Ekandoci be danbo, a de bagi langba gutsun danbe dozhi. A ci è jin enyanfondo keba.

Efondoci, nyagici à ci be zo. A ci à gunyekàn. "Babo nyagici na ye à gi yegboro na à fe be ò?" zeni mini à bo gbingan.

A de èzhè kpokí egangbin nana à ebona a de éwó à be a de eyazhi kin baga bo à.

Be yekpa kpa fyagi nyi, zeni fe gan, "Yi fi lo!" Zabaci ci gbingan, "Babo o?"

Ezataci ci gan, "Yi da è yí nyagici." Ezanici ci gan, "A won yi yi à ga ò?" Ezatsunci fe gan, "Ga dansan wuncin ma!"

Bagi gutsun nana fe la etitun dzúkó nyana a gi na yízhi.

Na a ca enya yí na, a fe de à won!

A bagi gutsutsun ma la lo dana gbadzankawun.

Na a fe gbagbèrè na, gbadzankawun fe gbingan, "Zhi mini ye bo be be yekpa nyagici yí ò?"

A fe yí egangan be dozhi. A fe gan gbadzankawun kemina a jinjin na.

Ezacaba ci gan, "Nyana mi gan kawonyi na 'yi fi lo', wunjin enyayí à." Ezabaci ci gan, "Yekpa mi de dan bana yi à lo na."

Ezataci gan, "Emi yi à gun eti yi lo nyagici wazhi."

Ezanici fe gan, "Mi de din yi tukpa ke a ga yi won na."

Ezatsunci ci gan, "Mi kpe ke yigbecizhi ga yi yi ò na,
wunga la mi ci gan, 'yi ga dansan wuncin ma'."

Na wun wó eganzhi zo na, gbadzankawun kpe gan
bagi gutsun nana à enyayí.

Gbadzankawun ci à eganzo ya, "Enya wangi wun yi ò a jin enyandondo keba, banbe yekpa enyadèdè!"