Ebi ene ekiluk me esese esese chieen̄ uwu. Usini ene ekiluk me uwu enamabe inyi ikup ifiin̄ mgbọ. Sà ebilọ ekiluk me uwu echi ìkakikeke ìfiin̄ mgbọ.

Ikpa keyi ìkikpa urọk ofolek oyet-egep eyi ìkakikeke ìfiin̄, eyi ekigwen ere mgba-ngwele ukan̄, eyi uwu oga uwu oga ojotbe.

Ere mgba-ngwele yi ìkup me Kenya agan̄ inyọn̄ etete, me mkpulu-ija Samburu. Ngwan̄ ibaan̄ iba, Sidai me Nayeku egbaan̄ ikiluk uwu ge, sà nte mè nga kiban̄ mèlek ngwan̄ kiban̄ enerieen ogwu nsek nsek ekiluk uwu ge.

Ngwan̄ nte kiban̄ mè ngwan̄ ebirieen̄ ita kiban̄ ekiluk me uwu kechilọ, ema mè ebi ototun̄ ukan̄ kiban̄.

Ototun̄ ukan̄ echi òkup me ere ya ekigbagbaan̄ inyi eriembuuk kiban̄ mbubet mè ikitap ubọk inyi lek kiban̄. Ema kpekiluk me ere ge ifiin̄ mgbọ. Ekijejijen̄e isi ikiweek ayaya ere ema mêkọtbe imun̄ ijọn̄ mbubet isa ikpukpo eriembuuk kiban̄.

Ekisa uti ukpak inama ọgọ ikana ere mgba-ngwele ya. Ọgọ yi ìkakichieek ibe eriembuuk cha esibi ìkakichieek si ibe ebi ichen enin̄.

Sidai ìbe, "Isibenama ere mgba-ngwele ya, eji ekidasi ititen̄e inu inama-uwu me ere-nluk kiji. Eji ekisa atagọọk uti isa igwuun̄ uwu cha."

Nayeku onitap isọkọ ibe, "Eji mîriọọn̄ ubọk ekisa inu-orom inama uwu kiji. Otutuuk ene me mgba-ngwele ekitatap ubọk me lek inanama uwu cha."

Sidai okpakpa iwele ibe "Eji ekisa agọọk uti echi òmimiin̄ isa inama agbasi agba uwu. Eji ekisa olik oron itobo agan̄ inyọn̄ uwu ya ikam me lek agan̄ agba uwu. Eya mônenirọ ibe agbasi ya inye mè ikọt ibeme ulobo otutuuk uwu ya."

Nayeku otatap isọkọ ibe, "Otoon̄-uwu cha ìkisisiki. Mije keya, ìkpofet unye efet ichichili ema ifiin̄."

Sidai okekije inyi isi me usem kan̄ mè ibe, "Mgbọ esinama agbasi uwu ya inan̄a inyi ikeke, eji mêkpa asabọn uti itaak me etete uti ilile cha."

Nayeku otatap isọkọ ibe, "Eji ekititiin̄ mbubet iwa inyi ilobo mè itobo ema ikam me lek agbasi eyi inyọn̄ uwu ya. Eyi ìre itotobo oga."

Sidai otatap isọkọ ibe, "Itotobo oga inwọn me inyọn̄ uwu ìkikwek eji lek me lek ìbot mè ura."

Sidai otutumu si ibe, "Inyọn̄ uwu kiji môkọt ire akpakpa mè ìyaka ire okokop."

Nayeku obebe, "Ichọchọkọ lek uwu ore ikwaan̄ mmabe ichit me lek inama-uwu. Eji ekisa ibat igbaan̄ ifuku mèlek ifin anam isa irọ abọt eyi inu-orom. Eji ekikpulu abọt itaak me agbagba agbasi eyi agbalek uwu cha mè isa me ikeya ichit ofok cha. Eyi ìkput ibe efet mè achiaan̄ ikanin̄ uwu."

Sidai obebe, "Ikpukpulu abọt itaak me emen agbagba agbalek uwu ìkichit chieen̄ uwu ya mgbọ agba uwu ya isichat. Eji mîkichọkọ si agba uwu. Abọt isichat, ìkichachiaak mè inye lek."

Nayeku otatap isọkọ ibe, "Kpekitap nruruk me agbalek uwu cha, ire, uwu kiji ìkikaan̄ isotu esabe uti
irọ."

Sidai otumu ibe, "Isasa abọt ichọkọ agbalek uwu ìkitap ubọk me ikwekwek utọọk."

Nayeku ododo ibe, "Keke ire 'ikwekwek utọọk'?"

Ogwu ngwan̄ enenwaan̄ ofọfọọk ibe, "Isasa ibat mè ifin anam irọ agbalek uwu ìkitap ubọk inyi uwu itọọk mgbọ oyet okiyok. Me mgbọ utọọk, agba uwu ìkitap ubọk irọ inyi utọọk ikatet eji ebi ìkup me emen uwu, sa me îkitet uyok ukan̄ esọkbe ikaan̄ inyi ikasibi."

Sidai okpakpa iwele ibe, "Otutuuk ene me ere mgba-ngwele ekitatap ubọk me inanama uwu, mè ikitap si ubọk me lek itọtọn̄ọ uwu ya me mgbọ eji ebenan̄a ifo ofifi ere.

Ìkayọt itọtọn̄ọ uwu cha mè isa nroon̄ inama-uwu cha isi inama ofifi uwu me ayaya ere."

"Nroon̄ inama-uwu kiji ìkakilobo, eya orọ, ìkayọt ikpukpulu ema me ere ge isa isi ofifi ere. Eji isibenan̄a me ere mgba-ngwele, eji ekisa ebi kè aligọ mè inyinya akpan ikpulu inu geelek òkup me uyọt. Kubọk otoon̄-uwu esabe oga irọ cha," Sidai otumu ibe.

Nayeku otatap isọkọ ibe, "Eji mêkọt ititen̄e si ofifi nroon̄ inama-uwu me aya ere-nluk ya."

Sidai otumu ibe, "Uwu kiji îso mèlek ubọk eji ekiluk, òrere ikekijijen̄e ikana mèlek anam kiji."

Nayeku otumu ibe, "Eji ikekijijen̄e ikana ikeya ìkirọ ibe eji ekakọt ìkisi uwu-ikpa mèlek ebi unene kiji."

Sidai otatap isọkọ ibe, "Ebi uwu-ikpa kiji mîkichieek ibe eji efọọk ikpa, eji si mîkisa irọrọ ikwaan̄ uwu-ikpa kiji iso."