè ntitaak, mè okpoon̄ ètap èjot emen udọn ya. Eyi okirọ inyi ọdọ ichat mè inye inyi ekọt enama inu me inyọn̄."

Tabo ojeje inyi isi, "Ebi ìkinama uwu ekibieen̄ owuwa ujọn̄ọ ata itaak me emen ọdọ ya, mè ètaak ekana otutuuk agba cha. Ema ekibọbọp ata cha igba ikam, mè enerọ mbet echi ebesa inama agba uwu ya me oyet.

Mgbọ yaage enamabe mbet ya isan̄a, ebi inama-uwu cha meneniteen̄ ewuuk cha itaak igba iriaak ichit emen mbet ya."

Kabo obebe, "Eyi ògọgọọk, ebi inama-uwu cha menenigbaan̄ ntitaak arika, mè mun̄ mè ifin eriembuuk iwọlọ. Ekisa eyi irọ abọt – eyi òkinye enenen mgbọ isichiaak. Ema ekikpulu abọt cha itaak me etete ewuuk cha inyi ewuuk cha ekeke."

Tabo otatap isọkọ ibe, "Isasa ewuuk mè abọt inama uwu ìkirọ inyi agba uwu inye mè ikup ifiin̄ mgbọ."

Kabo obebe, "Irọrọ inyi agba gwun̄ uwu oga kiji me oyet ilobo ìkikput ukan̄ me lek uwu ya."

Tabo okpakpa ibe, "Ikput-ukan̄ yi isibi ibe ke uwu ya ìkitọtọọk me emen me mgbọ ere okiyok me oyet. Uyok ura ìkakikọt itibi agba uwu ya.

Me owuwa ere utọọk ekirika okiwut, ikput-ukan̄ keyi okirọ mè gwun̄ uwu oga cha ikiyok me emen."

Tabo ibe, "Ebi inama-uwu ekitun̄ ibat me ọdọ ya ema erọbe isa itap ijọn̄ me lek gwun̄ uwu oga kiji."

Kabo okekibe, "Isisi ikwaan̄ iso me lek ijọn̄ ya, ema egwook òta ukpa ibat mè ibọn̄. Ibat ya ìkichachiaak inye mè òrọ inyi ijọn̄ ya ikup akpakpa mè irọt."

Tabo obebe, "Òta ikwaan̄ ìre itotoon̄ inyọn̄ uwu ya. Asabọn uwu oga chi, ekisa oga ichit me inyọn̄. Inyọn̄ ìkisọsọọk otu isibi.

Ebi inama-uwu ekidadasi igwugwuun̄ atà mè itobo ikam me etete ere ge, mè enesa mbubet oga echiin̄  me lek me ukpa me ukpa. Oga esabe ichit inyọn̄ ìkakilut mun̄."

Oga ìre inu òkakaan̄ oruru enenen isasa irọ inyọn̄ uwu. Ire, inu-orom keyi ìre si ata ere iluluk inyi ebi kè abaan̄ mè ofifi anam. Owuwa kiban̄ ìre ebi kè òfiat uko!

Kpọ ogugo keyi mè week: olọnjin ita, mè eferen̄, mè ikwut, mè nkarankat, mè òkọn ikpi?

Inu-orom kubọk mbubet oga, ìkisan̄a ata ere iluluk isibi inyi ebi kè olọnjin ekeluk mè ekebọm urie.

Ebi kè olọnjin kpekitaka oga, ire ema ekitap ubọk inyi ekọt ekput ebi kè ofifi abaan̄.

Eji mêkpọ chieen̄ ijaan̄ me lek oga ya inyi òfiat uko òkup kubọk òkọn ikpi, atan̄tan̄ mè ebi kè nkankat ekanin̄.

"Eji mîwa ebi ìkiluk me gwun̄ uwu oga keyi!" Tabo otumu, mè ikikpọ uwu oga ya. Ukpook olọnjin okekitet.

Kabo obebe, "Ǹkikeek mè ìre kpasi ofifi inu okigọọk eji iluk me ere yi me ufieek-owot?"

Kabo obebe, "Mgbọ geelek nsibanama uwu eyi n̄a, mânama gwun̄ uwu mè itap efeek arika me inyọn̄!"