Ezazhi è le èmìzhi kakanyi. Zasashi tu èmì àzhi tu na a le ù jinfo na. Sashi ma tu nyazhi tu na a le ù jinfo à na.

Gbaka nana à gangan eti èmì èkákengi na à tu be tsukùnzhi na è ye manyatta na, na à tu ke evunzhi na.

Manyatta nana eyitifin-tacin Kenya bo ù dan ò, eka Samburu ò. Evun nini ga yegizhi Sidai be Naeku gun kebá ò, nyamanci à be egi-bòbóngi ci gun evun nini ò.

Ndagi à be nugunci àzhi bagi guta ci gun evun nakenazhi ò, be ezami àzhi.

Ezamizhi è kàn nankó kàn kebá a ci è ba dozhin jinre. E fedun dannani lokpa à. E dazan da lo eba ègizhi woro kandondo nankó kànzhi ò.

Magoba manyatta ga yi gwala ekanzhi ò na è kàn titinya nankózhi to bibé ko gigandan ezakánzhi.

"Yi è caca be kuku nyagagi danazhi. Yi è la gwalazhi na yi ga tu evo èvun kuyekan," Sidai gan.

Naeku ci gan be ù, "Yi kpe kemina è lotun lo be nyagagi danazhi ci tu èmìzhi na. Ezandoro degwa dan tutu manyatta."

"Gwala woncikozhi ga yi è la tu shempazhi ò. Yi ci è jin sansara kpe ù ti ò be enú nyi, wunci à la evun gikini wo bayini na," Sidai kpeganyé.

"Sansara nazhi wunkpa à na ga evun nanazhi de ò. Wunga la efe ci è kpé ù ya wo à nyi ò," Naeku gan be ù.

Sidai ci gan, "Tsukun evunzhi ga pa gboka gikini à ni, yi ci à tin gwalagizhi ba gandan gwalakozhi."

Naeku ci gan be ù, "Yi ci è tin egozhi kpe eti tsukun sansara, na ji ú ye gan cekpe ò."

"Jinjinge cekpe ga è kangwa ele be yigidi ò," Sidai gan.

Sidai gan be, "Sansara yi è la fe para ko kuru."

Naeku ci gan, "Eguntan ga è ba mi gán ebatu bo ò. Na yi è zhin egun kebá be ebinankózhi la tanba gbangba na. Yi ci ga egun nana ku ba evo-evun ci fe sa ù ba èfòzhi. Nana jin ga è kangwa efe be jikana ò."

Sidai fe gan, "Egun ku tan shempa wun ga wo, a ga won dozhi. Yi è la ù tan to shempa nin. Egun na à tan na ga wo wun è la gboka."

Naeku gan be ù, "A de kpebagi shempa ùzhi bo à, ama evun yi yi be kpako-cigbansaci."

"Eguntan evun wun è la ù fuyeko," Sidai gan. "Ke ye 'lafuyeko'?" Naeku gbingan.

"Egun be ebi-nankó è la even fuyeko ninbo eba ga wóna denbo na. Kami gbanfere ma, shempa la wona ninbo wun è yipa tinya à," yegi nyizagi zhe ù.

"Zandoro ga è gungwa ci è tu manyatta ò, yi ga è kpela na.

Wun ma zo nyi kpe be dozhi nyi à, a ga à lotun ebandoci be ù nyi na à," Sidai kpéganyé.

"Nyagagi ebatu yizhi lukpin à, wunga la a zo nyi danza be nyi à nyi ò. Rakunzhi be kyatyagizhi ga yi è pa kpe daga manyatta gbako yi bo ò. Ke sansara na," Sidai gan.

"Yi ci è ke wa nyagagi nakenazhi eba woro ò," Naeku gan be ù.

"Èmì yi ga go yi nyi ò, na è lugwa yi è kan nankózhi wo na," Sidai gan.

"Kpélá e lo be zhin ga la yi è de katunba lo be eya yizhi à nyi ò," Naeku gan.

"Katunba yi è lugwa yi go gbakazhi lo èmì, na la etun katunba yi batu à nyi ò," Sidai ci la be ù.