Me emen mgbọ ge, îkaan mbubut ebireen̄ go ebi ìkigbaan̄ iluk me uwu ge. Ema ekigbagbaan̄ iche otutuuk inu ema ekaan̄be.

Usen ge, inorie kiban̄ otata. Ema egwegwen ntitiin. Ogwu enerieen̄ ge ododo ibe, "Ìre ere owa ke ofifi inorie eji eberie obonan̄a isibi?"

Îyọt ifọfọọk idodo ya mije ema kpekaan̄ ikpoko mè ìyaka ire unene me ama ya.

Mgbọ ema ekeekbe inu nkikek mgbọ inen mè inen, ene ge me etete kiban̄ otutumu ibe "Eji ebene ekeje enyi isi." Ogwu òso iba ododo ibe, "Esi ere owa?"

Ogwu òso ita obebe, "Esi echiin̄ inorie." Ogwu òso ini obebe, "Ìre kpebetet ejit?" Ogwu òso go onenibebe, "Kasisaak lek me lek inu keya!"

Ebirieen̄ go cha esisi ewe isi ichiin̄ inu ema eberie.

Mgbọ yaage ema ebenebe ikichiin̄ inu, etetet ema!

Mîsa ebirieen̄ go cha isi ere ebi ikan ido.

Mgbọ ekido ebirieen̄ cha ikọ, ebi ikan ido edodo ema ibe, "Ekene osan̄a ekiket yi isibi ibe echiin̄ inorie?"

Ebirieen̄ cha ebebene ikinunuun̄ ikọ ema ema. Mè initumu inyi ogwu ikan ido ya ike inu ya osabe imọnọ irek.

Ogwu adasi ene obebe, "Emi ǹtumu ibe eje gaalek, ǹkabe eji echiin̄ inu." Ogwu òso ene iba obebe, "Emi ǹdo ere eji ebeje isi."

Ogwu òso ene ita obebe, "Eji otutuuk mîgbaan̄ ichieek ibe esi eweek inorie."

Ogwu òso ini obebe, "Emi ntaba otutuuk kiji ubọk me utọn̄ ibe ke mêtet eji."

Ogwu òso go obebe, "Otutuuk kiji mîriọọn̄ ibe ke eji ìre ebi inọ, eya orọ mbe, 'Ekasisaak lek'."

Mgbọ ogwu ikan ido ya onọbe inu ema etumube, ema erọriọọn̄ ibe ke otutuuk ebirieen̄ go cha egbagbaan̄ ichiin̄ inọ ya.

Ogwu ikan ido ya onenikana igwook ibe ke, "Îwọn ibe eji eche otutuuk inu, itata ijo ifuk-ibot."