Ezazhi è le èmìzhi kakanyi. A tu sashi tu be nyagagi nazhi à de bazumazhi ò na ke égó na. Ndocizhi ma a tu à tu be nyagagizhi na zawangi tswa na, ke kpalaba be eguntsùnci na.

Èmì sashi a tu à tu be nyagagi bazumazhi gani be tsitswacizhi, ke kata-kuru etan nana na.

Kabo be Thabo Kgatleng bo à dan ò, eka etsunyakpa Botswana, na tsò Mochudi na. Kata-kuru bo à fi be nyamanci àzhi ò.

"Kata nana kuru tsa wun yi be sansara è. A tu kata nanazhi tu dokun eyitako Africa ò," Kabo kpéganyé.

Thabo ci gangan lo, "Ekundo kata nana kuru a yi ò, be kpako to kpebagizhi. Yi yì be kpebagi-kpalabazhi, na danbo le à na."

"Ndako yi tu katakurugi na tu ke panyi na. Nda yi ci la nyagagi zamanzhi dan ù," Kabo gan.

"Lugwa yi gangam kemina tu ù kakanyi na," Kabo gan.

Wun ke à gan, "Cigbansaci, egotinci, takunzhi, donci be egunzhinci ga ebatucizhi é lotun be nyi ò.

E caca be gushe gba nyi. A ca tá takun gizhi to jikana zhin kpe ù. Nana ga è la ekpo gboka na à tuba ta ù wo na."

Thabo gan tu ù, "Ebatucizhi fe la cigbansagi duruzhi gun ekpo ò, kurugi ma kapazhi. A ci à cigbansagi duruzhi wonpa be dozhi, wunci à fe evo-cigbanzhi ya shempazhi.

Na à gun banvozhi mi zo na, ebatucizhi fe ta takunzhi kpe évó nana keba."

"Wunci tu, zhizhin keba lankpa, be nuwon to ebinankó è. Nana ga à la wunci à gboka saranyi wunga wó na ò. A ci à ku à dan gandan takunzhi ò wunci fedun wangi nyi," Kabo gan.

"Ebatu be takunzhi gandan dozhi ò wun è la shempazhi gboka be efojin," Thabo gan be ù.

Kabo ci gan, "Zhempa tekan ga è la katakurugi fuyèkò ò."

Thabo ci kpéganyé, "Kata ù fuyèkò ga yi, eba na è guná denbo na, yèkò wun è yi ninbo bo ò. Énágún yigidi à de nin lo à.

Kami yikere, katakurugi na ga fe wagi nyi ninbo wunci à fe da yipa gwa lo den."

"Ebatucizhi è tan kin katakurugi tan be egun nyi ci ga fe ekpó ya ù," Thabo gan.

Kabo ci gan, "A ga à gun kintara mi, e la egun zhin kpe ù tan ú lo takò. Kin nana ga à wó tsaku nyi, wunga yi kintara ya wun ò."

Thabo gan, "Ézoci ebatu nana ga yi a la sansara ta ù eti ò. Pwarwa ga sansara katakurugizhi è yi ò.

Ebatucizhi è la evo-cigbansáci din porogi pa keba tacin ò. A ci á tin kakanyi edò egozhi ba eta gbangunu nanazhi ò. Sansara nana è kan nuwon nyi gánzhin."

Egótitinci ga yi nyagagi kpoki na è la jin sansara na ò. Ama, nyagagi bazuma nana è la zhe dana enyasòsòngizhi be nyakungi ndocizhi. Gwako àzhi ga è nyi enyazhi ò!

Be cincinle yesan è wa le guta yé: èdzuzhi, kinkèrè, nnayawo, ekági be étsúgi?

Nyagagi bazuma ke egótitinci na è la fe dana wangi ya edzuzhi na è le to gbe enyazhi na.

Edzuzhi è nyí egótitinci ya à a de kangwa enyasòsòngi ndocizhi.

Yi la èyèdan egótitinci ebo kikan étsúgizhi, fingizhi be ékágizhi.

"Yi dokun na è le katakurugizhi ò na!" Thabo gan, be cincinle egótitinci. Wun è sundan edzuzhi.

"Mi è duwon nyakungi ndoci nazhi è le gani be yi nyi na?" Kabo gbingan, be nakankùn nyi.

"Mi ga à tu èmì mi, katakurugi mi à tu ò na à yi be sansara vónkpárázhi na!" Kabo máya.