Madina ore gwun̄ enenwaan̄ òrere ugane ichit me ototun̄ ukan̄ kè Karembe.

Ebi ototun̄ ukan̄ ya ekiluk me Bandiagara.

Ikakwun̄ usen ge, Madina osisi ibosi ichit isotu.

Imumun̄ lek gwun̄ enenwaan̄ ge mè gwun̄ enerieen̄ ge.

Îke ọmọ chieen̄ imumun̄ nke nke nsabọn iba.

Itatap ukpo igwen ogwu ute, "Nte! Nte! Îkaan̄ nsabọn iba ìkeke me isotu."

Ogwu ute olilibi isi isotu.

Mgbọ îmun̄be nsabọn cha, idodo ibe, "Enyi ìre ebi owa? Enyi enan̄a me owa?"

Gwun̄ ogwu enerieen̄ otutumu ibe, "Emi ìre Asama,ogwugwu ìre Yakoromo, ngwan̄ n̄a ogwu ijija."

Asama mè Yakoromo ekup kubọk ebi lek owọbe, ebi ukpook okitet, mè ebi ìkifieek ejit.

Asama ofofo isi ikikpa iwele ibe, "Eji enan̄a me ama Songo, me gwun̄ ama ekigwen Dokombo."

Îsisik nte kiji lek ire lek ìkayaka ìkọt ìsan̄a amọn.

Madina obebe, "Nte, bọkọ ema tap. Lek îwọ ema enenen, urafiọọn̄ si îtaka ema. Ema mîweek ntap-ubọk kiji."

Yakoromo onenitumu ikọ me adasi mgbo.

"Ebi ge enu akọn̄ me lek ama kiji. Nte mè nga kiji mîkwaan̄. Otutuuk inu-nkaan̄ kiji îchieen̄ ita."

Ifofo isi ikitumu me sọntiik ida.

"Eji mîje ije me ukot owuwa usen. Eji kperiọọn̄ ere eji ebesi mè ìre inu eji eberọ."

Nte kiji okpọkpọ ichili ubọk mè ikat nsabọn cha.

Nte kiji otutumu ibe, "Nsabọn, ìnin̄ uwu, uwu kinyi ire eyi. Eji mêtumu ikọ ofolek me mgbọ enyi isisiki efuuk."

Nsabọn cha egọgọọk ebi ototun̄ ya irie inorie ikakwun̄. Eya ore adasi inorie uyok ukan̄ ema eriebe karake owuwa usen òraraka.

Eya iraraka, Madina osasa Asama mè Yakoromo isi ijeen̄ agwut ilaak kiban̄.

Bene me usen ya, otutuuk ene ekimọnọ Asama mèYakoromo kire ebi ototun̄ ukan̄ kè KAREMBE.

Ema ekikifit ifit mè ekirọ otutuuk ikwaan̄ uwu mèlek ofifi nsabọn kechilọ ìkup me ototun̄ ukan̄ ya.