Enyasòsóngizhi è le èmìzhi kakanyi. Sashi è le dokun keba, sashi le gbawugi.

Gbaka etan nana yi eti Naeku be Naserian. Yegi éká gubà na è le kin egozhi eyitako Kenya na.

Yegi nanazhi è le gun kpangwan atso be éká gbashiba ndocizhi.

Ékázhi è lele gun kajigi ò na à tu be egun nyi na. E tutu kintako ko titakin bo ò, ko gubàbà.

Natso tinya ga yi gàná ò. Gwako gànázhi è gán tsuwon gubà lo gutsun à tita bo à.

Ékázhi ga gun e lotun titi-titi kakanyi keba. Naeku be Naserian a yi etunlocizhi éká. Kpátá éká yiwozhi ga yi etunlocizhi ò. "Yizhi ga yi egbazhi to ebatucizhi ò!" Naeku gan.

Etunloci ékázhi ga è tu to won gàná dan ò. Naserian ci gan, "Yi è tuba woncinko, na sagwazhi na."

"Lugwa a kpéganyé ya we kemina yi è tu èmì tu na," Naeku cegan. "Yi è caca be gbigba kpankorozhi kin bo."

Naserian ci cezun ù, "Yikan yizhi ga yi è la gba kin nyi ò. Yi ci è ku jikana be nyi ò!"

"Ebo shempa kpankorozhi à gboka, micini be jikana keba ga yi é la zun wun ò," Naserian gan.

"Micini tekan nana ga à wo, wun è la Gboka ke egun na. Gànázhi è jinfo lokpa," Naeku gan be ù.

"Yi è la jikana na yi gba ku zhin den ci è la ù tuba den bo ò. Gàná nana wun è yi kurugi ko ke evo-ekpa na wunci à yi be kpankorozhi," Naserian gan.

"Gàná sashi è kétó tun tsuwon gutwani!" Naeku gan.

Enyasòsòngi ékázhi yi ò na è le eba ò dokun na. A yi be etun kakanyi na è la tu èmì à to éyédan ù na.

Etunloci àzhi ke Naserian be Naeku na è gbakin, a ci è tu gàná na. Ewùnsunci ékázhi ga è pa gàná ò. Etunlocizhi be ewùnsuncizhi gani ga è tinya lo eba na à tu gàná worozhi na.

Éká éyéladancizhi ci è la éyédan sagi-éká be éká bongizhi na.

Gàná ma yi be kpangwazhi dokun. Wun yi be kata sagi, kata ékágizhi, to edo nyagicizhi. Kpankorozhi ga da guke kata nanazhi kakanyi ò.

Sagi ga woncin gán à ò, wun ma è jinfo gán.

Naserian fe gan, "Yi tu kpankorozhi tu ko efozhi lo den ebo efe ù de ù gan ù zhin gàná nin."

Naeku gan be ù, "Ékázhi è wa efe ebo esunya ò." Naserian kpeganye, "Efonanazhi è la eba pa, wun è lugwa ù wóná nin nya gàná bo na à."

"Yi yì be bucagi nin nya gàná yi bo, eba na èmú è nyì ya yi na. Yi ci è ku fini yiringizhi to nyagagi ndocizhi dan dozhi ci è la nyi èmú na," Naserian gan.

"Máná! Naeku gan. "Èmú bucagi nana gabo yi è de nyagici gi kpátá ò. Yi ga yi éká nazhi è nu èmú gbawugi na."

Ékázhi kpátá è yi be sagi be etsu nyi. Etunlocizhi ga è la nyagici da ya to pipa nusa à nanazhi ò. Sagi è le yizhe eya eshi lo gbanwo.

Wun ma è ma ezhi na à tun kpótsùtsunzhi na yizhele ù bo. Ezhi ga ka bongi, éyéladan-ékázhi ci à layédan ù.

Naserian ci gan, "Ezhi ékázhi de wiwondan. Éká ndondo yi be enya na wun è jin ebo yegborolo a kpátá na."

Naeku ci gan, "Ndoro yi be etun ù yi nyi, yi ma è la ù lo. Ékázhi è lotun lo ge gani be dozhi." "E ba," wun à yé Naserian. "Gbani yi lonyi be eba gba è!"