Me ama ile ge, îkaan̄ uja gwun̄ enenwaan̄ ekigwen Ela.

Ọmọ ìre ujọn̄ọ ujọn̄ọ, mè ire ofifit, mè ikaan̄ ijeek ofifit. Chieen̄ kan̄ ìkitataba ene.

Ela ìkaan̄ ejeek òjajaan̄ mè itana okuket kubọk ewuuk unye otu ewe. Ọmọ ìre gwun̄ enenwaan̄ òkaan̄ ejit nsan mè iriọọn̄ ubok ekisi ikwaan̄. Ìkakisisaak ogwu ute mè ogwu uga ugwem.

Otutuuk inu òkisisaak ogwu uga mè ogwu ute me lek kan̄ ìre ubọk îkiweek irọriọọn̄ inu ofolek inu geelek. Ìkimalek ido uyọt uyọt idodo.

Kubọk, mgbọ uti-ikpa ugwook kan̄ ofan̄abe, Ela ìdo ogwu uga ibe, "Uga, ìre uti-ikpa ugwook n̄a îfo emen-inyọn̄?"

Efuuk îta nte mè nga kan̄ me lek ogbogbo idodo kan̄, eya orọ, usini mgbọ, kpeyaka ikinyi ọmọ isi.

Ire, Enri, ngwan̄ kè Ela ogwu enerieen̄, îkima igbagban̄ idodo kè Ela. Usen ge mgbọ ìbot okirep, Ela ododo ibe, "Ìre ìbot òkup me emen oduku-inyọn̄ ìkito ito?"

Ogwu ngwan̄ ochachak mè ifọọk ibe, "In̄-in̄!" Me ikpa iwele inyi ọmọ ibe ke ìbot ìkirep mgbọ oruk òkup me lek efet isifiik.

Usen ge, Ela otutumu ifieek ibe ke ọmọ môje ije inyana ukot sọnja. Ike îkije, imumun̄ uti apulu mè ifan̄a otu agọọk uti ya me ikakpọge chieen̄.

Ela otumu ibe "Jei! Uti yi îweek ogwu ofia ugwun̄." Me ukechieen̄, uti ya ofọfọọk ọmọ otu, mè ibe, "Iin̄, mweek ogwu ofia."

Ukpook otetet Ela. Idodo "Ike owa ke okọt itumu ikọ?" Uti ya ofọfọọk ibe, "Emi ìre uti eyi môkọtbe inyi owu ufọọk-otu otutuuk idodo kwun̄."

Ela okpọkpọk ido, "Keke orọ gwun̄ enerieen̄ ya ikakọt ìnọ ida kwun̄?" Uti ya ofọfọọk ibe, "Îre mije ìkado emi inu geege."

Ela olilibi isi lek ogwu ngwan̄ enerieen̄ mè itumu otutuuk inu ya òrọrọ inyi. Ema ene iba elilibi isi lek uti ya. Enri ododo ibe, "Ìre owu ìre inu nnọbe ya me atikọ?"

Uti ya ofọfọọk ibe, "Emi ìre uti me atikọ." Ema ene iba ekekijop okwa ibele ejit.

Karake usen ya, ema ene iba kpeyaka isisaak nte mè nga kiban̄.

Mgbọ geelek ema ekaan̄be idodo, ema ekisi lek uti apulu ya isi ido, uti ya si mokekifọọk idodo kiban̄.