Ebi ene ekiluk me uwu òkup esese esese. Usini ene ekiluk me uwu òbene ichep me inyon̄. Ebibilọ ekiluk me uwu òkup me ijọn̄.

Uwu ubene-ile môkọt ikaan̄ owuwa uwu echi enamabe ge itoon̄ me inyọn̄ ge. Ikpa keyi ìkitumu ikọ òfolek uwu ogbogbo inyọn̄ eyi òkaan̄ owuwa asabọn uwu enamabe ge itoon̄ ge.

Mishelle mè Katerin ìre ngwan̄ ebibaan̄. Ìsik sọntiik mgbọ Mishelle môsibe uwu-ikpa etete isan̄a. Katerin ìkup me òkweek eyi òta me uwu-ikpa ọdọ.

Ngwaan̄ ebibaan̄ iba chi ekigọọk nte mè nga kiban̄, mè uga-ile kiban̄ iluk me emen uwu ubene-ile me Nairobi. Ema ekima iluluk me ere òbebene ifo inyọn̄ me emen ama, kubok ebi kè òfut ekikup me inyọn̄ uti òjọn̄ọ ichep mè isinyọn̄.

Ebi uwu kiban̄ ekiluk me agwut òkup me lek okpọkpọ eyi òso 22 me lek uwu ekigwen Uwu Oket. Ema ekisa òben inene ifo uwu kiban̄.

Katerin ìkifufuk okpọkpọ cha ike ema ekinene ifo inyọn̄ mè ikikwala isibi ijọn̄. Ọmọ ìkiweek irere ogwu òkikọp uji inyọn̄. Mishelle ìkiweek irere ogwu usọ ikwaan̄ inyi ọmọ ikọt inama uwu ogbogbo inyọn̄.

Katerin ìdo ibe, "Ìre uwu kiji uwu ojọn̄ọ ichit me Afirika ni?"

Mishelle ofọfọọk ibe, "Ìkare. Ujọn̄ọ uwu kiji môkọt ire mita 126. Uwu òjọjọn̄ọ ichit me Afirika ìre mita 393. Uwu òjọjọn̄ọ ichit me linyọn̄ ìre mita 830!"

"Jei! Ìre kpasi ubọk ke ojelek uwu kecha osa ikọt ikeke inye?" Katerin okekikeek me ukechieen̄.

Mishelle ofọfọọk ibe, "Me atikọ, ekinama otutuuk uwu ogbogbo inyọn̄ me oniin̄ yaage. Inu iba òkup uyọt ekisa inama uwu yi ire okwukwut mè okpungwu.

Ekinama uwu ogbogbo inyọn̄  me okpọkpọ me okpọkpọ, ibene me lek ebi kè atà okwukwut, mè enegwook okpungwu ekana atà cha. Esikisa inu cha igbaan̄ inama uwu, ema ekirọ ibe uwu ya inye enenen mè ikikup ifiin̄ mgbọ."

Ire ebenama uwu ogbogbo inyọn̄, ebi ibenama uwu ya mêdasi irọkọ atalek udọn̄ òdọdọk inyi esa etọbọ ọdọ uwu ya.

Ikeya si, ike uti òjọjọn̄ọ okikaan̄ ikpele ugwun̄-ijọn̄ òdọdọk inin̄ ijọn̄, uwu ogbogbo inyọn̄ môkaan̄ ọdọ ònyenye enenen etọbọbe me inyọn̄ ewuuk. Usini mgbọ, ewuuk ya îkijọn̄ọ ere me emen ijọn̄.

Eyi ògọgọọk, ebi ikwaan̄ mêtap atà ikana uwu ya. Ema mêsa okwukwut  òjojọn̄ọ irọ atà cha.

Atà okwukwut cha okirọ ibe ifet ikọkọt inama uwu ujọn̄ọ ile. Okwukwut môkọt ibeme ulobo òmimin enenen.

Atà okwukwut  ya ore ukwuuk uwu ya, kubọk ukwuuk lek ebilene.

Okwukwut cha môkọt imen̄e. Eya îsibi ibe ke uwu ya môkọt iwumu sọntiik inyi agan̄ ge (ubọk geelek ibe ìkafet imumun̄).

Ire efet ònyenye iwut, mè ìre sikisik-ijọn̄ onu, okwukwut òkup me emen lek uwu ya môro inyi uwu ya ikọọn̄ sọntiik inyi agan̄ ge.

Okwukwut ore achubọk inu òkibeme uwu ya.

Inu kechilọ ekichubọk isa inama uwu ìre okpungwu. Ekigbaan̄ inu òbet lek okpoon̄, mè  ntọn̄ inama-uwu, mè mun̄, iwọlọ. Ebi ikwaan̄ ekiwọlọ okpungwu inyi ikup mumun̄, mè eben egwook ekana me emen ere atà okwukwut cha okupbe.

Mgbọ opkungwu ya isikup ikem, môneninye, kubọk ewuuk. Ọmọ ke ekisa irọ ijọn̄ mè esa erọ agba uwu cha.

Ebi ikwaan̄ ekinama uwu ogbogbo inyọn̄  ifo inyọn̄, ukpa ge me inyọn̄ ge. Ukpa eyi ògegele môben owuwa ulobo. Opkungwu okiben ulobo ya, mè ikirọ inyi uwu ya inye mè ikasisik.

Okpungwu ya ìre ukpa ge egwookbe ikana atà okwukwut ya, ọmọ okikput alata ya inyi mun̄ mè efet ikare lek.

Ekinama si atà emen òben cha me ike mgbọ keyi.  Mgbo isirọ ikwaan̄ okwukwut mè okpungwu isan̄a, ebi ikwaan̄ meneniben nruruk cha ikwaan̄ me lek uwu ya. Mgbọ ya ke ebenitap ukwek-inyọn̄ mè agbalek uwu cha.

Mêtap olik ukan̄ ikana uwu ya mè itap si ebi kè okpot ìkiben mun̄ ije, mè isun̄ ere ijaan̄.

Me òta kan̄, ebi ikwaan̄ mêtap ukan̄, mè isotu, mè okop inorie, mè ofifi inu echi mêkọtbe isa iluk ugwem mè isa  isi ikwaan̄ me emen uwu ogbogbo inyọn̄.

Mishelle obebe, "Owuwa ama ile kpeyaka ikaan̄ ere iluluk. Uwu òjọjọn̄ọ ichep me inyọn̄ chi ìkitap ubọk inyi ekaan̄ ere iluluk ewa. Mgbọ nsikana ogwu usọ ikwan̄, mâgọọk itap ubọk inama uwu ogbogbo inyọn̄ òbebene igak otutuuk me linyọn̄!"